¹ Lwabaa lusiku luuma lw'e Sabato Yesu era kurenga mwa mahwa m'e ngano; e baanda baye bera kuumbula e masuke m'e ngano, e nyuma s'e kumatokola mwa maboko mabwo. ² N'e bandji b'e bafarisayo bera kuba bira: ''Kwa bushi n'e tchiye mwayilyir'e bitashingenenekuyirwa e lusiku lw'e Sabato?'' ³ Yesu era kuba husa era kuba bira: ''Mutasomaa e myasi era Daudi ayiraa e mango abaa businya ye, na bala abaa alauma nabwo? ⁴ Kute kula e ngiraa mwa nyumba ya Ongo, era kutol'e mikati era banaa ndjulo e mwa Ongo, era kuyilya, era kweresa na bala bandju babaa alauma naye, e mikati yita baterene kulya si e badjindji beyine?'' ⁵ Era kuba bira: ''Emwana w'e mundju yi naano w'e Sabato.'' ⁶ Lwera kuyika lundji lusiku lw'e Sabato Yesu era kwingira mwa sinagogi na era kwiyilyisa. Mwabaa mundju muuma e kuboko kwaye kw'e kulyo kw'olyire. ⁷ E baandjisi n'e ba Farisayo bera kumuloreresa, balole ilyi anga fumya e lusiku lw'e Sabato, lyi babwona kwa bamushitaka. ⁸ Si kweyine era kumenya e ndanya sabwo, era kubira oyo mundju w'e kuboko k'olyire: ''Emuka, wimange mwa kakatchi.'' Era kwimuka, era kwimanga. ⁹ Yesu era kuba bira, ''Naba busa mwasi muuma; bishingenene kuyira e mabuya ily'e mabi e lusiku lw'e Sabato, kutchungula e mutchima ilyi kwita?'' ¹⁰ Era kuba tchumbikisa bwoshi e nyunda soshi, era kubira oyo mundju, ''Lambula e kuboko kwawe.'' Era kuyira batcha, e kuboko kwaye kwera kufuma, kwera kuba kuuma uma ng'e kundji. ¹¹ Nabwo bera kwihul'e bute busibu, bera kusimirana kute kwa bamuyiraa. ¹² Kwabaa mw'ese siku era kuenda kuya kwema kwa ndjulungu, era kwisa e butchufu bwoshi mwa kwema Ongo. ¹³ N'e mango abere tchera tchikira mushi era kubalangira e baanda baye, era kuhombola e kumi na babilyi mwa kakatchi kabwo era kubabalangira ndjumwa. ¹⁴ Simoni ola wabalangirwaa esina lyaye lya kabilyi Petro, ne Andrea mwenye wabwo, ne Yakobo ne Yoana, ne Filipo ne Bartolomayo, ¹⁵ ne Matayo, ne Tomaso, na Yakobo wa Alfayo, ne Simoni ola ubalangirwe Zeloti, ¹⁶ ne Yuda wa Yakobo ne Yud Iskariote yi wa mwanaa. ¹⁷ Era kuandaala alauma nabwo era kwimanga adju ala alambaatene, alaumw n'e baanda baye bengi n'e mukundamano munene w'e bandju batengaa e Buyaudi bwoshi n'e Yerusalemu e musike s'e Tiro n'e Sidoni beshaa kumunvilyisa n'e kufumisibwa e ndjwala sabwo. ¹⁸ Na bala babaa balyibusibwe n'e mbusi sibi bera kufumisibwa. ¹⁹ Na, e mukundamano woshi wabaa u hondjir'e kumuata kwo kwa buashe bwendee bwamutenga kwo n'e kufumy'e bandju. ²⁰ Yesu era kwimus'e meho era kutchumbikisa e baanda baye, era kuteta: ''Erayi lyenyu mu mulyi bakene, kwa bushi e bwami bwa Ongo bulyi bwenyu. ²¹ Erayi lyenyu mu mulyi businya kwa bushi muk'euta. Erayi lyenyu mu mwa lyira kwa bushi muka shaaluka. ²² Erayi e mwenyu e mango e bandju baka baaya n'e kuba berula n'e kubakambausa n'e kuba kabulyira esina lyenyu era mbuwa nga musi mwasi mubi kw'e sina ly'e mwana wa Adamu. ²³ Mushaalike olo lusiku n'e kuhama hama kwa kuba, lolaa e lwembo lwenyu lulyi lunene era mbingu, kwa bushi b'eshe wabwo batchindjibusaa e barebi kunoko kunoko. ²⁴ Si kweyine, e bwanya bwenyu mwabwo mu mwet'e bikulo kwa bushi mwabwene mira e bushishilyisi bwenyu. ²⁵ E bwanya bwenyu mu mweutchire, kwa bushi mukaba n'e businya. Ebwanya bwenyu mu mwasheka kwa bushi mukaba n'e mishibwo n'e kulyira. ²⁶ E bwanya bwenyu mu bandju bwoshi e mango baka batonga kwa bushi beshe bakoreraa e barebi b'e bisha e bilyi ng'ebye. ²⁷ Si kweyine, nyiba