¹ Ne Yesu era kuyihula emuka utchere, era kualuka kutenga mwa Yordani era kwekwa n;e Muka mweru ekwenda mwa lukiya, ² atangulwe n'e musimu kwa siku makumi mane. Na kwese siku atalya kandju, kwika siikilyire, ly'era onvaa ebusinya . ³ E musimu era kumubira: N'nga oyo ulyi mwana wa Ongo ubire lyine e'kolyi lyaluke mukate . ⁴ Yesu, era kuteta: byandjikirwe; mundju atangalama kwa mukate tchu, sikweyine kwa ngasi mwasi wa Ongo. ⁵ E musimu era kumwirusa e ndonga s'e ndjulungu ire, era kumulosa e mami moshi mwobuno butala kwa kahangi kauma. ⁶ E musimu era kumubira : Na kweresa oyo bunola buashe boshi; n'enyuutchu soshi ; sikweine n'eresibwe emwasi inera yoshi; n'emwaye ola nyihondjire na mweresa. ⁷ Sikweyine ungatchikumba nyono byoshi byaba bawe. ⁸ Yesu era kumuusa, era kumubira: tchiendere enyuma sanyi, musimu: "kwabushi byaandjikirwe, n'ngatchikumba Enawetchu Ongo wawe, na yeine u'ngamukorera". ⁹ Era kumulongolana kwika Yerusalema, era kumubika endonga se ndjulungu nguma ye kanisa, era kumubira: N'nga oyo ulyi mwana wa Ongo utchikabule ala ashi kutengera kweyine ndjulungu. ¹⁰ Kwabushi byaandjikire anga tchuma ba malaika baye bakw'angilyire; ¹¹ N'omwa kakatchi kw'emako mabo bakakuangilyira, ilyi utasitalaa emaulu mawe kwa makoyi. ¹² Ne Yesu era kumuhusa, era kumubira: byaandjikirwe uta tangulaa Enawenyu, Ongo wawe. N'e musimu era kumalyilyisa ematangulo mwoshi, era kutenga emwayi kwa bishangi. ¹⁴ Yesu era kualuka kwa misi y'e muka mweru kuyika e Galilaya: E myasi yaye y'era kuenda mwa kakatchi k'e tchiwo ebutambi bwoshi. ¹⁵ Naye era kuyilyisa mwa tchishagala tchabwo, era kutongibwa n'e bandju bwoshi. ¹⁶ Era kuika e Nazareti, aola abaa alyi kutengera oe butoto bwaye, era kuingira mwa tchishagala e lusiku lw'e sabato, ng;o kwo bwabaa bwoorere bwaye, era kuimanga n'e kusoma. ¹⁷ Era kueresibwa e tchitabu tch'e murebi Isaya. Ne mango abwoore e tchitabu era kulola ala baandjikire. ¹⁸ E muka mweru wa Ongo uly'e ndonga sanyi, kwa bushi anyishiyire emafuta nyiyilyis'e mwasi mubuya kwa bakene, kuyilyisa e butchunguke kwa bahweka, n'e myuta eyibwone, n'e kubooresa e bahwekibwaa. ¹⁹ Kuyilyisa e mwaka wa Ongo w'e meresibwaa. ²⁰ Era kuhweka e tchitabu, era kutchiyeresa e mulanzi era kuikala. N'e bandju bwoshi babaa balyi mwa nda s'e tchishagala bera ku mutomworera e meho. ²¹ Era kutanga e kubabira: ku lwarero luno lwaandjiko lwayikilyire kwa matchi menyu. ²² Bwoshi bera kuwamirisa bera na kusomerwa, e mwasi w'e lukoo w'e kutenga mwa bunu bwaye, bera kuteta: onola ata mwana wa Yusufu? ²³ Era kuba bira, e kunalyi, munga nyibiraono muanyi: mushaki, u tchifumye weyine: Ebye byoshi tch'wonvire wayilyire e kapernaumu, ubiyira anola