¹ Na ilyi aba alyi andju auma endjir'ema, ilyi amala, muuma mwa kakatchi k'e baanda baye era kumubira, "Enawetchu, utchuyilyise e kwema, ng'okwo Yoana eyilyisaa e baanda baye." ² Yesu era kuba bira, "E mango mwema, mutete, 'Tata u ulyi mwa mbingu, e sina lyawe lyitchesibwe, e bwami bwawe bwishe, [e kuhonda kwawe kuyikilyire, ano butala ng'omwo mbingu]. ³ Utchwerse e siku soshi e bilyo byeychu. ⁴ Utchubabalyire e byaa byetchu, kwa bushi netchu tchwende tchwababalyira bala batchuhilyire. Utana tchubikaa mwa matangulo, [si utchufumye n'ola muhombanyi]. ⁵ Yesu era kuba bira, "Nde mu mwabwo ola w'et'emwira, akaya e mwaye e kakatchi k'e butchufu, n'e kumubira, 'mwira wanyi, nyindjika mikati ehatchu, ⁶ kwa bushi mwira wanyi anyiyikilyire, atenga lubalamwo, nanyi ndete kandju kakumweresa. ⁷ N'oyo ulyi mwa mwaye amuhuse n'e kuteta, "Utanyilyibusa; elunvi lweyerwe, netchu tchwaondjere kwa ndjingo nyono n'e bana banyi; ndanga ala kusuka nyikuwe." ⁸ Nyibabilyi okwo, tchiro angaba at'emukire amuwe kwa bushi alyi mwira waye, si kweyine kwa bushi atarekire e kumwema, ang'emuka n'e kumweresa ng'okwo ahondjire. ⁹ Nanyi nyihubire kuba bira, mweme, nenyu mung'eresibwa; mukongot'e (lunvi) nebyu mung'eulyirwa. ¹⁰ Kwa bushi ngasi ola w'ende w'ema, end'angilyira; n'ola w'ende w'ahonda end'abwona; n'ola w'ende wakongot'e (lunvi) end'eulyirwa. ¹¹ Kwa bushi nde era mwenyu, ulyi eshe, ola e mwana waye anga mwema e mukati, akamweresa e koyi, ilyi efi, a alyi efi amuw'e ndjoka? ¹² Ilyi amwem'eyi amuw'e ngutchu? ¹³ Kwa bushi n'okwo, nga mwabwo mu mulyi babi mumenyir'e kweresa e bana benyu e lwembo lubuya, kute! Tata ulyi mwa mbingu, ataberese muka mweru abwo bende bamwema?" ¹⁴ Na batcha, Yesu abaa alyi mwa kukula e mbusi yitateta. Na ilyie mbusi yaba y'era yatengaa, oyo utateta, era kuteta, e mukundamano era kusomerwa. ¹⁵ Si kweyine, bauma mubwo bera kuteta, "Endjire akula e mbusi e mwa Beelzebuli, mukulu w'e mbusi." ¹⁶ E bandji bera kumutangula, mwa kuhonda e tchisomerene kuteng'e mbingu. ¹⁷ Si kweyine, Yesu era kumenya e ndanya sabwo, era kuba bira, "Ngasi bwami bula bwahombene beyine ku beyine, bwende bwashandabana, n'e nyumba kwa yindji y'ende yakumbaala. ¹⁸ Batcha, nga shetani naye angahombibwa kwa kalamwo kaye, kut'e bwami bwaye bung'e manga? Kwa bushi mwabwo mwendjire mwateta okwo nendjire nakula e mbusi kwa bushi ne Beelzebuli. ¹⁹ Na btcha, nga nyono nakulyire e mbusi kwa bushi ne Beelzebuli, e bana benyu, kute basikula e mwande? Kwa bushi n'okwo, abwola bu baka batchindjibusa. ²⁰ Si kweyine, nga nyono nendjire nakula e mbusi kwa kubwokwo kwa Ongo, batcha e bwami bwa Ongo bwera bubeeshilyire. ²¹ E mundju ola w'et'e misi utchiwekire kw'e mbenzi saye, nga alanga e nyumba yaye, e bikayi byaye ilyi bibikirwe kubuya, ²² si kweyine e mundju wet'e misi kumulusha, ilyi anga mwishira n'e kumuyima, aka munyaa e mbenzi saye soshi abaa alangalyire, n'e kuaba ebye byoshi atolaa. ²³ E mundju woshi ola utalyi alauma nanyi, ilyi alyi muhombanyi wanyi; na ngasi mundju ola utakundamanya alauma nanyi, ilyi alyi wa kuhandabanya. ²⁴ E mango e mbusi yibi y'ende yatenga mwa mundju, y'ende yarenga e andju ala atalyi e meshi, kuhunda ala yinga tamukira, na nga atabwene wo, y'ende yateta; ²⁵ Nyinga hubira mwa nyumba yanyi natengaa. ²⁶ Na e mango y'ende yayika mwo, n'e kulola bayibisise n'e kubikwa mwo e bibuya, mu mango y'ende yaaluka n'e kureta sindji mbusi elyinda, sibi busibu kumulusha yeyine, san'engira n'e kwikala mwo; n'oyo mundju, e kalamwo kaye kanaba kabi busibu kulusha e muhondo. ²⁷ Na e mango abaa alyi mwa kuteta eye myasi, mukasi muuma mwa mukundamano era kwirusa e murenge waye, era kumubira, "Erayi ly'enda yakubutaa n'e mabere (mwonga) mala w'ongaa." ²⁸ Si kweyine, era kuteta, "Munvilyise, erayi ly'e bw'onvilyisa e mwasi wa Ongo n'e ku ushimba, ilyi kuukulyikira." ²⁹ Na e mango e mukundamano eshire er'alyi, Yesu era kutangira ateta, "Tchine tchibutchi tchilyi tchibutchi tchibi; tch'endjire tchahonda e tchisomerene, na tchiro tchit'eresibwe tchindji tchisomerene nge tchira tchisomerene tcha Yona. ³⁰ Kwa bushi, ngokula Yona abaa tchisomerene e mw'e b'e Ninawi, kunoko kw'e mwana wa Adamu akaba kwe tchine tchibutchi. ³¹ E mwami kasi kuteng'e masina ak'esha e lusiku lw'e butchindjibuke alauma n'e bandju betchine tchibutchi, naye aka batchindjibusa e kuba n'e butchindjibuse; kwa bushi eshaa kutenga kwa businda bw'e butala ilyi onva e bwenge bwa Sulemani, nnano alyi e mukulu kulusha Sulemani. ³² E bandju b'e Ninawi bak'emanga e lusiku lw'e butchindjibuse alauma ne tchine tchibutchi, nabwo baka tchi tchindjibusa e kuba tchilyi tchibi; kwa bushi batchiayaa kwa meyilyisa ma Yona, nnano alyi e mukulu kulusha Yona. ³³ Kutalyi e mundju ola w'ende wakoresa e tara n'e kulyibika ala atchibishire, ilyi e masina m'e tchitonga; si ende alyibika e ndonga s'e tchitala, ilyi e b'engira baala kulola kwa bulangare. ³⁴ E tara ly'e mubilyi lyilyi lyiho; na batcha e lyiho lyawe lyikaba lyitchere, e mubilyi wawe woshi wanaba mwa bulangare; si ilyi lyingaba lyibi, e mubilyi wawe woshi wanaba mwa mwisimya. ³⁵ Kwa batcha, lolaa, e bulangare bulyi mwanda sawe bungesha kuba mwisimya. ³⁶ Na batcha, nga e bulangare bwalumilyire mwa kakatchi k'e mubilyi wawe woshi, na utet'ete ala alyi e mwisimya, e