¹ Na elusiku lukulu lw'e mikati itabikirwe mw'e ngeso lwera kuyika, lu lubalangirwe lusiku lukulu lw'e Pasaka. ² N'e bakulu b'e badjindji n'e bandjisi bendee bahonda e ndjira y'e kwita Yesu; si bendee bw'obaa e bandju. ³ Shetani era kuya mwo Yuda, ubalangirwe Iskariote, naye abaa muuma w'ely'e kumi na babilyi. ⁴ Yuda, era kwimuka, era kuya kuanyira n'e bakulu b'ebadjindji n'e barungu (ilyi e basula), okwo angaala e kumubika Yesu mwa maboko mabwo. ⁵ Bera kushaaluka, bera kunvikana naye ekumweresa e faranga. ⁶ Era kwemera, era kuhonda e andju ala anga bawa ye busira kuba e mukundamano w'e bandju. ⁷ Lwera kuyikilyira e lusiku lw'e mikati era italyi y'e kubikwa mwo e ngeso, lu lusiku lw'e kunyiyibwa kw'e tchibusi tch'e pasaka. ⁸ Yesu era kutchuma Petro ne Yoana, era kuteta, "Mwende, mutchwukunganyise ala tchwungalyira e Pasaka, ilyi tchuyilyira wo." ⁹ Bera kumubusa, "Ngayi uhondjire tchuyikunganyise?" ¹⁰ Era kuba bira, "Lolaa, e mango mungaba mwera mwaya mwa musi, munga buana e mukasi et'e ngunguru y'e meshi, mumu kulyikire, mwingire mwa nyumba era ang'engira mwo. ¹¹ Na munga bira oyo nyin'e nyumba, 'E Mwiyilyisa, akubusise, "Ngayi e andju (tchumba) tch'e baenyi tchilyi, ilyi nyilyira e Pasaka omwola alauma n'e baanda banyi?"' ¹² Naye anga balosa e businda (tchumba) bunene bulyi kwa burafe, bwera bwakuburwe; omwola mu mukunyae. ¹³ Bera kuenda, bera kulola ng'oko anababiraa, bera kukunganya e pasaka. ¹⁴ Na ilyi e bishangi byayika, era kwikala atangira alya, alauma n'e baanda (ndjumwa) baye. ¹⁵ Era kuba bira, "Nyihondjire busibu e kulya ene Pasaka alauma nenyu e muhondo s'e kulyibusibwa kwanyi. ¹⁶ Kwa bushi nyiba bilyire okwo ndakatchihuba kuyilya, kuyika iyikilyire mwa bwami bwa Ongo." ¹⁷ Mu mango Yesu atolyire e tchikombe (ngumbu), era kutonga (Ongo) era kuteta, "Mutole tchinera, na mubaanye mubeyine ku mubeyine. ¹⁸ Kwa bushi nyiba bilyire okwo, ndakatchimwa e maree m'e muzabibu, kuyika e bwami bwa Ongo bwishe." ¹⁹ Era kutola e mukati, era kutonga, era kuufuna, era kubawa, era kuteta, "[Onola yi mubilyi awnyi, wanyirwe kwa bushi nenyu; muyire batcha kwa kunyikengera." E tchikombe natche kunoko e nyuma s'e kulya; era kuteta, "Tchine tchikombe tchi tchiraane tchiyaya mwa kakatchi k'e mikira yanyi, yi yinga sheshekala kwa bushi nenyu. ²¹ Si kweyine, mulolae, e kuboko kwaye oyo unga nyana kulyi alauma nanyi kwa mano meza, ²² kwa bushi e mwana wa Adamu atchiendera ng;oko byaandikirwe; si kweyine, e bwanya bwaye oyo mundju wa mwana, (ilyi wamwitchisa)! ²³ Bera kutangira babusanya beyine ku beyine, nde mubwo ola ungayira etche tchiyiro. ²⁴ Kura kuba e bwaka e kakatchi kabo, okwo nde ola unga andjibwa e kuba mukulu (mubwo. ²⁵ Era kuba bira, "E bami b'e biwo bende