¹ Bera kwimuka e mukundamano woshi, bera kumweka e mwa Pilato. ² Bera kutangira bamushitaka n'e kuteta, "Tchwalolyire onola endjire ateresa e lubaa lwetchwu, n'e kulayilyira e bandju bat'eresaa Kaisari e kolyi, n'e kuteta okwo yeyine yi Kristo, Mwami." ³ Pilato era kubusa, era kuteta, "Woyo u Mwami w'e Bayahudi?" Yesu era kumuhusa, era kumubira, "Woyo u watetchire." ⁴ Pilato era kubira e bakulu b'e badjindji n'e mukundamano, "Ndabwene e mwasi ola ulyi mubi e mw'ono mundju." ⁵ Si kweyine, bera kusesa busibu n'e kuteta, "Onola endjire ashandabanya e bandju, n'e kub'eyilyisa mwa Buyahudi bwoshi, kutenger'e Galilaya kuyik'enera." ⁶ Na, ilyi Pilato onva batcha, era kuhuba kubusa ilyi ono mundju alyi w'e Galilaya. ⁷ Na ilyi amenya okwo alyi e masina m'e bushe bwa Herode, era kweka Yesu e mwa Herode, kwa bushi naye abaa alyi e Yerusalemu olo lusiku. ⁸ Na e mango Herode alolyire kwo Yesu, era kushaaluka busibu, kwa bushi endee ahonda busibu e kumulola kwo kutengera siku singi. Kwa bushi endee onva e myasi yaye, era kuhonda alole e tchisomerene tchayirwa naye. ⁹ Herode era kumubusa Yesu myasi yingi, si kweyine Yesu ata muhusaa tchiro n'e mwasi. ¹⁰ E bakulu b'e badjindji n'e bandjisi bera kwimuka bera kumushitaka kwa misi busibu. ¹¹ Na batcha, Herode era kumu bwonerera, alauma n'e barungu (basula) baye, era kumuyilyira e lupaly, n'e kumwimbasa e ndjimba sibuya; businda era kumuhubisa e mwa Pilato. ¹² Kutengera olo lusiku lunolo, Herode ne Pilato bera kuba lushangi (kwa bushi e muhondo babaa bahombanyi beyine ku beyine). ¹³ Ne Pilato era kubuanyanya e bakulu b'e badjundji, n'e bandji bakulu, n'e bandju, ¹⁴ era kuba bira, "Ono mundju mwamuretchire e mwanyi ngokula ahombanyis'e bandju; nanyi, ilyi nalola, nanyi neshire e myasi yaye e muhondo senyu, si ndalolyire era tchiro mwasi mubi er'alyi mwa kakatchi k'e myasi yoshi mwamu shitakilyire. ¹⁵ Na tchiro Herode, kwa bushi naye amualure e mwetchu; kwa bushi n'okwo, kutalyi e mwasi mubi woshi woshi ola ayilyire ushingenene e kwitchibwa. ¹⁶ Kwa bushi n'okwo, namuhubilyira, businda nyimubwoole. ¹⁷ [Kwa bushi kwendee kwamwema, kubabwoorera muhweke muuma e lusiku lukulu. ¹⁸ Bera kuhut'e lukemi bwoshi alauma, bera kuteta, "Utchukulyire ono mundju, na utchu bwoorere Baraba!" ¹⁹ N'oyo Baraba, akabulwaa mwa buroko kwa bushi n'e mufula w'elukaa mwa musi, n'okwo bwitanyi. ²⁰ Batcha, Pilato era kuhuba kuteta nabwo e bwa kabilyi, kwa bushi abaa ahondhire e kubwoola Yesu. ²¹ Si kweyine bera kuhut'e lukemi n'e kuteta, "Umulyibuse, Umulyibuse. ²² Era kuba bira e bwa kahatchu, "Kwa bushi n'e tchiye? Onola ayire bubi butchiye? Ndabwene e mwaye e bubi bushingenene e kwitchibwa. Batcha, e mango nyingahuba kumuhubira, nyinga mubwoola." ²³ Si kweyine, bera kulakanga kwa mirenge yinene busibu, n'e kuhonda alyibusibwe. E mirenge yabwo yera kuyima. ²⁴ Pilato era kwish'e lubandja okwo e kuhonda kwabwo kuyilyikane. ²⁵ Era kubwoola ola wakabulwaa mwa buroko kwa bushi y'e bubi n'e bwitanyi, oyola yi bahondaa,. Era kubawa Yesu bamuyire okwo bahondjire. ²⁶ Na ilyi baba bera bamweka, bera kusimba mundju muuma Simoni w'e Kureni, abaa atenga mw'ehwa, bera kumesa e musalaba, aweke e nyuma sa Yesu. ²⁷ Mukundamano munene w'e bandju era kumushimba, n'e bakasi bendee batchihutahuta e bifuba n'e kumulyilyira. ²⁸ Si kweyine Yesu era kuba alukira, era kuteta, "Mu banyere b'e Yerusalemu, mutanyilyilyiraa nyono, si mutchilyilyire alauma n'e bana benyu. ²⁹ Kwa bushi, e siku s'esha sira bakateta okwo, 'E rayi ly'e ngumba, n'enda sita butaa, n'e mabere mala mat'onzaa. ³⁰ Mu mango bakatangira babira e miruko (ilyi e ndjulungu), 'Utchukulumbire, n'endjulungu, mutchubukire. ³¹ Kwa bushi nga bangayira batcha kwa mutchi mubishi, kute bikaba kwa mumu?" ³² Bera kweka na bandji bandju babilyi, b'ekuyir'e mabi, b'etchibwe alauma naye. ³³ Na ilyi bayika e andju abalangirwe "E kinya ly'etchwe," bera kumulyibusisa awola, alauma na bala b'ekuyir'e mabi, muuma e lwande lw'e kulyo, n'eundji e lwande lw'e kurembe. ³⁴ Yesu era kuteta, "Tata, uba babalyire, kwa bushi bat'eshi tchiye bayira. Bera kuaba e ndjimba saye, mwa kusihutchira e buhonga (kura). ³⁵ E bandju bera kwimanga n'e kutchumbikisa. Abwo bakulu babwo bendee bamuyilyira e lupalyi, n'e kuteta, "Endee afumya e bandji; atchifumyae yeyine nga yi Kristo wa Ongo, mwana musiyirwa waye." ³⁶ Abwo basula nabwo bera kumuyilyira e lupalyi, bera kumwekera e kalulu, ³⁷ na batcha, bera kwende bateta, "Nga woyo u mwami w'e Bayahudi, utchifumye weyine. ³⁸ Na e ndonga saye, kwabaa e mandjiko; "ONOLA YI MWAMI W'E BAYAHUDI." ³⁹ Na muuma wa bwo banyayi bamanyikibwaa, era kumukamba, n'e kuteta, "Kute! Ata woyo u Kristo? Tchifumye alauma netchu." ⁴⁰ Si kweyine, oyo wa kabilyi era kumukalyiyira n'e kuteta, "Woyo ut'obayire Ongo, nawe ulyi mwa butchindjibuse bunobwo? ⁴¹ Ebyera bilyi by'e kunalyi era tchulyi tchubano, kwa bushi tchwaangilyira e lwembo lutchwushingenene kwa mikolo yetchwu; si kweyine onola atayiraa tchiro n'e hitcha hira hitashingenene." ⁴² Businda era kuteta, "Ee Yesu, unyikengere e mango ungaya mwa bwami bwawe." ⁴³ Yesu era kumubira, "Emera nyikubilyire, kulwarero ungaba nanyi mwa paradizo." ⁴⁴ Na ako kashangi kabaa nga bishangi ndatchu, kwera kuba e mwisimya kwa butala bwoshi kuyika bishangi mwenda (saa mwenda); ⁴⁵ e suba ly'era kwandaasa e bulangare bwalye; e paziya ly'e kanisa ly'era kubereka byande bibilyi (mwa kakatchi). ⁴⁶ Yesu era kulyira kwa murenge munene, era kuteta, "Tata, mwa mabwoko mawe mu nyibikir'e mutchima wanyi. ⁴⁷ Na ilyi amala kutet'ebye, era kwish'e mutchima (era kwola, ilyi era kufa). Na uyo mukulu w'e basula ilyi alola e byabyere, era kutonga Ongo, era kuteta, "E kunalyi ono mundju abaa alyi mundju w'e kunalyi." ⁴⁸ Na e mukundamano woshi w'e bandju babaa bakund'emene, kuya kulola kw'ebye, ilyi balola e byayilyikene, bera kuya ngasi muuma e mwaye, bendjire batchihutahuta e bifuba. ⁴⁹ Na bwoshi bala babaa bamenyene naye, na bala bakasi bakulyikiranaa naye kuteng'e Galilaya, bera kwimanga bure kuloreresa ebyera. ⁵⁰ Na batcha, kwera kwisha mundju muuma, esina lyaye yi Yusufu, abaa mundju w'omwo luhu, abaa mundju mubuya, w'e kunalyi. ⁵¹ (Na tchiro at'emeraa e lwango lwabwo), naye abaa mundju w'e Arimataya, musi muuma w'e Bayahudi, na kandji abaa alangalyire e bwami bwa Ongo. ⁵² Oyo mundju, era kuya e mwa Pilato, era kuhonda eresibwe e mubilyi wa Yesu. ⁵³ Era kuwandaasa, era ku ubunga buga mwa ndjimba sibuya, era kuubika mwa shinda era yabaa yitchimirwe mw'e koyi, na mw'eye shinda mwabaa mutafiraa kubishibwa undji mundju. ⁵⁴ N'olo lusiku lwabaa lusiku lw'e kukunganya e Sabato, n'e Sabato yera kutangira. ⁵⁵ Na bala bakasi b'eshaa ne Yesu kuteng'e Galilaya, bamukulyikire, bera kulola kwa shinda, n'e kulola okwo babikaa e mubilyi waye. ⁵⁶ Bear kualuka, bera kukunganya e manukato n'e maramu. N'e lusiku lw'e Sabato bera kutamuka ng'okwo babaa babilyirwe.