¹ Businda Yesu era kusungula musi kwa musi n'e kueyilyisa alauma n'e kuteta e mwasi mubuya w'e bwami bwa Ongo. ² Na bakasi e kumi na babilyi bera kufumisimwa n'e mbusi sibi, n'e malwala, n'e Maria ubalangirwe Magadalena era kutenzibwa na mbusi e lyinda. ³ Na Yoana mukasi wa Kuza, mulanzi w'e bikulo bya Herode, ne Suzana na bandji bengi bala bamukorera mwa bikulo byabwo. ⁴ Mukundamano munene w'era kumukundamana kwo nabwo batenga tchira musi bera kumuyishira, era kuteta kwa myanyi: ⁵ E mwinzi atenga era kuya kuinga e mbuto saye, n'e mango abaa endjire ayinga e mbuto saye; syuma sera kutowerw wofi n'e njira sera kukandangwa, n'e milonge yera kusilya. ⁶ N'e sindji sera kutowera kwa lwangala, n'e mango sabaa sera sa mera sera kuuma kwa bushi kutalyi burongo. ⁷ E sindji sera kutowera mwa mihuyi, n'e mihuye yera kumera alauma nase n'e kusifunderesa. ⁸ N'e sindji sera kutowera kwa burongo bubuya, sera kumera, sera kubuta syuma eyana. Ne mango abaa atchilyi ateta ateta e byera era kuirusa e murenge era kuteta, e wete e matchi m'e kunva anonve. ⁹ E baanda baye bera kumu busa, ono mwanyi kulyi kuteta kutchiye? ¹⁰ Era kuteta, mwabwo mweresibwe e kumenyerera e mawe m'e bwami bwa Ongo; si kweyine e bandji kwa myanyi, ilyi nga kulola bata lola, nga kunva batw'onvaa. ¹¹ Nono mwanyikulyi kuteta batcha: E mbuto ulyi mwasi mwa Ongo. ¹² Bala sira s'e wofi n'e ndjira bubala bandju bende bw'onva e mwasi businda e musimu anesha kukula oyo mwasi mwa mitchima yabwo bangesha kuemera n'e kutchunguka. ¹³ N'e sira s'okwa lwangala, bubende bw'onva e mwasi wa Ongo kwa bushaaluke, nabwo batet'e misi, bubende beemera bishangi byeki n'e mango m'e kutangulwa bana kumbaala. ¹⁴ N'e sira satowera mwa mihuyi bubende bw'onva e myasi yaye si kweyine bana funderesibwa n'e nyifindjo y'e bikulo, n'e tchubuya buya tchw'e kalamo bata na tchiyikilyisa hyoshi hyoshi. ¹⁵ Ne sira satowera kwa burongo bubuya, bub'e mitchima yibuya bende bw'onva e mwasi n'e k'uyira, businda bende babuta e maree mwa kurembera. ¹⁶ Kutalyi e mundju ola wende wakoresa e kamore n'e kukahukira mwa bukere, si kweyine kukabika kwa meza, ilyi ebeengira mwa nyumba babw'one e bulangare bw'ako. ¹⁷ Kwa bushi kutalyi tchinwa tchabishirwe tchira tchita kabihulwe, ilyi lyira lyabishwaa lyira lyita kamenyekane n'e kuyikir'e kunalyi. ¹⁸ Mutchiloreresa ng'okwo mwonvire, kwa bushi e nyin'e kandju ak'eresibwa, n'ola utete kandju akanyayibwa kala abaa ete. ¹⁹ Bera kumuendera nyina na benye wabwo, si kweyine batalaa kumuyikilyira'kwo kwa bushi n'e lwamba. ²⁰ Era kureterwa e mwasi n'e kubirwa, nyoko na benye wenyu b'emangire e mbuwa bahonda mulolane'kwo nabwo. ²¹ Era kuhusa bala batchumwaa n'e kuba bira, " nyama ne banyeketchu u babano bonva e mwasi wa Ongo n'e kumuyira." ²² Kwera kuba lusiku luuma era kuyirukira mwa bwato n'e baanda baye, era kuba bira tchuna habuka e shilyisa s'e sibi bera ku simbwa mbira. ²³ Nabwo, e mango babaa bera baenda, era kuwondjira e tchulo. Kwera kuisha e kalaba mw'e sibi, e bwato bwera kutangira kwihul'e meshi, bera kuba mwa bisibu. ²⁴ Bera kumuendera, bera kumususa bera kuteta, Enawetchu, Mukulu, tchwasherere. Era kusuka, era kukalyira e kalaba n'etchusi the meshi, byera kuba sira; kwera kuba e boolo. ²⁵ Era kuba bira, e bwemere bwenyu ngaye bulyi? bera ku obowa, bera kusuka, bera kuimanga bera kubirana beyine kwa beyine, bera kuteta, yi nde onola, ne tchusi ne meshi nabyo bimukengire? ²⁶ Bera kuyika e shilyisa ly'e habuko ly'e Bagerasi, berekera e Galilaya. ²⁷ Ne mango aandalyire kw'e habuko, era kubuanana na mundju muuma wa m'oyo musi naye abaa alyi mw'e mbusi sibi, at'e mbalaa ndjimba, at'e kalaa n'omo nyumba, so kweyine kwa mashinda. ²⁸ E mango