babatambula, n'e bet'e buashe e ndonga sabwo, bu bende babalangirwa b'e kunalyi. ²⁶ Si kweyine era mulyi mwabwo, ata batcha. Ola ulyi mukulu ku mwabwo abe nga yi ulyi mutoto (ilyi mueke); n;ola utambure abe nga ewakorerana. ²⁷ Kwa e ulyi mukulu yi nde? Ola ulyi kwa bilyo alya, ilyi ola wendjire akola? Ata ola wikere kwa bilyo? Si kweyine nyono e kakatchi kenyu nyilyi nga mukosi. ²⁸ Si kweyine mwabwo mu mwabaa alauma nanyi mwa kakatchi k'e matangulo manyi. ²⁹ Nanyi nyiba bikilyire e bwami, ng'oko Tata anyi bikiraa bwo nyono; ³⁰ ilyi muala e kulya n'e kumwa kwa meza manyi mwa kakatchi k'e bwami bwanyi; n'e kwikala kwa bifumbi by'e bwami, eyera muka tchindjibusa e milala e kumi n'e bilyi y'e Israeli. ³¹ Era kuteta, Simoni, Simoni, Lolaa, Shetani (e musimu), abahondjire mwabwo, ilyi aala e kuba erula nga mumbunge (ngano). ³² Si kweyine, nyikw'emerere woyo ilyi e bwemere bwawe buta shaalaa; Nnawe, e mango ungaba wera ulyinga mene wimanze ilyi ukubule benye wenyu. ³³ Petro era kumubira, "Enawetchu, nga nyitchilyi alauma nawe, nyono nyitchikubure e kuya mwa buroko ilyi kuyika e kufa." ³⁴ Yesu era kuhusa, "Nyikubilyire, Petro, e luasi lutabike kulwarero, nawe utasa kunyilayira kahatchu okwo utanyishi." ³⁵ Yesu era kuba bira, "Kute! E mango nyendee nabatchuma, mutet'e hawo, ilyi birato, kulyi bya mwayinaa?" Bera kuhusa, "Nanga." ³⁶ Era kuba bira, "Si kweyine, ola wet'e hawo ayitole, n'ola utet'e bupanga, aus'e kotchi lyaye, abu ule." ³⁷ Kwa bushi nyiba bilyire, ebye byaandjikirwe bishingenene e kuyikilyira tanga; okwo, 'Aandjibwaa alauma n'e banyayi. Kwa bushi e binyiterene, by'et'ebusinda bwabye." ³⁸ Bera kuteta, "Enawetchu, lolaa! Anola alyi mapanga mabilyi." Era kuteta, " Amwola mashingenene." ³⁹ Enyuma s'e kulya, Yesu era kwiluka, era kuenda n'e kuyika kwa ndjulungu y'e Mizeituni, ng'okwo abaa akomere; e baanda baye nabwo bera kumukulyikira. ⁴⁰ Na ilyi ayika awola era kuba bira, "Mweme busibu ng'okwo mutayaa mwa matangulo." ⁴¹ Yeyine era kutchiberula kubwo nga andju e kukabula e koyi, era kukom'e mafi, era kwema, ⁴² era kuteta, "Tata, nga ku kuhonda kwawe, unyikulyire tchine tchikombe; si kweyine, ata e kuhonda kwanyi, si e kuhonda kwawe kuyilyikane." ⁴³ [Malaika kuteng'e mbingu era kumwilukira, era kumubika mw'e misi. ⁴⁴ Naye kwa bushi abaa alyi mwa malyibukwo, era kwema busibu; n'etchuka tchaye tch'era kuba nga mimata ya mikira, yera kutowera kwa tchitaka]. ⁴⁵ Na ilyi atenga mwa kwema kwaye, era kuya era e baanda baye balyi, era kubuana baondjer'e tchulo kwa bushi n'e bute ilyi e kusinana. ⁴⁶ Era kuba busa, "Kute mwaondjer'e tchulo? Musuke, muye kwema, mungesha kuya mwa matangulo." ⁴⁷ Na ilyi aba er'alyi mwa kutet'ebye, Lolaa, e mukundamano w'e bandju, alauma