¹ Na ilyi e lusiku lutanzi lw'eyinga lwayika, ilyi e butchufu bwaba bwera bwatcha, bera kuya kwa shinda, bera kweka e manukato babaa bakunga nyise. ² Bera kubuana lyir'e koyi lyakulumbisibwe bure n'e shinda. ³ Bera kwingira mwo, si batabwona e mubilyi w'Enawetchu Yesu. ⁴ Na ilyi baba balyi mwa kutchianyisa kwa bushi n'ono mwasi, Lolaa, bandju babilyi bera kwimanga ofi nabwo, b'embere e ndjimba sa langala-langala. ⁵ Nabwo, bera kuya mw'e bwoba n'e kwinamilyira kuyika kwa tchitaka, abwo bandju bera kubabira, "Kwa bushi n'e tchiye mwendjire mwahonda e usene mwa kakatchi k'e bafu?" ⁶ Atalyi anola, si kweyine omwokire! Mukengere kute atetaa amango abaa atchilyi e Galilaya, ⁷ era kuteta, "By'emire e mwana w'e mundju abikwe mwa mabwoko m'e besh'ebyaa, n'e kulyibusibwa, (ilyi kwitchibwa) n'e kwomwoka e lusiku lw'e kahatchwu." ⁸ Bera kukengera e myasi yaye, ⁹ bera kutetnga e bwa shinda, bera kualuka; bera kubira ely'e kumi na muuma n'e bandji bwoshi e myasi y'ebye byoshi byabere. ¹⁰ Nabwo babaa, Mariamu Magdalena, ne Yoana, ne Mariamu nyina wa Yakobo, na bala bandji bakasi babaa balyi alauma nabwo. ¹¹ Abwola bera kubira e ndjumwa e myasi y'ebye byabere. Emyasi yabwo yera kuba nga ya lupalyiera balyi, tchiro bata bemereraa. ¹² Si kweyine Petro era kwimuka lubiro (fuba), era kuenda kuyika kwa shinda, era kwinamilyira, era kutchumbiksa mwanda, era kulola kw'es'endjimba seyine; era kuenda asomerwa kwa bushi n'ebye byabere. ¹³ Na batcha, bandju babilyi e kakatchi kabwo babaa baya mu musi muuma, esina lyawo Emaus, oyo musi abaa alyi bure n'e Yerusalemu nga luenzi lwa bishangi bibilyi (saa ebilyi). ¹⁴ Abwo bandju b'endee baanyira beyine ku beyine e myasi yoshi yayilyikanaa. ¹⁵ Na ilyi baba balyi mwa kuanyira n'e kubusanya kwabwo, Yesu yeyine era kuba sheerera, era kutondera aenda alauma nabwo. ¹⁶ Si kweyine, e meho mabwo mera kuhwekwa batamumenyaa. ¹⁷ Yesu era kuba bira, "Myasi itchiye eyera mwendjire mwa balyika batcha kuno mulyi mwa luenzi?" Bera kwimanga, basinanyire. ¹⁸ Muuma mubwo, esina lyaye yi Kleopa, era kumuhusa, "Weyine u muenyi muno Yerusalemu, u utamenyire e byabere muno sin'esiku?" ¹⁹ Yesu era kubabusa, "Myasi itchiye eyera?" Bera kumuhusa, "E myasi yerekere Yesu w'e Nazareti, oyola abaa murebi, wabaa w'et'e buashe bw'e kuteta e muhondo sa Ongo n'e muhondo s'e bandju bwoshi; ²⁰ na kandji e bakulu b'e badjindji n'e bakulu betchu, bamubikaa mwa butchindjibuse bw'e kufa, bera kumulyibusa. (ku mwita). ²¹ Si kweyine, tchubano tchwabaa tchulangalyire okwo yi unga tchungula e Israeli. Na kulusha ebye byoshi, kulwarero lu lusiku lwa kahatchu binera bya bere. ²² Na kandji, bakasi bauma b'e mwetchu batchushalyimyaa, bayaa kwa shinda mishangya-shangya ya kulwarero. ²³ Bera kuyina e mubilyi waye; bera kwisha n'e kuteta okwo belukilyirwe n'e ba malaika baba biraa okwo asene. ²⁴ N'e bandji babaa alauma netchu bayaa kwa shinda bera kulola kunokwo, ng'okwo abwo bakasi batetaa. Si kweyine, batamulolaa kwo." ²⁵ Yesu era kubabira, " Mwabwo mu mutamenyire, mu besh'e mitchima yisito