¹ Yesu era kwimusa e meho maye, era kulola e baare bendjire babika e ndjulo mwa tchitchilyi tch'e mwako. ² Era kulola muhumba kasi muuma mukene, era kubika mwo faranga ebilyi. ³ Era kuteta, "Ekunalyi nyibabilyire, okwo ono muhumbakasi mukene yi wabikire sinene busibu kulusha bwoshi. ⁴ Kwa bushi, bano bwoshi babikaa mwa tchitchilyi e faranga sira sibaluyilyire. Si kweyine, onola mwa bukene bwaye, abikire byoshi bira abaa ete." ⁵ Na ilyi e bandju baba bendjire baanyira ilyi babalyikisa e myasi e ndonga s'e kanisa, okwo kabaa kasimisibwe ilyi kebakirwe kwa makoyi mabuya m'e ndjulo s'e bandju, era kuteta, ⁶ "Bine byoshi mwendjire mwalola kwo, e siku shesha, sira kutakashiba tchiro n'e koyi lyiuma e ndonga s'elyindji lyira lyitaka shambulwa." ⁷ Bera kumubusa, bera kuteta, "Mwiyilyisa, ebyera bikaba mangotchi? Na tchiye tchi tchisomerene tchira tchikalosa okwo ebyera byera bilyi ofi kuyikilyira?" ⁸ Yesu era kubahusa, era kuteta, "Mulolae, banene bakesha okw'e sina lyanyi, n'e kuteta, 'Nyono nyi ye,' n'okwo e bishangi byeshire.' Batcha, mwabwo muta kulyikiraa abwola. ⁹ Nenyu, e mango muk'onva e myasi y'e ndambla ilyi bita, mutashalyimaa ilyi kobayisibwa, kwa bushi ebyera bishingenene e kwisha tanga, si kweyine obwo businda (bwa byoshi) ilyi butasa kwisha fuba." ¹⁰ Businda era kuba bira, "E lubaa luk'emuka kuya kulwa n'e lundji lubaa, n'e bwami kulwa n'e bundji bwami; ¹¹ kukaba e ngukumanyi (musisi) yinene y'e tchiwo, na kukaba e businya n'e nyifu andju auma auma; na ebye kusomesa, n'e tchisomerene tchinene kuteng'e mbingu. ¹² Si kweyine, e muhondo ebye byoshi biyikilyira, bakabasimba n'e kubalyibusa; baka beeka e muhondo s'e ma sinagogi (ilyi kanisa), n'e kub'eta mwa buroko, muk'ekibwa e muhondo s'e bami n'e bakulu kwa bushi n'e sina lyanyi. ¹³ N'ebye bi bikaba buamilyisa e mwenyu. ¹⁴ Na batcha, mube mulalyire mwa mitchima yenyu, mutatchibusaa-busaa tchiye mungahusa; ¹⁵ kwa bushi nyono nyinga bawa e bunu n'e bwenge bula e babi benyu bwoshi bata ale e kuyimana nabwo ilyi e kubilayira. ¹⁶ Nenyu mukalayirwa n'e basere benyu, ne benye wenyu, n'e milala yenyu, n'e bera benyu, na bak'eta bauma mu mwabwo. ¹⁷ Mwabwo muka ayibwa n'e bandju bwoshi kwa bushi n'e sina lyanyi. ¹⁸ Si kweyine kutakatereka tchiro n'e lufilyi lwenyu luuma l'okwetchwe lyenyu. ¹⁹ Nenyu kwa bushi n'e kubabalyira kwenyu muka fumya e kalamwo kenyu. ²⁰ Si kweyine, e mango muka bwona e musi w'e Yerusalemu wasungulwa n'e barwanyi (ilyi ndambala), mu mango mumenyae okwo e kusheresibwa kw'oyo musi kwera kulyi ofi. ²¹ Mu mango bala balyi mwa Buyahudi bashayire mwa miruko, na bala balyi mwa kakatchi k'e musi bashayire e mbuwa, na bala bakaba balyi mwa mahwa batak'e ngira mwo. ²² Kwa bushi ese siku si siku s'e kulyibusibwa, ilyi biyikilyira bira byoshi byaandjikibwaa. ²³ E bwanya bwa bala bakaba b'et'e masimi n'e bw'onza mw'ese siku! Kwa bushi kukaba n'e malyibuko manene mwa kakatchi k'e tchiwo, n'e bute kwa bushi noluno lubaa. ²⁴ Bakakumbaala kwa bukalyi bw'e bupanga, nabwo baka simbibwa mbira n'e kwekibwa mwa yindji milala yoshi; na u Yerusalemu uka biratchibwa n'eyindji milala, kuyika e mango e kuyikilyira kw'eyindji milala kukaba. ²⁵ Kandji, kukaba etchisomerene mwa kakatchi k'esuba, n'e mwesi, n'e ngununu; n'omwo tchiwo e kulyibusibwa kw'e milala bakasomerwa kwa kukungula kw'e nyandja n'ekusahaala kwaye. ²⁶ E bandju baka tambukala e mitchima kwa bushi n'e boba, n'ekwobwowera e bingayikira e butala. Kwa bushi e misi y'e mbingu ikasaala. ²⁷ Awola u bakalola e mwana w'e mundju (wa Adamu) esha mwa lwakungu alauma n'e misi n'e buashe bunene. ²⁸ Na e mango ebyera bika tangira byaba, mushaaluke, n'e kwimusa e matchwe menyu, kwa bushi e butchunguke bwenyu bwera bulyi ofi." ²⁹ Yesu era kuba bira e muanyi, "Mulorerese e mutchi n'e yindji mitchi yoshi. ³⁰ E mango yende yamala kwera, mwende mwalola n'e kumenyerera mubeyine okwo e kuumbula kwera kulyi ofi. ³¹ Nenyu kunoko, e mango muka lola okwo ebyera byera byayikilyira, mumenyae okwo e bwami bwa Ongo bwera bulyi ofi. ³² Mwemere, nyiba bilyire, tchine tchibutchi tchitarenge ne bine bitayikilyira. ³³ E mbingu n'e butala bikarenga, si e myasi yanyi itakarenga tchiro n'e hitcha. ³⁴ Na batcha, mutchi tchwumbikise, e mitcima yenyu engesha kutchirukwa n'e kwiuta, n'e bulalu, n'e kulyibukira kano kalamwo; olo lusiku lungesha kubayikra kwa lyiuma, ngokula e muteu wende wasimba ilyi wende waasa (e nyama) kwa lyiuma; ³⁵ Kwa bushi batcha ku bikayikira e bandju bwoshi balyi mwa butala bwoshi. ³⁶ Batcha, mwabwo mube mulalyire ngasi kashangi, mube mwa kwema, ilyi muala ekufumisibwa mwa kakatchi kebine byoshi bikayikilyira, n'e kwimanga e muhondo s'e mwana wa Adamu" ³⁷ Na batcha, ngasi lusiku endee eyilyisa mwa kanisa, n'e butchufu anaya kuwondjera mwa muruko (ndjulungu) ubalangirwe w'e Mizeituni. ³⁸ N'e bandju bwoshi bendee basuka mutchera-tchera (mishangya-shangya), baye mwa kanisa ilyi bamunvilyisa.