¹ Na mwako kashangi e mukundamano w'era kukundamana byumbi n'e byumbi, na kuyika babiratana, era kutangira abira e baanda baye, "Mutchilange n'e bubi bw'e Bafarisayo, bu bulyi bunafiki." ² Si kweyine kutalyi e mwasi ola watchibishire ola utaka bihulwa, ilyi mwasi ola wabishirwe utaka menyekana. ³ Batcha, ngasi mwasi ola mwatetaa mwa mwisimya, uk'onvikana mwa bulangare; na ngasi mwasi ola mukateta mwa kutchi kw'e mundju mwa businda bw'omw'enda s'e nyumba, ukabalyikibwa e ndonga s'e burafe. ⁴ Nanyi nyiba bilyire mwabwo bera banyi, mut'obwowaa abwo b'e kwita e mubilyi, n'e nyuma s'oko, bat'ete kundji kula banga huba kuyira. ⁵ Si kweyine naba bira ola mushingenene e kwobwowa; "Mwobwowe ola e nyuma s'e kwit'e mundju, et'e buashe bw'e kumukabula mwa jehenamu; na kunyibabilyire, oyola yi mw'obwoae. ⁶ Kute! e ngulyimba etanu sitendjire saulwa kwa faranga ebilyi? Na tchiro kutalyi n'e muuma wabwo ola ung'ebilyirwa ne Ongo. ⁷ Si kweyine, envilyi s'okw'etchwe lyenyu siandjirwe soshi. Na batcha, mut'obwowaa, kwa bushi mulyi babuya kulusha e ngulimba sinene. ⁸ Nenyu nyibabilyire, ngasi mundju ola ukanyikenga e muhondo s'e bandju, e mwana wa Adamu naye akamukenga e muhondo sa ba malaika ba Ongo, ⁹ na ngasi mundju ola ukanyunva honyi e muhondo s'e bandju, oyola akalayirwa e muhondo sa ba malaika ba Ongo. ¹⁰ Na ngasi mundju ola ukateta e mwasi woshi e ndonga s'e mwana wa Adamu akababalyirwa, si ngasi woshi ola uka kamba ilyi kutakira muka mweru, atakababalyirwa. ¹¹ Na e mango bakab'eka e muhondo s'e ma sinagogi n'e bakulukulu n'ebet'emisi, mutatchilyibusaa kwa kutanya e myasi yenyu kute mungahusa ilyi kute mungateta; ¹² kwa bushi mwako kashangi muka mweru angab'eyilyisa mwako kahangi ebibashingenene e kuteta. ¹³ Mundju muuma mwa kakatchi k'e mukundamano era kumubira, "Mwiyilyisa, ubire mwenye wetchu anyiabire e wanyi mwimo." ¹⁴ Yesu era kumubira, "U mundju, nde wakubikire nyono kuba mwishi w'e mandja ilyi mundju w'e kuaba e ndonga senyu? ¹⁵ Era kumubira, "Lolaa, mutchilange n'e buyinyisi, kwa bushi e kalamwo k'e mundju katalyi mwa bwingi bw'e bikayi byaye bir'ete." ¹⁶ Mu mango Yesu ababilyire e muanyi, era kuteta, "Ehwa lya mundju muuma muare lyabaa lyabutchire ilyi lyelyire busibu; ¹⁷ era kutangira atanya mwa mutchima waye, era kuteta, " Kute nyiyirae? kwa bushi ndete ala e kubika e biumbulwa byanyi." ¹⁸ Era kuteta, "Nyingayira batcha, ' nyingasheresa e ngulyi sanyi, nyibake e sindji sinenene busibu, n'omwo mungabika e biumbulwa byanyi byoshi n'e bikayi byanyi. ¹⁹ Na businda, nyinga bira e mutchima wanyi, "U mutchima wanyi, wete bikayi bibuya binene bira watchibikilyire mwako kwa myaka yingi. Were