n'ola ubalangirwe Yuda, yi muuma wa bala ekumi na babilyi, aba hondorere. Era kuya era Yesu alyi ilyi amulamusa. ⁴⁸ Yesu era kumubira, "Yuda, Wanyire e mwana wa Adamu kwa kumulamusa?" ⁴⁹ N'e babaa balyi ofi naye, ilyi balola e bingaba, bera kuteta, "Enawetchu, tchubahute ilyi tchubakome n'e bupanga?" ⁵⁰ Muuma mubwo era kuhuta e mukosi w'e mudjindji mukulu, era kumwisha e kutchi kw'e kulyo. ⁵¹ Yesu era kuhusa, era kuteta, "Mube bwondjo!" Era kumuata kwa kutchi, era kumufumya. ⁵² Yesu era kubira e bakulu b'e badjindji, n'e balanzi b'e kanisa, n'e bahosi, b'eshaa kwa bushi naye, "Kute! Mweshire, mwet'e mapanga n'e makoyi ng'e baya kusimba e mwisi? ⁵³ Ngasi lusiku e mango nabaa nyilyi alauma nenyu mwa kanisa, mutanyimusisaa e kubwoko. Si kweyine, kanola ku kahangi kenyu, n'e buashe bw'e mwisimya." ⁵⁴ Bera kumusimba, bera kumweka, bera kuenda naye kuyika mwa nyumba y'e mudjindji mukulu. Ne Petro era kumukulyikra kwa bure. ⁵⁵ Na ilyi baba bera baushaa e mulyiro mwa kakatchi k'e mulungu, bera kwikala alauma, ne Petro era kwikala mwa kakatchi kabwo. ⁵⁶ Mu mango mukasi muuma amulolyire kwo ekere mwa bulangare, era kumutomworera e meho, era kuteta, "Onola mundju naye abaa alauma naye." ⁵⁷ Kweyine, Petro era kulayira, era kuteta, "U mukasi, ndamwishi. ⁵⁸ Na e nyuma sa kahangi kaeke, eundji mundju era kumulola kwo, era kuteta, "Woyo nawe ulyi muuma mubwo." Petro era kuteta, " U mundju, ata nyono." ⁵⁹ Na e nyuma nga sa tchishangi tchiuma, eundji mundju era kusesa e kuteta, "E kunalyi ono mundju alyi muuma naye, kwa bushi naye alyi mu Galilaya." ⁶⁰ Si Petro era kuteta, "U mundju, ndamenyire ebye wenyire wateta." Na unawo, ilyi aba atchilyi ateta batcha, e luasi lwera kubika. ⁶¹ Enawetchu era kukabaana, era kulola ku Petro. Petro era kukengera ola mwasi w'Enawetchu kula amubiraa, "Kulwarero, e muhondo e luasi lubike unga nyilayira kahatchu." ⁶² Petro era kwiluka, era kulyira kwa mihonyi. ⁶³ Nabwo bandju babaa basimbire Yesu bera kumuyilyira e lupalyi, bera kumuhota. ⁶⁴ Bera kumubukira e meho, businda bera kumubusa-busa bera kuteta, "Reba, nde wakuhutchire.?" ⁶⁵ Bera kumubira n'eyindji myasi yinene y'e kumukamba. ⁶⁶ Na ilyi bwatcha, e bakulu b'e bahosi, n'e bakulu b'e badjindji, n'e bandjisi, bera kumureta e mwa luhu lwabwo, bera kuteta, " ⁶⁷ nga woyo u Kristo, utchubire. "Si era kuba bira, 'tchiro nyinga babira, mut'emere." ⁶⁸ Kandji, nga nyinga babusa, mutahuse. ⁶⁹ Si kweyine, kutera batcha, e mwana wa Adamu ang'ekala e kulyo kwa Ongo. ⁷⁰ Bwoshi bera kuteta, "Tchubira, woyo u mwana wa Ongo? "Yesu era kuba bira, "Mwabwo mu mutetchire okwo nyono nyi ye. ⁷¹ Bera kuteta, "Tchiye tchutchilyi tchwahonda nga buamilyisi? Kwa bushi, tchubeyine tchwonvire e myasi y'e bunu bwaye."