¹ Muhut'e ngunga mwa Sayuni, muhute n'e mirenge mwa murukwo wanyi mutchesibwa; byesh'e tchiwo bwoshi bakukumane; kwa bushi e lusiku lw'Enawetchu lweshire. Na kwa bushi lulyi ofi. ² E lusiku lw'e mwisimya lwerafulu, lusiku lw'e lwakungu n'e mwisimya munene. Ng'okwola e mutchera tchera end'aba kwa ndjulungu, abwola bakulu, kandji bet'e misi, e shushanyo yabwo yitafiraa kuba wo tchiro n'e hitcha, tchiro yitana tchiba wo e nyuma s'ebye, ychiro kuyika mwa kakatchi k'e bindji bibutchi. ³ E mulyiro w'endjire walya e muhondo sabwo, n'e nyuma sabwo e lukangira w'e mulyiro wanasheresa; etche tchiwo tchishushire n'ehwa ly'e Edeni e muhondo sabwo, n'e nyuma sabwo lulyi lukiya; na batcha, kutalyi e wafumire ata simbirwe nabwo. ⁴ E kubwonekena kwabwo kulyi nga kubwonekana kw'e byesi, na ngokula e beerukire kwa byesi ku bende balwa fuba. ⁵ Ng'okula e sindo s'e mitchukalyi y'e ndambala kwa ndonga s'e ndjulungu, ku bende bauluka; ng'okula e bekenge ly'e mulyiro ly'ende ly'otch'e nvumba sumire, ng'okula e bwato butchikubure kwa ndambala. ⁶ E muhondo sabwo e bandju bana lyibuka, e buso bwabwo bualukire kuba bweru kwa bushi n'e bwoba. ⁷ B'ende babilyita nga bala b'e misi, b'ende b'eruk'e tchikunguso nga balw'e ndambala; nabwo b'ende baend'e muhondo ngasi muuma mwa ndjira saye; na tchiro bata teresa e bishando byabwo. ⁸ Na tchiro kutalyi muuma ola w'ende wafumira mulyikbwo, b'ende baende e muhondo ngasi muuma mwa ndjira yaye; b'ende batchiyilyira e ndjira kwa misi mwa mbenzi, na tchiro batarek'e kukulyikir'e ndjira yabwo. ⁹ B'ende babeer'e musi, n'e kuenda fuba e ndonga s'e tchikunguso; b'ende b'eruka n'e kwingira mwa nyumba; b'ende b'engilyira mwa madirisha nga mwisi. ¹⁰ E tchiwo tch'ende tchakukumana e muhondo sabwo, e mbingu sana kukumana; e suba n'e mwesi byende byabikwa mw'e mwisimya, n'e ngununu s'ende sarek'e kulomeka. ¹¹ N'Enawetchu ende ana e murenge waye e muhondo s'e barwanyi baye, kwa bushi ala ende atamukira alyi anene busibu; kwa bushi alyi w'e misi, yi w'ende ayikilyisa e mwasi waye; kwa bushi e lusiku lw'Enawetchu lulyi lukulu, lwa kushalyimya busibu; naye yi nde ola unga ala kululyindjira? ¹² Si kweyine kuyika batcha, kw'Enawetchu atetchire, ''Munyialukire nyono kwa mutchima wenyu woshi, na kwa kutaly'e bilyo, n'e kulyira, na mwa kuyir'e mishibwo.'' ¹³ Mutches'e mitchima yenyu, si at'e ndjimba senyu, mumualukire Enawetchu, Ongo wenyu; kwa bushi yi ulyi w'e lukoo, ehur'e bwondjo; ata wa bute fuba fuba, alyi munene wa mababalyire, naye ende aaya e mabi. ¹⁴ N'nde ola ungamenya okwo ata reke n'e kualuka, n'e kutchurekera e miyisha e nyuma saye, na batcha, e nderekero y'e shano, n'e nderekero y'e tchinywebwa, era mw'Enawetchu, Ongo wenyu? ¹⁵ Muhut'e kaperere mwa Sayuni, mutchese saumu, mukundamany'e mukundamano munene. ¹⁶ Mukundamany'e bandju, mutches'e mukundamano, mukundamany'e bahosi, mukundamany'e bana, n'e batchilyi bw'ong'e