watamuka, ulye, umwe, ushaaluke." ²⁰ Si kweyine Ongo era kumubira, "Woyo muwindja, e butchufu bwa kulwarero bahondjire e mutchima wawe! Ne bine byoshi watchibikiraa mwako bingaba byande?" ²¹ Kunoko kw'e mundju ola w'ende watchibikra e mwako e mutchima waye, si atatchibikilyire e mwako e mwa Ongo. ²² Yesu era kubira e baanda baye, "Kwa bushi n'oko ku nyiba bilyire, mutalyibukiraa e kalamwo kenyu, tchiye mungalya; ilyi e mibilyi yenyu, tchiye mung'embala. ²³ Kwa bushi e kalamwo kalyi e ndonga s'ebilyo, n'e mubilyi alyi e ndonga s'endjimba. ²⁴ Muloreresae e milonge y'omwo tchanya, oko yitayinga ilyi itaumbula, yitatchusa ngulyi ilyi mwako, ne Ongo ende ayilyisa. Mwabwo mulyi babuya kengi kulusha e milonge. ²⁵ Na nde era mwenyu ola ungatchilyibusa , atch'uhulyire tchima tcha kubwoko kuuma? ²⁶ Batcha, nga mutanga ala e mwasi mueke ulyi ng'oyo, kwa bushi n'e tchiye munga tchilyibusa kw'ebye bindji? ²⁷ Mutchumbikise kute e mauwa m'ende mamera, matayira mukolo ilyi mataluka. Nanyi nyiba bilyire okwo, tchiro Sulemani mwa bwenge bwaye bwoshi at'embasibwaa kubuya kulusha lyiuma yamwo mauwa. ²⁸ Batcha, nga Ongo ang'embsa batcha e mauwa mw'omwerungu, mu m'ende maba malyi wo kulwarero n'ala sesi manakabulyirwa. Kute! Ongo ata bayilyire e bibuya kulusha mu besh'ebwere bueke? ²⁹ Mwabwo mutahondaa kute mungalya, ilyi kute mungamwa; tchiro mutabaa n'e bwoba, ³⁰ kwa bushi, ebyera by'e bandju bwoshi bw'omwo butala b'ende bahonda; si kweyine eho wenyu amenyire okwo mw'et'e mbuha n'ebye. ³¹ Batcha, muhonde tanga e bwami bwa Ongo, n'ebye byoshi mung'ohulyirwa. ³² Mut'obwowaa, mu tchikembe tchieke; kwa bushi eho wenyu abwene kulyi kubuya e kubawa obwo bwami. ³³ Muuse ebye mw'ete, mwan'endjulo, muyire e hawo sita berekire, yi mwako ushingenene ilyi utak'onda mwa mbingu, andju ala atakayika mwisi, ilyi e ngisha itanga sheresa. ³⁴ Kwa bushi ala e mwako wenyu alyi, u e mitchima yenyu ikaba. ³⁵ E mbindji senyu sibe siselyire, n'e matara menyu mabe makorere; ³⁶ nenyu mube nga bala bandju balyindjira Enawabwo, ola watenga kwa buya, ilyi e mango angakongoka kwa lunvi, unawo bamwiulyire. ³⁷ Erayi yabwo bakosi, bala Enawabwo ang'esha, abuane balalyire. Mwemere, nyibabilyire, akabatchisesa n'ekubamwoera kwa bilyo, ak'esha n'ekubakorera. ³⁸ Na ilyi ang'esha kwa tchisisismuka tcha kabilyi, ilyi ang'esha kwa tchisisimuka tcha kahatchu, n'ekubabuana balyi batcha, erayi lyabwo bakosi. ³⁹ Si kweyine mumenye ono mwasi, okwo, nga nyin'e nyumba angamenyire e mango e mwisi ang'esha, angalalyire, na tchiro atangarekire e nyumba yaye kusheresibwa. ⁴⁰ Nenyu, mube mutchikubure, kwa bushi e kashangi kala mutaka menya, ku