¹ Kwabushi bandju bengi babika emaboko mabo kukubula emyasi era yaikilyire ekakatchi ketchu. ² Ngabala babaa kutengera emutangiro, baamilyisa na bakosi boyo mwasi. ³ Nera kulola kulyi kubuya, kwabushi nashimbaa emyasi yekunalyi ya byoshi kutengera emutangiro, ilyi ni kuandjikiraa ekukulyikirene , Teofilo, mukengwa. ⁴ Ilyi umenyaa ekunalyi kweye myasi w'eyilyisibwaa. ⁵ Miramira mwa siku sa Erode, mwami w'ebayaudi kwabaa mudjindji muuma esina lyaye Zakariya, omo lubaa lwa Abiya,n'emukaye esina lyaye Elizabeti. ⁶ Nabo bombi babaa be kunalyi emuhondo sa Ongo, ⁷ Nabo bataba bete mwana, kwabushi Elizabeti ya baa ngumba, nabombi babaa bera bangumwa busibu. ⁸ Ilyi abaa endjire aira emukolo we budjindji mwa ndondekanyi y'emukolo waye emuhondo sa Ongo, ⁹ ngoko bwabaa botere bwe budjindji, era kuhombolwa, kwingira mwa kanisa k'Enawetchu koocha e uvumba. ¹⁰ Ne mukundamano woshi w'ebandju babaa embuwa mwa memi ebishangi byekotcha euvumba ¹¹ N'e malaika w'Enawetchu era kumubonekera , era kwimanga etchande tch'ekulyo kw'e bushenge bw'e kuotchera euvumba. ¹² Zakaria era kuoboa mwa kumulolako . ¹³ Malaika era kumubwira: ''utobowa Zakaria, kwabushi ememi mawe mwonvirwe, ne mukawe Elizabeti anga kubutchira emwana w'ebutabana, na ungamubalangira mw'esina la Yoana''. ¹⁴ N'nawe ungaba n'ebushaaluke ne lumoo, nabengi bangashaalukira ekubutchwa kwaye. ¹⁵ kwabushi angaba mukulu emuhondo s'Enawetchu, naye atakamw'e mafu, na ak'ehusibwa muka mweru, kutengera mwanda sa nyina . ¹⁶ Na akaalula banene mwa bana b'e Israeli emwa Ongo wabo. ¹⁷ Naye akaenda emohondo sa Ongo ehure muka mweru ne misi ya Elia, ne kwalula emitchima ye batata emw'ebana babo,n'ekualula ebahoma eko bwenge bwo kunalyi , kubuana akubure ebandju emw'Enawetchu. ¹⁸ Zakaria era kubira malaika, nyono kute nyingamenya ono mwasi? kwabushi nera muhosi n'esiku sa mukanyi sera singi. ¹⁹ Malaika era kumuhusa, era kumubira: '' nyono ny'i Gabrieli, nyende n'emanga e muhondo sa Ongo, na tchumirwe nyikubire ene myasi yibuya. ²⁰ Na, lolaa, wera wabaa katchuma, utangatchala kuteta, kuika elusiku eye myasi ikaikilyira kwabushi n'ekuteemera e myasi yanyi, neye myasi ingaikilyira kwa bishangi byaye. ²¹ Nabo bandju bende balyindjira Zakaria, bera kusomerwa n'ekwilyisa kwaye mwa kanisa. ²² Na ilyi eeluka atatchalaa kuteta nabo bera kumenya kwa abonekerwe; mwa kanisa, naye era kubahaanyisa ekuboko, era kuba katchuma. ²³ Esiku saye s'e mukolo ilyi sa ikilyira era kuya emwaye. ²⁴ Na,enyuma s'ese siku mukaye Elizabeti era kwek'esimi, era kutchibisha myesi etanu era kuteta: ²⁵ Batcha kw'Enawetchu anyiilyilyire sine siku ilyi akula ehonyi emuhondo se bandju. ²⁶ Mwesi wa ndatchu, malaika