muno tchiwo tchawe. ²⁴ Era kuteta: " E kunalyi nyiba birire mwabwo, kutalyi e murebi wende emererwa mwa tchiwo tchayi." ²⁵ Si kweyine na ba birire mwabwo, e bahumbakasi bengi babaa balyi mwa kakatchi k'e tchiwo tch'e Israeli e siku sa Eliya; e bihangi e mbingu s'a hwekwaa myaka e hatchu na myesi ndatchu, e businya bunene bw'era kuingilyira mwa tchiwo tchosi; ²⁶ si kweyine Eliya ata tchumwaa ku muuma wabwo, si kweyine kwa muhumbakasi muuma wabaa w'e kere mwa musi w'e Serepta mwa tchiwo tch'e Sidona. ²⁷ Na bengi bet'e bibenzi babaa balyi mwa tchiwo tch'e Israeli kwa bishangi by'e murebi Elisha, si kweyine kutalyi muuma mubwo watchesibwa; si kweyine Naamani mundju w'e suria. ²⁸ Nabwo bwoshi babaa balyi mwa Sinagogi bera kuihula e bute mwa kuunva ene myasi. ²⁹ Bera kuenda bera kumueka era mbuwa s'e musi, kuyika kwa businda bw'e ndjulungu yira babaa bawobakir'e kwo ilyi babwona kwa ba mukabula er'a shi. ³⁰ Si kweyine, yeke era kurenga mwa kakatchi kabwo era kutchiendera. ³¹ Era kuandalyira e kapernaumu mwa musi w'e Galilaya era kuyilyisa e lusiku lw'e sabato. ³² Bera kusomerwa kwa meyilyisa maye, kwa bushi e mwasi waye wabaa wet'e bwashi. ³³ Mwa Sinagogi mwabaa mulyi mundju w'ete mbusi yibi, era kulakanga busibu. ³⁴ Eeh! Mwasi mutchiye tchw'e te nawe Yesu w'e Nazareti? Weshire ku tchusheresa? Na menyire kwa ulyi mutchesibwa wa Ongo. ³⁵ Yesu era kumukalyira: Usire, u muteng'e mwo. Neye mbusi yibi yera kumukinda mwa kakatchi kabwo, yera kumutenga' mwo busira kumwanza. ³⁶ Bwoshi bera kusomerwa bera kusimirana bera kuteta: Mwasi mutchiye onola: kwa bushi, kwa buwashe akalyilyira e mbusi sibi nase sa kunatenga. ³⁷ E myase yaye yera kuenera e nyande soshi mw'etche tchiwo. ³⁸ Era kutenga mwa sinagogi, era kuingira mwa nyumba ya Simeoni. Ne nasala abaa asimbirwe n'e shushira lyikalyi; bera kumubira e ndonga saye. ³⁹ Era kuimanga e butambi saye era kukalyira elye shushira lyera kufuma. Kwa lyiuma era kuimuka era kumukorera. ⁴⁰ Ilyi e wolo lyayika ebandju bwoshi babaa bet'e ndjwala sa ngasi lubero bera kubaha er'a lyi, naye era kubika e mabwoko maye ku ngasi muuma era kuba fumya. ⁴¹ E mbusi sibi sera kubateng'a mwo, bera kulakanga kwa mirenge yabwo n'e kuteta:" Woyu u Kristo, mwana wa Ongo." Naye era kubakalyira busira kubawe e bihangi batete na bushi bamenyaa ku ye Kristo. ⁴² Na abere bwatchwa, era kuenda, era kuya ala bandju batalyi; n'e makundamano m'e bandju m'era ku muhonda honda, bera kuya era alyi, bera kuhonda kumu bira ata tchitengaa era balyi. ⁴³ Era kuba bira: "Bi nyeemire nyiyilyis'e mwasi w'e bwami bwa Ongo mwa indji misi; kwa bushi kwene myasi kuna tchumirwe. ⁴⁴ Ende eyilyisa mwa ma sinagogi m'e Galilaya.