¹ Mwesi siku Kaisari Ogisto ye waba wemire era kukula eteeko ebandju bwoshi mwa butala batchiandjikise. ² Okwo kutchiandjikisa kutanzi kwabaa emango Kirenio abaa emire e Shamu. Nangasi mundju byeema aye kutchianjikisa mwa musi waye w'e bubutchwa. ⁴ Yusufu naye era kwiruka kutenga e Galilaya mwa musi w'e Nazareti, nabushi abaa alyi w'omwo nyumba, n'omwo mulala wa Daudi, ⁵ ilyi atchiandjikise bu na Maria mwirakasi wye, naye abaa et'e simi. ⁶ Namo mango babere bera balyi awola, etchihangi Maria anga butchire natchayikilyira, ⁷ naye era kubuta emwala y'e fula yaye. Era kumwimbasa endjimba s'e butoto n'e kumwondjisa mwa tchiranga tche ngafu, na bushi bata bwona etchisiki mwa nyumba y'e baenyi. ⁸ Kwaba kunalyi, e bangere bendjire beesa balanga e buswo bw'e bifana. ⁹ Na, lolaa malaika w' Enawetchu era kubatengera, n'e bulangare bw'Enawetchu bwera kubalomekera. Bera mw'e tchoba tchinene. ¹⁰ Si kweyine malaika era kubabira: muta obaa; na bushi nabaretere emwasi mubuya buya na wa bushaaluka era mw'e bandju bwoshi. ¹¹ KU kulwarero mwa musi wa Daudi abutchirwe nabushi n'enyu e Mununusi, ye Kristo, y'Enawetchu. ¹² Na, munalola etchimenyeso munga menyerera'kwo: Munga bwona: e mwana embasibwe endjimba s'e butoto ana wondjisibwe mwa tchiranga tch'e ngafu. ¹³ Mwetchi tchishangi tchinetchi tchinene tch'e bamalaika na tcha tchihuta kw'oyo malaika mutanzi, n'e kutchikumba Ongo n'e kuteta: ¹⁴ Lumoo era mwa Ongo mwa mbingu, n'e mutchula mwa butala e kakatchi k'e bandju bwoshi bala atchisaa! ¹⁵ Na mango bamalaika babere babatengire' kwo kualaka e mbingu, ebangere bera kutangira babusanya beyine kwa beyine: Tchunaenda e Bethelehemu, na tchubwone tchiye tcha bere, tchino Enawetchu atchumenyesise. ¹⁶ Kubana endjire lubiro, n'e kubwona ku Maria na Yusufu, n'e kabondjobondjo kwondjisibwe mwa tchiranga tch'e ngafu. ¹⁷ Ne nyuma s'e kumubwona kwo, bera kuwanyikisa bira babiribwa era ndonga s'e mwana. ¹⁸ Na bwoshi bala babawonvirisa bir'e bangere bateta bera kusomerwa. ¹⁹ Maria abaa ende alanga ebi byoshi n'e kubihubanganya mwa mutchima waye. ²⁰ N'e bangere bera kuhubanganya n'e kutchikumba alauma n'e kutonga Ongo kwebye byoshi bwonvaa n'e kubwona kwo, byabaa bina shingenene n'e bira baabiribwa na malaika. ²¹ E lusiku lwa munane, luna lusiku emwana angeekirwe kwishibwa, lwera kwika bere kumweresa esina lya Yesu, elyi lyin'e sina malaiak atetaa elyi atana kuya mwa bula bwa nyina. ²² Na, emango e siku sabwo s'e kutchitchesa sayikilyire, kushingana n'' mateeko ma Musa, Yusufu na Maria bera kumueka e Yerusalemu aemerwe, ²³ kushimbana n'e bye byaandjikirwe mwa mateeko m'Enawetchu: ngasi mubutchwa mutanzi w'e mutabana atchesibwaa e mbere s'Enawetchu, ²⁴ n'e kuterekera ngulyimba ebilyi, na ngoko emateeko m' Enawetchu matetchire. ²⁵ Na, munalolaa, omwo Yerusalemu mwabaa mundju muuma ye waamarwe Simeoni. Oyo mundju anabaa w'e kunalyi n'e ukengere Ongo, naye abaa alyindjira e bushishilyisi bw'e Israeli, ne