kashangi e mwana wa Adamu ak'esha. ⁴¹ Petro era kumubira, "Enawetchu, ono muanyi utchubilyire wo tchubeyine, ilyi n'ebandji bwoshi?" ⁴² Enawabwo era kuteta, "Nd'oyo, mwishi w'emandja ilyi mukosi mubuya, na w'e bwenge, ola Enawabwo aka mubika kwa bukosi bwaye bwoshi, eres'ebandju bwoshi e bilyo ilyi lwembo kwa bishangi byaye? ⁴³ Erayi ly'oyo mukosi, ola Enawabwo ak'esha, amubuane endjire ayira batcha. ⁴⁴ E kunalyi nyibabilyire, akamubika e ndonga s'e bikayi byaye byoshi. ⁴⁵ Si kweyine, ilyi oyo mukosi angateta mwa mutchima waye, Enawetchu elyisis'ekwisha. atangire ahuta e bakosi baye, e balume n'e bakasi, atangire alya n'ekumwa n'e kulaluka; ⁴⁶ Enawabwo w'oyo mukosi ak'esha e lusiku ata tanyise n'e bishangi at'eshi, akamwisha bimbi bibilyi, n'e kumubika alauma n'e bat'emere. ⁴⁷ N'oyo mukosi umenyire e kuhonda kw'Enawabwo, si atachikubure, ilyi kuyira e kuhonda kwaye, angahutchibwa busibu. ⁴⁸ n'oyo utamenyire, ilyi angayira e kushingenene e kuhutchibwa, anahutchibwa kueke. Na ngasi ola weresibwe e binene, era mw'oyo mundjuyikahondjibwa binene; n'ola babikisise binene, yibakahondera binene. ⁴⁹ Neshire kukabula e mulyiro mwa butala; na ilyi aba er'akoresibwaa, tchiye nera nyihondjire busibu? ⁵⁰ Si kweyine nyet'e bubatiso bula nyishingenene e kubatisibwa, nanyi nyilyi mw'e bute bunene kuyika buyikilyire! ⁵¹ Kute! Mutanyise nga neshire kureta e bwolo mwa butala? Nibabilyire, Nanga, ata batcha, si kuhombana ilyi kuayana. ⁵² Kwa bushi kutengera batcha, mwa kakatchi ka nyumba nguma mukaba mulyi bandju batanu, bakahombana, bahatchu kuhomba e babilyi, n'e babilyi kwa bahatchu. ⁵³ Eshe w'e mwana akahombana n'e mwana waye, n'e mwana n'eshe; e mukasi n'e mwalyi, n'e munyere bu na nyina; e sesala wa mundju n'e munga, n'e munga kw'e sesala. ⁵⁴ Yesu era kuhuba kubira e mukundamano, ngasi mango mala mwenda mwabwona e lwakungu lwasuka e lwande lw'e masina, unawo mwende mwateta, 'E nvula yeshire; na kubinalyi batcha. ⁵⁵ Na e mango lwende lwateng'e ndonga, mwende mwateta, 'Kungab'e suba; na ilyi kubinalyi. ⁵⁶ Mwabwo mu b'e mutchima mubi, mwende mwamenya e kuberula e by'e butala n'e by'e mbingu; kute, kwa mutanga ala e kumenya kano kahangi? ⁵⁷ Na kute mwabwo kwa mitchima yenyu mutateta ebilyi bibuya? ⁵⁸ Kwa bushi, e mango ukulyikirene n'e wakushitakire, kuya e mwe mwishi w'e mandja, nga utchilyi omwo ndjira, yira e kushingenene e kunvikanyisibwa naye, ateshaa ku kweka e muhondo s'e muzuzi; oyo muzuzi anga kubika mwa mabwoko mw'ola w'e kukulyipisa, n'oyo w'e kulyipisa anga kukubula mwa buroko. ⁵⁹ Nyikubilyire, utateng'omwo tchiro n'e hitcha kuyika e mango ungaba wamalyir'e kulyipa e lufaranga lusinda."