y'e kwemera byoshi byatetchibwaa n'e barebi! ²⁶ Kute! Bitabaa bishingenene Kristo e kubwona mano malyibukwo, n'ekuya mwa bwami bwaye?" ²⁷ Era kutangira ku Musa n'e barebi bwoshi, Yesu era kubabalyikira mwa kakatchi k'e mandjiko mwoshi e byabaa bimwerekere yeyine. ²⁸ Bera kuyika wofi n'oyo musi babaa baya mwo, ne Yesu era kuyira ng'ola waenderera kuya e muhondo. ²⁹ Si bera kumushishilyisa, bera kumubira, "Ekala alauma netchu, kwa lyera e wolo, n'e butchufu bwelyire." Batcha, Yesu era kwingira era kwikala nabwo. ³⁰ Na, ilyi aba er'alyi nabwo kwa bilyo, era kutola e mukati, era kuuyisha, era kuufuna, era kubawa. ³¹ Emeho mabwo mera kubwookala, bera kumumenyerera; na businda era kubatereka. ³² Bera kubirana, "Kute! E mitchima yetchu itashaalukaa mwanda setchu mala mango abaa endjire ateta netchu mwa ndjira, n'e kutchubwoorera e mandjikwo?" ³³ Bera kwimuka akwo kashangi, bera kualuka e Yerusalemu. Bera kubuana bala e kumi na muuma bakundemene, alauma na bala babaa balyi alauma nabwo, ³⁴ bera kuteta, "Enawetchu afukire e kunalyi e kunalyi, naye elukilyire Simoni. ³⁵ Nabwo bera kubabalyikira e myasi yoshi y'omwo ndjira, n'okwo bamenyereraa Yesu e mango abaanya e mukati. ³⁶ Na ilyi baba bera balyi mwa kubalyikisa eye myasi, Yesu yeyine era kwimanga e kakatchi kabwo, era kuba bira, "E bwolo bub'e mwenyu." ³⁷ Si kweyine, bera kushalyima, bera kwobwowa busibu, bera kutanya nga balolyire kwa musimu. ³⁸ Yesu era kuba bira, "Kute, mwobwoyire? Na kute mwayire mw'e karhinda mwa mitchima yenyu? ³⁹ Mulolae e mabwokwo manyi n'e maulu manyi, okwo nyeyine ono. Munyiate ate kwo, mulole okwo e musimu at'ete mubilyi n'e makinya ng'okwo munyilolyire kwo nyono nyi byete." ⁴⁰ N'e nyuma s'e kut'etebye era kubalosa e mabwokwo n'e maulu maye. ⁴¹ Batcha, e kuba batasa kwemera kwa bushi n'e bushaaluke, balyi mwa kusomerwa, Yesu era kuba bira, "Mwete bilyo bitchiye anola?" ⁴² Bera kumuwa tchimbi tch'efi yotchirwe. ⁴³ Era kutchitola, era kutchilya e muhondo sabwo." ⁴⁴ Businda, era kuba bira, "Eyera yi myasi yanyi naba biraa, e mango nabaa nyitchilyi alauma nenyu, okwo bishingenene biyikilyire byoshi byandjikbwaa mwa mateeko ma Musa, n'omwo barebi n'e nyimbo (nanga)." ⁴⁵ Mu mango aba bwoore e bwenge bwabwo, ilyi baala e kumenya e mandjiko. ⁴⁶ Era kuba bira, "Batcha, ku byabaa byandjikirwe, okwo Kristo akalyibusibwa, n'e kwomwoka ilyi kufuka e lusiku lw'e kahatchu. ⁴⁷ N'okwo e lubaa lwoshi bak'eyilyisibwa okw'esina lyaye, e myasi y'e kutchiaya n'e kubabalyirwa e byaa, kutangira e Yerusalemu. ⁴⁸ Nenyu mu baamilyisa b'ene myasi. ⁴⁹ Na mulolae, nyibareterere e tchiraane tcha Tata alaanyaa. Si kweyine mwikale muno musi, kuyika mweresibwe e buashe kuteng'e ndonga." ⁵⁰ Yesu era kubalongolana kuyika e Betania. Era kwimusa e mabwoko maye, era kubayisha. ⁵¹ Na ilyi aba alyi mwa kubayisha, era kutchiberula nabwo, era kwimusibwa e ndonga mwa mbingu. ⁵² Bera kutchikumba ye, businda bera kualuka e Yerusalemu mwa bushaaluke bunene. ⁵³ Nabwo bera kwikala e bishangi byoshi mwa kanisa, kutonga ilyi kukusa Ongo.