bilyire mwabwo mu mw'onvilyisa, musime e bahombanyi benyu, muba korerer'e mabuya bala baba hombire mwabwo. ²⁸ Muyishe bala bendjire babatakira, mwemere bala bende baba bwonerera. ²⁹ E wa kuamaasa e tama lyiuma umulose e lya kabilyi, n'ola wakunya'ekotchi lyawe uta mulayilyiraa n'e tchihulyi. ³⁰ Werese ngasi e wakweemire, n'e wakunyayire e bikayi byawe utahondaa aku alulyire. ³¹ Oko muhondjir'e bandju babayilyire, mwabwo, ku muna bayilyirae. ³² Kwa bushi mukasima bala baba simire mwabwo, mwalosise bubuya butchiye? Kwa bushi bala bata bemesi, nabwo bende basima e babasimire. ³³ Nenyu muka bayilyira e mabuya bala bende babayir'e mabuya, mwalosise mabya matchiye, tchiro n'e bakosi by'e byaa bende bayira kunoko kunoko. ³⁴ Na muk'endjika e bandju mwa kulangalyi kutola kandju erabalyi, mwalosise bubuya butchiye? Tchiro e besh'e byaa bende bendjika nabwo e bandji, ilyi baalulyirwa ³⁵ Si kweyine musim'e bahombanyi benyu, mubakorer'e mabuya, na muk'endjika mutalangalyiraa e kulyipa. N'e lwembo lwenyu lukaba lunene; nenyu mungaba bana bw'ola uly'e ndonga. Kwa bushi alyi mubuya kwa bala bata mutonga n'e babi. ³⁶ Si kweyine, muat'e bwondjo, ngokul'eho wenyu atchus'e bondjo. ³⁷ Muta tchindji busanyaa, ilyi nenyu muta tchinji busibwaa. Muta shindjaulaa nenyu munga shindja ulyirwa: ''Mulyikilyire nenyu munga lyikilyirwa. ³⁸ Mweres'e bandju e bikayi ne nenyu muk'eresibwa. E luero lwehure n'e lusindayirwe, n'e kuboyibwa boyibwa n'e kusheshekala, luero e bandju baka beresa mwabwo, muk'ekera ala tchubalyi tchwenyu; kwa bushi e luero lula mwende mwapimirana, lu mukana rengerwa.'' ³⁹ Era kuba bira e muanyi, kute kwa muuta anga lonolana eundji muuta? Bata kulumbire mwa buya ku banalyi bombi? ⁴⁰ E mwiya atalushir'e mwiyilyisa waye, si kweyine e mundju mushinganyanya end'a lyingamana n'e mwiyilyisa waye. ⁴¹ Batcha, kute kwa unga lola kwa tchitakala mwa lyiho lya mulyikenyu e mango utakulyir'e bitoko mwa lyiho lyawe? ⁴² Na kute kwa unga ala kubira mwenye wenyu, ''Mwenye wetchu, nyireke nyikukul'etchitakala mwa lyiho lyawe, nawe utalolyire kwa tchibande tchira tchilyi mwa lyiho lyawe? Mute banyi woyo, kula tanga e tchitakala tchilyi mwa lyiho lyawe ilyi uala kukula e bitoko bilyi mwa lyiho lya mwe wenyu. ⁴³ Kwa bushi kutalyi mutchi mubuya unga buta e maree mabi, ilyi kutalyi mutchi mubi ola unga buta e maree mabuya. ⁴⁴ Kwa bushi tchira mutchi wende wamenyeka kwa maree maye; kwa bushi bataumbula e tchutabi kwa makangawa, ilyi kandji batanga umbula e mibaruti kwa mikere. ⁴⁵ E mundju mubuya mwa mwako mubuya w'e mutchi waye, end'ana ebilyi bibuya, n'e mundju mubi mwa mwako mubi w'e mutchima waye, enda buta e mabi kwa bushi e mundju, e bunu bwaye bwende bwateta ebihure mwa mutchima waye. ⁴⁶ Kwa bushi n'e tchiye mwanyibalangira Enawetchu, Enawetchu, si kweyine mutayira bira natetchire? ⁴⁷ Ngasi mundju w'esha era mwanyi, kunvilyisa e myasi yanyi n'e kuyikola, nyinga balosa e muanyi waye. ⁴⁸ E muanyi waye ulyi nga mundju w'ebak'e nyumba era kutchima era masina busibu, era kubika e mutangiro ala ndonga s'ekoyi, e tchusi n'e mwihusi bera kwisha, byera kuyihuta eye nyumba busibu itakulumbaa, kwa bushi yebakwaa kubuya. ⁴⁹ Si kweyine, ola onva busira kuyira, e muanyi waye ulyi nga mundju ola w'e bakaa e nyumba yaye ala ndonga s'e mushee, busira mutondero. Etchusi n'e mwihusi byera kuhut'eye nyumba yera kusuuka, n'e kusuuka kwaye kwera kuba kunene.''