mubilyi wawe woshi ungaba n'e bulangare bw'e kunalyi; ngokula e tara lyende lyakulomekera n'e bulangare bwalye. ³⁷ Na ilyi aba alyi mwa kuteta, mufarisayo muuma era kumubalangira e mwaye, aye kulya e bilyo; era kwingira, era kwikala, aly'e bilyo. ³⁸ Oyo Mufarisayo ilyi amulola kwo, era kusomerwa kwa bushi at'owaa e mabokwo e muhondo s'e kulya e bilyo. ³⁹ Si kweyine Enawetchu era kumubira okwo, "Mwabo mu Bafarisayo mwende mwahuka ilyi kutches e tchikombe n'e mbare e mbuwa, si kweyine mwanda senyu mwihure e bunyayi n'e bubi." ⁴⁰ Mwabwo mu bahwindja, oyo wayiraa eby'e mbuwa ata yinayiraa e by'omw'e nda? ⁴¹ Si kweyine, mwane e ndjulo e by'omw'enda (s'e mutchima), na batcha, byoshi byanaba bitchere e mwenyu. ⁴² Si kweyine, e bwanya bwenyu Bafarisayo, kwa bushi mwende mwana e ndjulo e munanaa n'e howo, na batcha mwende mwareka e bilyi bibuya, n'e busime bwa Ongo; bibashingenene kuyir'ebye tanga, na busira kureka ebye bya kabilyi. ⁴³ E bwanya bwenyu, Bafarisayo, kwa bushi mwende mwasima e kwikala e muhondo mwa masinagogi, n'e kulamusibwa mwa masoko. ⁴⁴ E bwanya bwenyu, kwa bushi mushushanyisibwe n'e shinda sitabwonekana, shinda sira e bandju bendjire barenga e ndonga sase bat'ete mwasi kuse. ⁴⁵ Mundju muuma mwa kakatchi k'e beshi b'e mandja, era kuhusa, era kumubira, "Mwiyilyisa, mwa kutet'ebye, watchutetchire ilyi watchukambire netchu." ⁴⁶ Yesu era kuteta, "Nenyu mu beshi b'e mandja, e bwanya bwenyu, kwa bushi mwende mwesa e bandju e misiwo era yitang'ekibwa, na tchiro mwabwo mutanga ata kw'eye misiwo kwa mutoke wenyu muuma. ⁴⁷ E bwanya bwenyu, kwa bushi mwende mwebaka e shinda s'e barebi, na b'eho bu ba b'etaa. ⁴⁸ Batcha, mwaamilyisa n'e kuyikilyisa e mikolo ya b'eho wenyu; kwa bushi bu ba b'etaa, ne mwabo mw'endjire mwa bebakira e shinda. ⁴⁹ Na kwa bushi n'oko e bwenge bwa Ongo butetchire batcha, 'Lolaa, nyinga tchumq e mwabo e barebi n'e ndjumwa, nabwo bwng'eta bauma mubwo n'e kuba korokanya. ⁵⁰ Ilyi e mikira y'e barebi bwoshi ihondjibwa kwe tchine tchibutchi, mikira era yasheshekalaa kutengera e kubumbwa kw'e butala. ⁵¹ Kutengera e mikira ya Habeli kuyika e mikira ya Zakaria, yi w'etchibwaa mwa kakatchi k'e andju e nderekero n'e shengero. N a batcha, nyiba bilyire eye mikira ikahondjibwa kw'e tchine tchibutchi. ⁵² E bwanya bwenyu mu beshi b'e mandja, kwa bushi mwakulyire e lwiyalo (ilyi e fungulo) lw'e bwenge, na mubeyine mut'engiraa, na bala babaa bang'engilyira mwera kubalayilyira e kwingira. ⁵³ Na ilyi Yesu ateng'omo, e bandjisi n'e bafarisayo bera kutangira bamufundeeresa busibu, n'e kumukunza n'e mabuso mengi, ⁵⁴ b'endee bahonda bw'onve e mwasi unga tenga mwa bunu bwaye.