¹ Na kwa bushi Yesu abaa alyi wofi n'e nyandja y'e Genezareti, n'e mukundamano w'e bandju wera kumusongula ilyi bw'onva e mwasi wa Ongo, ² era kulola kwa musike w'e nyandja kulyi mato mabilyi, n'e bafubi mamwo babaa baandaere kuya kuhuka e tchusira tchwabwo. ³ Yesu era kwiruka mu buuma bwa mwo mato, na bu bwabaa bwato bwa Simoni, na era kumweema atchiberule burerere hitcha n'e tchitaka. Na businda era kwikala mwa bwato, n'e kutangira eyilyisa e mukundamano, ⁴ Na ilyi amala kuteta, era kubira Simoni: ''Mwende mwa kakatchi k'e nyandja mwandaas'e tchusira tchwenyu kwa kufuba. ⁵ Simoni era kumuhusa, n'e kumubira, ''Enawetchu, tchwakolaa e butchufu bwoshi kwa misi, busira kubwona kandju, si kwa mwasi wawe, naandasa e tchusira.'' ⁶ Na ilyi batchukabula, bera kutola efi sinene busibu kuyika e tchusira tchwabwo tchwera kutangira tchwabereka. ⁷ Bera kubalangira e bandji balyikabwo babaa balyi mwa bundji bwato, b'eshe kubaasa. Bera kwisha na bera kwihusa e mato mwombi kuyika m'era kutangira byenama. ⁸ E mango Simoni Petro, alolyire kw'ebye, era kufukama kwa maulu ma Yesu, n'e kuteta: ''Enawetchu, tenga era nyilyi bushi nyilyi munya byaa.'' ⁹ Kwa bushi asomerwaa alauma na bala bwoshi abaa nabwo, kurengera e lufubwo bayiraa. ¹⁰ Ku bya nabaa e mwa Yakobo ne Yoana, baala ba Zebedayo, bu babaa lushangi ne Simoni. Na batcha, Yesu era kubira Simoni: ''Ut'obwowaa, kutengera kulwarero ungaba mufubi wa bandju.'' ¹¹ Na ilyi bareka e mato era musike bera kureka byoshi, bera kumukulyikira. ¹² Na ilyi aba alyi mwa musi muuma, lolaa, kwabaa mundju muuma w'ehure bibenzi; naye ilyi alola ku Yesu, era kufukama, n'e kumweema era kuteta: ''Enawetchu, nga uhondjire wana nyitchesa.'' ¹³ Yesu era kulambula e kubwoko, era kumuata kwo, n'e kuteta: ''Nyihondjire, Utche.'' Unao e bibenzi byera kumutenga kwo. ¹⁴ Era kumulayilyira ata biraa mundju. Si era kumubira, ''Wende kutchilosa era mw'e mudjindji, waan'e nderekero y'e kutchesibwa ng'oko byaandjikibwaa ne Musa, ilyi ebyera bibabera buamilyisa.'' ¹⁵ Si kweyine, erenge ly'e myasi yaye lyera kulumira mwa tchiwo tchoshi, n'e bandju bendee besha bengi kumunvilyisa n'e kufumisibw e malwala manwo. ¹⁶ Si kweyine, end'aya mwa lukiya kwema. ¹⁷ Lusiku luuma Yesu eyilisaa. E Bafarisayo n'e beyilyisa b'e maano, bera kwikala wofi naye batengaa mu tchira musi w'e Galilaya, n'e Yudea, n'e Yerusalemu; n'e buashe bw'Enawetchu bwabaa alauma naye, kubafumya. ¹⁸ Na lolaa, e bandju bera kumuretera e mulwala kwa ndjingo, w'olyir'e binga; bera kuhonda e ndjira kumwingisa mwanda bamubik'e muhondo sa Yesu. ¹⁹ Na tchiro bata bwonaa andju e kumureta mwanda kwa bushi n'e mukundamano, bera kwiruka kwa