¹ Mwa mwaka w'e kumi na katanu w'e kwima kwa Tiberia Kaisari, Pontio Pilato abaa mwami w'e Yudea, ne Herode, mutambusi w'e Galilaya, ne mwenyewabwo Filipo, mutambusi w'e Iturea n'e w'e tchiwo tch'e Tarakonite, n'e Lisania, mutambusi w'e Abilene. ² Ana ne Kayafa, babaa badjindji bakulu, e mwasi wa Ongo era kwisha e mwa Yoana, mwana wa Zakaria, mwa lukiya. ³ Era kuyika mwa tchiwo tchoshi tchilyi e musike w'e Yordani, endee eyilyisa e bubatiso bw'e butchuundjuse kwa kubabalyirwa e byaa. ⁴ Ng'okwo byaandjikirwe mwa tchitabo tch'e myasi y'e murebi Isaya: ''Murenge w'e mundju walyira mwa lukiya, mulyingamanye e ndjira s'Enawetchu, mukubule ala akarenga. ⁵ Ngasi mbinga engehusibwa, na ngasi ndjulungu n'e muruko, bikaandaasibwa, e ndjira sitchionyire sika kubulwa, n'e ndjira s'ilyi mw'e byomo byomo singalyingamana. ⁶ N'e bwoshi bet'e mubilyi baka bwona e butchunguke bwa Ongo. ⁷ Yoana era kubira e mukundamano wa bala bamushimbaa babatisibwe naye, '' Mu tchibutchi tch'e ndjoka, N'nde wabaana mwabwo e kushaa e busheresi bukesha? ⁸ Batcha, mwere mwabuta e maree mashingenene n'e mababalyire, ilyi mutatetaa mwa mitchima yenyu: 'Twete Tata wetchu Abrahamu,' kwa bushi nyiba bilyire mwabwo okwo mwa mano makoyi Ongo anakulyi mwo Abrahamu e bana. ⁹ Na batcha, e mbaha yera yi bikirwe e masina m'e mutchi. Na ngasi mutchi ola uta butchir'e maree mabuya uka kondjwa n'e kukabulwa mwa mulyiro.'' ¹⁰ N'e bandju bera kumubusa, bera kuteta: ''Batcha, kute tchuyirae?'' ¹¹ Era kuhusa, era kuba bira: ''Ola w'et'e ndjimba e bilyi, erese ola ut'ete, n'e w'et'e bilyo ayire kunokwo.'' ¹² Na, e bakaranyi bera kwisha, babatisibwe, bera kumubira: ''Mwiyilyisa, kute tchuyirae?'' ¹³ Naye era kuba bira: ''Mutalyipisaa kandju kulusha ebye mwemererwe.'' ¹⁴ N'e basula nabwo bera kumubusa, bera kuteta, ''Netchu kute tchuyirae?'' Era kuba bira: ''Mutababasaa tchiro n'e mundju muuma, mutahobeekaa e undji kwa bisha, kandji mushaalukire e lwembo lwenyu.'' ¹⁵ Nabwo bandju, bera kulyindjira, n'e bandju bwoshi bera kutanya e myasi ya Yaona mwa mitchima yabwo, nga yi Kristo. ¹⁶ Yoana era kuhusa, era kuba bira bwoshi: Nyono nyiba batisise kwa meshi, si kweyine muuma eshire e nyuma sanyi, ola wet'e misi kunyilusha, ndashinganene kubwoola e milyisi y'e birato byaye. Yi unga babatisa kwa muka mweru n'okwa mulyiro.'' ¹⁷ E lwelyi waye lulyi mwa maboko maye, naye akatchesa e sunzu lyaye, aka kundamanya e mbuto sibuya n'e kusibika mwa ngulyi yaye, si kweyine akasiresa e bifufu kwa mulyiro utaka sima.'' ¹⁸ N'okwo maano mengi,era kuyilyisa e bandju bengi. ¹⁹ Si kweyine, Herode mutambusi era kukalyiyirwa naye kwa mwasi wa Yerodia, muka Filipo mwenye wabwo, n'okwa mabi mwoshi Herode akolaa, ²⁰ era kuhula ono mwasi kwa yindji myasi yoshi, era kuhweka Yoana mwa buroko. ²¹ Na ily'e bandju bwoshi babaa babatisibwe, na Yesu era kubatisibwa, era kwihula muka mweru n'e kwema, e mbingu sera kwiukala, ²² n'e muka mweru era kwandaala e ndonga saye kwa shushanyo y'e mubilyi nga ngulyimba, n'e murenge era kuteng'e mbingu n'e kuteta: ''Woyo u mwana wanyi musimwa, nyisimisibwe naye.'' ²³ N'e mango Yesu yeyine atangiraa eyilyisa, abaa er'ete wofi myaka makumi mahatchu, bamutanyisaa kuba muala wa Yusufu, wa Eli, ²⁴ wa Matari, wa Lawi, wa Melki, wa Yana, wa Yusufu, ²⁵ wa Matatia, wa Amosi, wa Nahumu, wa Esili, wa Nage, ²⁶ wa Matatia, wa Simei, wa Yusufu, wa Yuda. ²⁷ wa Yoana, wa Resa, wa Serubali, wa saltieli, wa Neri, ²⁸ wa Melki, waAdi, wa Kosamu, wa Elmadamu, wa Eri, ²⁹ wa Yose, wa Eliezeri, wa Yorimu, wa Matata, wa Lawi, ³⁰ wa Simeoni, wa Yuda, wa Yosefu, wa Yonamu, wa Eliakimu, wa ³¹ wa Melea, wa Menana, wa Matata, wa Natana, wa Daudi, ³² wa Yese, wa Obedi, wa Boazi, wa Salmoni, wa Nasoni. ³³ Wa Aminadabu, wa Aramu, wa Esinoni, wa Peresi, wa Yuda, ³⁴ wa Yakobo, wa Isaka, wa Abrahamu, wa Tera, wa Hori, ³⁵ wa Serugu, wa Reu, wa Pelegi, wa Eberi, wa Sela. ³⁶ wa Kainana, wa Arufaksadiki, wa Semu, wa Noa, wa Lameki, ³⁷ wa Metusela, wa Enoka, wa Yaredi, wa Mahaleli, wa Kainana, wa Enosi, wa Seti, wa Adamu wa Ongo.