Gabrieli era kutchumwa n'e Ongo mwa musi w'e Galilaya, wabalangirwe Nazareti, ²⁷ emwetchikumi tchabaa tchibarangirwe Maria. ²⁸ Malaika era kuya emwaye n'ekuteta: '' Nakulamusise uweresibwe elukoo, Enawetchu alyi alauma nawe woyo wayishirwe e kakatchi k'e bakasi bwoshi.'' ²⁹ Naye era kutchianyisa busibu kwabushi n'ono mwasi, era kutanya mwa mutchima waye: "Kunyilamusa kwa tchiye kuno? " ³⁰ Malaika era kumubira , " ut'obwowaa Maria, kwabushi wabwen'e lukoo e mwa Ongo. ³¹ Lolaa, ung'eka esimi , ungabut'e mwana, unga mubalangira esina lyaye Yesu. ³² Onola angaba mukulu, angabalangirwa mwana wa Ongo uly'e ndonga, na Enawetchu Ongo angamuwa etchifumbi tch'eshe Daudi; ³³ Angatambula e nyumba ya Yakobo e myaka yoshi, n'e bwami bwaye butakaba na businda. ³⁴ Maria era kubira malaika: "Kute kwo ono mwasi ungaba ndete na mulume?" ³⁵ Malaika era kumuhusa, era kumubira: " E muka mweru angesha era ndonga sawe, n'e misi ya Ongo uly'e ndonga ingakubika kw'e tchimbusa, kwabushi tchira tchinga butchwa tchinga balangirwa tchitchere, mwana wa Ongo. ³⁶ Nalolaa, Elizabeti, w'e mulala wawe et'e simi lya mwana wabutabana mwa bu'ekulu bwaye, n'nono u mwesi waye wa ndatchu yi wabalangirwaa ngumba. ³⁷ Kwabushi kutalyi mwasi ataalyikene e mwa Ongo. ³⁸ Maria era kuteta; " nyono mukosi w'Enawetchu, binabaa era mwanyi ngokula emwasi wawe, malaika era kutenga era mwaye. ³⁹ Maria era kwenda mwes'e siku era kuya mwa kakatchi k'e tchiwo tch'e miruko lubiro kuyika kwa musi muuma w'e Yudea. ⁴⁰ Era kuingira mwa nyumba ya Zakaria, era kulamusa Elizabeti. ⁴¹ Emango Eizabeti oonvire emusingo wa Maria, emwana era kuuluka mwa nda saye; Elizabeti era kuyihusibwa e muka mwero. ⁴² Era kuyirusa emurenge waye kwa misi era kuteta: waayishibwe mwa kakatchi k'e bakasi, na, ebuta ly'e nda yawe lyaayishibwe. ⁴³ Ono mwasi ngaye wa atengire? nyina w'Enawetchu eeshire era mwanyi? ⁴⁴ Kwabushi, lolaa, emurenge w'e musingo wawe w'engira mwa matchi manyi, emwana era kuulukauluka mw'e nda sanyi. ⁴⁵ Maria era kuteta: Erayi lyiola w'emere; kwa bushi e myasi ene atetaa Enawetchu yinga yikilyisibwa. ⁴⁶ Emutchima wanyi wamutongire Enawetchu. ⁴⁷ N'e mutchima wanyi washaalukilyire Ongo mutchungusi wanyi. ⁴⁸ Kwabushi alolyire eburembu bw'e mukosi waye; kwabushi lolaa, emilala yoshi inga nyibalangira erayi. ⁴⁹ Kwabushi ola nyin'e misi anyikorere ebiyiro bikulu. Na esina lyaye lyilyi lyitchesibwa. ⁵⁰ Na, elukoo lwaye lulyi ala ndonga sabwo bala bamwobwoyire, kutengera emilala n'e milala. ⁵¹ Akolyire busibu kwa kuboko kwaye, ashandabanyise bala bende batchitonga mwa kakatchi k'e ndanya s'e mitchima yabwo. ⁵² Aandasise ebakulu kwa bifumbi byabwo, era kwirusa