burafo, bera kumurenza mwa matofalyi, n'e ndjingo yaye kuyik'e kakatchi e muhondo sa Yesu. ²⁰ Naye ilyi alola e bwemere bwabwo, Yesu era kumubira, ''U mundju, e byaa byawe byababalyirwe.'' ²¹ E baandjisi n'e Bafarisayo bera kuya bwaka n'e kuteta, ''N'nde ono walootchire?'' N'nde ungaala kubabalyira e byaa ata Ongo yeyine?'' ²² Si kweyine Yesu era kumeny'e ndanya sabwo era kuhusa, n'e kuba bira, ''Kute mutanyise mwa mitchima yenyu? ²³ Tchiye tchirembu kuteta, e byaa byawe bya babalyirwe ilyi kuteta 'Emuka wende?' ²⁴ Si kweyine, mumenyae okwo e mwana w'e mundju et'e buashe mwa butala e kubabalyira e byaa, ( abiraa ola wabaa w'olyir'e binga), ''Nyikubilyire, Emuka, emus'e ndjingo yawe, wende era mwawe.'' ²⁵ Unao, era kwimuka e muhondo sabwo na era kwimusa e ndjingo abaa awondjere kwo, era kuya e mwaye, mwa kutonga Ongo. ²⁶ Bwoshi bera kusomerwa, bera kutonga Ongo. Bera kwihula e bwoba, bera kuteta, ''Tchwalolyir'e bisomerene kulwrero.'' ²⁷ E nyuma s'ebye Yesu era kwiluka, era kubwona karanyi muuma e sina yaye yi Lawi, ekere ala bende balyipisisa e kolyi, era kumu bira, ''Unyikulyikire.'' ²⁸ Ne Lawi era kureka byoshi, era kwimuka era kumukulyikira. ²⁹ Ne Lawi era kumuyilyira Yesu e lyinye lyinene mwa mwaye. Na kwabaa mukundamano munene w'e bakaranyi, n'e bandji babaa balyi alauma nabwo. ³⁰ Si kweyine e Bafarisayo n'e baandjisi beke bera kuyongerwa e baanda baye, bera kuteta, ''Kwa bushi ne tchiye mwalyire n'e kumwa alauma n'e ba karanyi n'e besh'e byaa?'' ³¹ Yesu era kuteta, era kuba husa, ''E balyi misi bata tchaanyira mushake, si kweyine e balwala beyine. ³² Ndeshaa kubalangira e be kunalyi, si kweyine e besh'e byaa batchiundjuse.'' ³³ Bera kumu bira, ''Kwa bushi n'e tchiye e baanda ba Yoana bende bamina kengi kengi n'e kwema, na kunokwo e baanda b'e Bafarisayo, si kweyine e bawe bendjire balya n'e kumwa,'' ³⁴ Yesu era kuba bira, ''Mwana minyisa e baya nga muya mulume alyi alauma nabwo? ³⁵ Si kweyine, e siku sing'esha e mango muya mulume anga tenga era balyi na mw'ese siku mu baka mina e bilyo.'' ³⁶ Yesu era kuba bira muanyi muuma. ''Kutalyi mundju ola ungesha e lutchimba luyaya, abik'e tchiraka a ndonga s'e lutchimba lukulukulu, akayira batcha anga berenga e luyaya n'e tchiraka tch'e lutchimba luyaya tchita lyingamane n'olula lutchimba lukulukulu. ³⁷ Na kutalyi e mundju ola w'ende wabik'e mafu mayaya mwa ndaa sikulukulu, na nga anga bika e mafu mayaya manga berenga ese ndaa sikulukulu, n'e mafu mana sheshekala n'e ndaa sana sherera. ³⁸ Si kweyine, byeemire e mafu mayaya mabikibwe mwa ndaa siyaya. ³⁹ Na kutalyi mundju ungamwa e mafu ma mira, ahonde e mayaya, kwa bushi anga teta, ''E ma mira mu mabuya.''