¹ Na batcha, e nyuba s'ebye, Enawetchu era kubika e bandji, makumi malyinda, baibilyi babilyi, bamuhondorere kuya ngasi musi na ngasi andju ala ahondaa ekuya yeyine. ² Era kubabira, "Ebiumbulwa bilyi ninene, si kweyine, e bakosi b'e mukolo bu baeke;" Batcha, mweme Enawetchu w'e biumbulwa atchum'e bakosi mwa kakatchi k'e biumbulwa byaye. ³ Mwendae, mulole, okwo nyiba tchumire nga mwana wa tchibusi mwa kakatchi k'e nyama sikalyi. ⁴ Mut'ekaa hawo, ilyi tchimbesha, ilyi birato; na tchiro muta lamusaa mundju mwa ndjira. ⁵ Na ngasi nyumba era mung'engira mwo, mutete tanga, 'E bwolo bube mw'ene nyumba; ⁶ na ilyi kungaba e mwana w'e bwolo, e bwolo bwenyu bunga e ndonga saye; nanga, atalyi mwo, e bwolo bwenyu bunga bahubilyira. ⁷ Na batcha, mwikala mw'eye nyumba, nyule n'e kumwa e by'omw'eye nyumba; kwa bushi ngasi mukosi ashingenene ekweresibwa e lwembo lwaye. Muta hama hamaa, kutenga mw'ene nyumba kuya mw'ene yindji. ⁸ Na ngasi musi woshi ola mungaya mwo, baka bamuera, mulye e bilyo bingabikwa e muhondo senyu; ⁹ mufumye e balwala balyi mwo, mubabire, 'E bwami bwa Ongo bwera bulyi ofi nabwo.' ¹⁰ Na ngasi musi woshi ola mung'engira mwo, nabwo bata bamwoere, mutenge mwo, nenyu ilyi mungarenga mwa ndjira saye mutete, ¹¹ 'Tchiro e mukungu ilyi bihoo by'oyo musi bira bilyi kwa maulu metchu, tchubikukumure e ndonga senyu. Si kweyine, mumenye okwo E bwami bwa Ongo bwera bulyi ofi.' ¹² Nyibabilyire okwo olo lusiku lukaba lurembu busibu e Sodoma kubabalyira e butchindjibuse bwaye kulusha oyo musi. ¹³ E bwanya bwawe Korazini! E bwanya bwawe, Bethsaida! kwa bushi nga ebye bisomerene byayilyikanaa e mwenyu nga byayilyikanaa e Tiro n'e Sidoni, banga tchiayire kutenger'awo, na batcha, bang'ekere mwa ndjimba s'emishibwo n'elufufu. ¹⁴ Si kweyine, e lusiku lw'e butchindjibuse lukaba lurembu Tiro ne Sidoni kubabalyira e butchindjibuse bwaye kulusha mwabwo. ¹⁵ Nawe Kapernaumu, kute! Unga kula kuyika e mbingu? Unga'ndaasibwa kuyika e kuzimu. ¹⁶ Ola ukabw'onvilyisa mwabwo, ilyi any'unvilyisise nyono; n'ola wabalayire mwabwo ilyi nanyi ananyilayire; n'ola wanyilayire ilyi analayire ola wanyitchumaa. ¹⁷ Mu mango abwo makumi malyinda ilyi baaluka kwa bushaaluke, n'ekuteta, "Enawetchu, tchiro n'e mbusi satchukengire kw'e sina lyawe." ¹⁸ Yesu era kubabira, "Nalolaa e musimu (shetani) andaala kuteng'e mbingu nga muraso. ¹⁹ Lolaa, nyibawere e teeko ly'e kubirata e ndjoka n'e ngutchu, n'e misi yoshi y'ola muhombanyi, na tchiro kutalyi e kandju kanga basheresa. ²⁰ Si kweyine, mutashaalukaa kwa bushi e mbusi sabakengaa, si mushaaluke kwa bushi e masina menyu maandjikirwe e mbingu." ²¹ Mw'etche tchishangi era kushaaluka kwa bushi n'e muka mweru, era kuteta, "Nyikutongire, Tata, Enawetchu w'e mbingu n'e butala, kwa bushi binera wabibishire e b'e bwenge; wera kubibwonekeresa kwa bana batoto (baeke); na batcha, Tata, kwa bushi ku bya