ebarembu. ⁵³ Ebalyi businya abeusise n'e bindju bibuya, ebesh'e bimulo abahuunzise maboko buha. ⁵⁴ Atabaare emukosi waye Israeli. Akenger'e lukoo lwaye. ⁵⁵ Ngokula abira batata betchu. Abrahamu n'e milala y'e myaka n'e myaka. ⁵⁶ Maria era kuyikala naye myesi ehatchu, era kufuluka era mwaye. ⁵⁷ Tchiro Elizabeti emango ekashangi k'e kubuta kayikilyiraa, era kubuta mwana wa butabana. ⁵⁸ Ebalungu n'e milala yaye bera kunva kute kw' Enawetchu amwihulyira elukoo lwaye; bera kushaaluka alauma naye. ⁵⁹ Elusiku lw'e munane bera kw'i sha emwana bera kumu balangira Zakaria ng'e sina ly'e she. ⁶⁰ Nyina era kuhusa, ata batcha; si kweyine anga balangirwa Yowana. ⁶¹ Bera kumubira: " kutalyi emundju mwa lubaa lwawe, waamaerwe kw'e ly'e sina." ⁶² Bera kubusa esina lyitchiye lyi uhondjire kueresa emwana. ⁶³ Era kwema bamuretere etchibao tch'e kuandjikira, era kuandjikir'a kwo n'e kuteta: " e sina lyaye yi Yowana." Bwoshi bera kusomerwa. ⁶⁴ Kwa lyiuma ebuno bwaye bw'era kubwokala n'e lulyimi lwaye nalwo, era kuteta n'e kutonga Ongo. ⁶⁵ Ebwoba bw'era kuya mwa bala bwoshi baaba balyi alauma nabwo; n'nene myasi yoshi y'era kulumilyira mwa tchiwo tchoshi tch'e ndjulungu s'e Yudea. ⁶⁶ Nabyoshi bw'onva, bera kubibika mwa mitchima yabwo, bera kuteta: " Onola angaba mwana mutchiye? Kwa bushi e kuboko kw'Enawetchu kwabaa alauma naye. ⁶⁷ Zakaria, eshe, era kuihusibwa e muka mweru; era kureba n'e kuteta, ⁶⁸ " akusibwe Enawetchu Ongo w'e Israeli, kwa bushi eeshire e mw'e bandju baye n'e kubatchisa." ⁶⁹ Atchwimusisise embe ly'e butchunguke mwa kakatchi k'e nyumba y'e mukosi waye Daudi; ⁷⁰ N'ngoko atetaa kwa bunu bw'e barebi baye batchesibwa, baaba kutengera emutangiro. ⁷¹ Ilyi tchufumisibwa kut'e ng'e mwe bahombanyi betchu n'omwo maboko mabala boshi batchuayire: ⁷² Ekuyilyira batata ebwondjo, n'e kukengera e tchiraane tchaye tchitchesibwa; ⁷³ Etchilapo tchira abira tata wetchu Abrahamu. ⁷⁴ Okwo akatchueresa e kutchunguka kutenga mwa maboko m'e bahombanyi betchu, ilyi tchu tchikumbaa ye busira bwoba. ⁷⁵ Mwa kakatchi k'e butchesibwa, n'e kunalyi emuhondo saye, e siku soshi s'e kalamo ketchu. ⁷⁶ Nawe, u mwana ungabalangirwa murebi wa Ongo ulyi era ndonga; kwa bushi unga hondola e muhondo s'Enawetchu, e kukubula enjira saye; ⁷⁷ Ekubira ebandju baye ebutchunguke mwa kubabalyirwa ebyaa byabwo. ⁷⁸ Kwa bushi n'eburembu n'e bondjo bwa Ongo wetchu mwa bulangare bwa tengir'e ndonga kutchuyikira, ⁷⁹ Ekumworekera ebekere mwa musimya n'omwo mbololo y'e lufu, n'e kulongolana emaulu metchu mwa ndjira s'e bwolo. ⁸⁰ Oyo mwana era kukula, era kwihula misi mwa mutchima, na, abaa e andju ala atabaa bandju kwika e lusiku lw'e kwilukira kwaye ku Israeli.