muka mweru abaa alyi era ndonga saye. ²⁶ Naye aanulwa n'e muka mweru kute ata kafe embere atasa ku bwona ku Kristo w'Enawetchu. ²⁷ Naye era kuya kwa mu kanisa, akululwa n'e muka mweru. Na, ngoko ebasere bareta e kabondjobondjo Yesu ayirwe ngoko e mateeko matetchire, ²⁸ era kumuangilyira mwa mabwoko maye, n'e kutonga Ongo n'e kuteta: ²⁹ Rero, Nawetchu, ungera wareka e mukosi wawe aende n'e bwolo, kushingana n'e mwasi wawe. ³⁰ Nabushi e meho manye mabwone kwa bununusi bwaye , ³¹ E bununusi bula wa kunganya kwa bandju bwoshi, 32 Ebulangare bw'e kulomeka enyibaa soshi, n'e ngulu y'e Israeli, elubaa lwawe. ³³ Eshe waye ne nyina babaa bete lumoo lunene e ndonga s'e myasi bende bateta bushi naye. ³⁴ Simeoni era kubayisha, n'e kubira Maria, nyina wa Yesu: lolaa, onwo mwana aamerwe e kwandasa n'e kuyimusa bengi mwa Israeli, n'e kuba tchimenyeso tch'e kutwonvikana, ³⁵ na nekwo weyine, kamba kaka kusheshemera mwa mutchima, elyi e ndanya s'e mitchima yingi sibihukule. ³⁶ Na kandji kwaba kunalyi murebi wa mukasi, e sina lyaye Ana, mwalyi wa Fanuweli, w'omwo tchifunga tcha Asheri. Abaa anera mukulu ne amala myaka elyinda n'e ba waye kutengera e bukumi bwaye. ³⁷ Ashibire muhumbakasi era an'ete myaka makumi munane n' ene, abaa atatchitenga mwa kanisa, n'e kukorera Ongo e butchufu n'e mushi mwa kanisa n'e kwema. ³⁸ Omwo kwika kwaye, naye mwetcho tchihangi, era kwanza atonga Ongo, n'e kuanyikisa emyasi ya Yesu kwa bala bwoshi babaa balyindjira e bununusi bw'e Yerusalemu. ³⁹ Ne mango bamalyire kuyira ngoko e mateeko m'Enawetchu matetchire. Y usufu na Maria bere kualuka e Galilaya, mwa Nazareti, ye musi wabwo. ⁴⁰ N'okwo emwana aenderera kukula n'e kwate emisi. Abaa eehure n'e bwenge, n'e lukoo lwa Ongo lwabaa era ndonga saye. ⁴¹ Ebasere baye bende baya tchira mwaka e Yerusalemu, kwa karamu k'e Pasaka. ⁴² Ne mango abaa ete myaka ekumi n'e bilyi bera kwiruka, kushinganana n'e kanya k'e karamu. ⁴³ Businda e mango e siku s'a baa sa rengire ne byabaa byemire bafuluke, e mwana Yesu era kushiba e Yerusalemu. Eshe ne nyina tchiro batamenyaa. ⁴⁵ Si kweyine babere bata mubwon'e kwo, bera kualuka e Yerusalemu. ⁴⁶ Era nyuma sa lwendo lwa siku ehatchu, bera kumushinganana mwa kanisa eekere ala kakatchi k'e beyilyisa, ete abwonvilyisa n'e kubabusa. ⁴⁷ Bwoshi bende bamuunvilyisa bera kusomerwa n'e bwenge bwaye alauma n'e mahuso maye. ⁴⁸ Ne mango e basere baye bamubwon'e kwo bera kusomerwa,ne nyina era ku mubira: Mwana wanyi, bushi natchiye watchuyirilyire batcha? U lolaa Eho ne nanyi, tchwa kuhonda n'e tchifufu. ⁴⁹ Era kubabira: Tchiye tchaba tchatchuma mwanyihonda? Mwabaa mutamenyire okwo binyeemire ekuba mwa nyumba ya tata? ⁵⁰ Si kweyine batoonva tchira aba biraa. ⁵¹ Businda era kuandala alauma nabwo kuya e Nazareti, ne era kutchiandasa e muhondo sabwo. Na nyina alangaa ebye byoshi mwa mutchima waye. ⁵² Ne Yesu ende akula mwa bwenge, mwa tchima, n'omwo lukoo, era muhondo sa Ongo ne muhondo s'e bandju.