abwone ku Yesu era kulakanga, era kukumbala e muhondo saye, era kuteta kwa murenge munene, Tchiye nyete nawe Yesu mwana wa Ongo alyi kwa nguba? Nyi kuemire uta nyilyibusaa. ²⁹ Na Yesu era kukalyira era mbusi yi tenge m'oyo mundju; ilyi abaa ende ahwekwa n'e milyisi, n'e bureure; n'e kwisha ebye bifundo n'e kuhaira mw'e rungu n'e misi yeye mbusi yibi. ³⁰ Yesu era kumu busa, e sins lyawe u nde?Era kuteta e sina lyanyi nyi lubaa; kwa bushi sinene saba simulyi' mwo. ³¹ Esi mbusi sera kuengengeta Yesu ata sikabulaa mwa mwina. ³² Na aola aba alyi ngulube sa kera mwa ndjulungu; bera kumuengengeta ab'emerere bengire mwes'e ngulube. Era kubatchuma mwe sira ngulube. ³³ E mbusi sera kutenga oyo mundju sera kuya mwe sira ngulube, n'obo buso bw'e ngulube bwera kuandala lubiro bwera kuthihumisa mwa nyandja n'e kufira mwa meshi. ³⁴ E bangere e mango balolyire bera kuhaa bera kuenesa eye myasi mwa musi n'omo mahwa. ³⁵ E bandju bera kunaenda kulola e byayikilyire, bera kumuendera Yesu bera kulola kw'ola mundju watenga mw'e mbusi sibi alyi mwa maulu ma Yesu, eembere endjimba ete n'e myaanyisa have, bera ku obowa. ³⁶ Na bala babaa balolyire bera kubaanyikisa kula oyo mundju afumaa oyo wa hutchwaa n'e mbusi. ³⁷ N'e lubaa lw'e bandju b'e Geresi lwabaa e butambi bera kutchikumba ye abatenger'e mwabwo. Kwa bushi bayikirwa n'e bwoba bunene; Era kuya mwa bwato n'e kualuka. ³⁸ N'ola mundju watenga mw'e mbusi sibi era kumwema emere baende naye.Si kweyine yeke era ku mulaa n'e kumu bira, ³⁹ Alukaa mwa nyumba yawe uyilyis'e bisomerene Ongo akuyilyire. Era kuna tchiendera era kuyilyisa mwa musi woshi, ebisomerene Ongo amukorere. ⁴⁰ Na Yesu e mango aaluka emukundamano wera kumuangilyira kwa bushaaluke nabushi babaa bendjire bamulyinjira bwoshi. ⁴¹ Tchumbikisaa, mundju muuma era kwisha e sina lyaye ye Yairo, naye mundju mukulu we sinagogi, era kuna fukama mwa maulu ma Yesu, era kumuengengeta engire mwa mwaye; ⁴² Kwa bushi mwalyi waye alyi wofi kufa, oyo mwana muuma yeine yabaa anete wa myaka e kumi n'e bilyi. N'e mango abaa era enda elubaa lwera kumukumba. ⁴³ Na mukasi muuma Ola watenga mw'e mikira myaka ekumi n'e bilyi, Ola wabaa ulyibukire n'e kwana e bikulo byaye kwa bashake atalaa n'e kubukwa na mundju woshi, ⁴⁴ Era kuenda e nyuma saye era kuata kwa mukundjo w'e lutchimba lwaye; U nawo e kutenga mw'e mikira kwaye kw'era kunwoma. ⁴⁵ Yesu era kuteta nde Ola wanyi atchir'e kwo? E bandju bera kuakana, Petero era kumu bira, Enawetchu Mukulu munene, e emukundamano u kukundamanyir'e kwo n'e kukukumba. ⁴⁶ Yesu era kuteta, kulyi e mundju wanyi atchir'e kwo nabushi nalolyire e misi yanyitengire. ⁴⁷ Oyo mukasi alolyire afumire era kwisha akukuma era kufukama e muhondo saye era ku kumuanyikisa e muhondo s'e bandju bwoshi e tcha tchumaa amuata kwo Na kute afumaa kwa lyiuma. ⁴⁸ Era kumu bira, munyere e bwemere bwawe bwa kufumise, unaende n'e boolo. ⁴⁹ Mwa kuba endjire ateta binera era kwisha mundju atenga mwa nyumba ye sinagogi, era kumu bira mwalyi wawe afire mira uta lyibusaa mwalyimu. ⁵⁰ Na mango Yesu onvire ebyera, era kumu bira utabaa n'e bwoba. Wemer'e kulyi naye angafuma. ⁵¹ Ayikire mwa nyumba, ateemera mundju engira naye si Petero, n Yowana ne Yakobo n'Eshe woyo mwana ne nyina. ⁵² N'e bandju bwoshi babaa balyira n'e kuyira e mishibo. Era kuteta: "Mutalyiraa, ata fire si kweyine awondjire. ⁵³ Bera kumu shekera bisibu kwa bushi babaa bamenyire kw'elyisa afire. ⁵⁴ Era kumu simbira kwa kubwoko era kwirusa e murenge era kuteta, munyere sukaa, ⁵⁵ E mutchima waye era kumwalukira, unawo unawo era kun'emangaa. Era kuteta eeresibwe e bilyo. ⁵⁶ E babusi baye bera kusomerwa busibu si kweyine era kubaakanya batabira mundju kw'ebye byabere.