kusimisaa." ²² Era kuteta, "Neresibirwe byoshi ne Tata, na tchiro kutalyi ola wishi e mwana si Eshe; na kutalyi ola wishi Tata si e muala, na ngasi woshi ola e mwana ahondjire e kumubwoorera." ²³ Era kuba alukira e baanda baye, n'ekushambala nabwo kw'ewe, "Erayi ly'e meho menyu malola kwebine mwendjire mwa lola kwo. ²⁴ Kwa bushi nyibabilyire okwo barebi banene n'e bami bahondaa e kulola kwebine mwendjire mwalola kwo si bata bilolaa kwo; n'ekunva kwebine batana byunvaa kwo." ²⁵ Na mulolae, mundju muuma mwishi w'e mandja era kwimanga e muhondo saye ilyi amutangule, era kuteta, "Mwiyilyisa, kute nyiyirae ilyi nyiya mwa bwami bw'e myaka ne myaka?" ²⁶ Yesu era kumubira, "Kute! Byaandjikirwe mwa ma teeko? Kute wasomire?" ²⁷ Era kuhusa, era kuteta, "Usime Ongo wawe kwa mutchima wawe woshi, n'okwo misi yawe yoshi, n'okwo bwenge bwawe bwoshi, na usime mwenye wenyu ng'okwo utchisima." ²⁸ Yesu era kumubira, "Wahusise kubuya; uyire bawe nawe ungalama." ²⁹ Na ilyi ahonda e kutchereka okwo alyi w'e kulyi, era kubusa Yesu, "Nde yi mwenye wetchu?" ³⁰ Yesu era kumuhusa, era kuteta, "Mundju muuma andaalaa kutenga e Yerusalemu kuya e Yeriko. Era kutowera mwa banyayi; bera kumukula e ndjimba, bera kumubika kw'e byulu, bera kutch'endera, bera kumureka ofi n'e kufa. ³¹ Kw'erayi, e mudjindji muuma era kurenga mw'eye ndjira, na ilyi amulola kwo era kurenga e butambi. ³² Kunokwo e Mulawi naye ilyi ayik'awo era kumulola kwo, era kurenga e butambi. ³³ Si kweyine, Musamaria muuma, mwa kakatchi k'e kubalama kwaye era kuyika awo abaa alyi; na ilyi amulola kwo era kumubera bwondjo. ³⁴ Era kumusheerera, era kumuhweka e byulu byaye, n'ekubibika kw'e mafuta ne Divai. Era kumubika kwa tchesi tchaye, era kumweka kuyika mwa nyumba y'e baenyi, era kumuondjesa mwo. ³⁵ Na e lusiku lw'e kabilyi, era kutenza faranga ebilyi, era kweresa nyin'e nyumba y'e baenyi, era kuteta, "Mubuk'ono, na ngasi hyoshi hira ungayira e ndonga saye, nyono e mango nyinga aluka nyinga kulyipa (nyinga kufua)." ³⁶ Kute ulolyire woyo e kakatchi ka bano bahatchu, nde yi wabaa mwenye wabwo oyo watoweraa mwa banyayi? ³⁷ Era kuteta, " Oyo wamubwoneraa e bwondjo." Yesu era kumuhusa, "Wende, nawe ulyire batcha." ³⁸ Na ilyi baba balyi mwa luenzi lwabwo, era kuya mu musi muuma; na mukasi muuma e sina lyaye yi Martha era kumumwoera mwa nyumba yaye. ³⁹ Naye abaa ete mulumuna waye ubalangirwe Mariamu, yi w'ekalaa mwa maulu ma Yesu, era kunvilyisa e myasi yaye. ⁴⁰ Si kweyine Martha endee ayira e mukolo munene. Era kuya era Yesu alyi, era kumubira, "Enawetchu, utalolyire okwo kulyi kubi mwenye wetchu anyirekire nakola nyeyine? Batcha, umubire anyiase." ⁴¹ Si kweyine, Enawetchu era kumubira, "Martha, Martha, walyibukire n'e kuba n'e bute kwa bushi n'ebye wendjire wayira; ⁴² si kweyine kwemire kandju kauma keyine. Ne Mariamu ahombore etchitchwe tchi buya, tchira atakanyayibwa."