mabere; muya mulume eeluke, atenge mwa businda bwaye, ne muya mukasi atenge mwa businda bwaye. ¹⁷ Oyo mukundamano, bakosi b'Enawetchu, balyire mwa kakatchi k'e atchere na e andju e kwanyira e nderekero. N a batete, ''Urek'e bandju bawe e Enawetchu, na tchiro ut'emera e mwimwo wawe wabwon'e honyi, kuyik'e lubaa lutambul'e ndonga sabwo; Kute banga teta e kakatchi k'e bandju, 'Ngayi Ongo wabwo alyi?'' ¹⁸ Amwo mango mw'Enawetchu abwen'e mufula kwa bushi n'e tchiwo tchaye, era kubabalyira e bandju baye. ¹⁹ Enawetchu era kuhusa, era kubir'e bandju baye, ''Mulolae, nyinga bareter'e bilyo, n'e divai, n'e mafuta, nenyu mungeuta kw'ebye bilyo; na tchiro nda tchihube kubayira honyi mwa kakatchi k'e lubaa. ²⁰ Si kweyine e barwanyi batengaa e bushoshokero bw'e suba, nyika bakabulyira bure nenyu, nanyi nyinga bakolokanya kuyik'e mwa tchiwo tchumu n'e tchitalyi mwo kandju; e tchande tchaye tch'e muhondo tchingaya mwa nyandja y'e bushoshokero bw'e suba, n'e tchande tchaye tch'e nyuma tchingaya mwa nyandja y'e masina; n'e butchunde bwaye bung'eruk'e ndonga, n'e kubeya kwaye kubi kung'eruk'e ndonga, kwa bushi ayilyir'e bitashingenene. ²¹ U tchiwo, ut'obwowaa; u shaaluke n'e kumwowa; kwa bushi Enawetchu ayilyir'e bisomerene. ²² Mut'obwowaa, mu nyama s'omw'erungu; kwa bushi e bitchi by'omw'erungu bitan'e bitchi biyaya, n'e mutchi ola w'ende wan'e bifuma byawo, e mtini n'e mzabibu yan'e misi yaye. ²³ Batcha, mushaalukae! Mu bana b'e Sayuni, mushaalukir'Enawetchu, Ongo wenyu; kwa bushi yi w'ende wab'eresa e nvula, kwa luero lwaye lw'e kunalyi, naye ende abaw'e nvula, nvula y'e mbondo, nga butanzi. ²⁴ N'e ngulyi s'ingehula ngano, n'e andju e kubik'e divai n'e mafuta ang'ehula. ²⁵ Nanyi nyinga baalulyira e myaka yalyibwaa n'e nziye, n'e parare, n'e madumadu, n'e tunutu, tchi tchikembe tchanyi tchinene natchumaa e kakatchi kenyu. ²⁶ Nenyu mungaly'e bilyo busibu n'e kwiuta, n'e kulyikusa e sina ly'Enawetchu, Ongo wenyu, waba yilyiraa e by'e bisomerene; n'e bandju banyi bataka tchibwona honyi tchiro n'e hitcha. ²⁷ Nenyu munga menya okwo nyilyi e kakatchi ka Israeli, n'e kumenya okwo nyono nyi Ongo wenyu, na okwo kutalyi undji; n'e bandju banyi bataka tchilyibuka tchiro n'e hitcha. ²⁸ Na kuyika bingaba, e nyuma s'ebye, oko nyinga sheshera muka mweru wanyi e ndonga s'e bet'e mubilyi bwoshi; n'e bana benyu, e batabana n'e banyere, banga reba, e bahosi benyu banga lot'e biroto, n'e batabana benyu banga bwon'e bibwonekeresi. ²⁹ Kandji, e ndonga s'e bakosi benyu, e balume n'e bakasi, mw'es'e siku, nyinga shesha muka mweru wanyi. ³⁰ Nanyi nyinga los'e bisomerene mwa kakatchi k'e nguba n'e butala, e mikira, n'e mulyiro, n'e muse. ³¹ E suba lyinga alulwa kuba mwisimya, n'e mwesi kuba mikira, e muhondo olo lusiku lw'Enawetchu luyike lulyi lukulu na lw'e kushalyimya. ³² N bikabya, ola mundju woshi uka balangira e sina ly'Enawetchu, yi uka fumisibwa, kwa bushi mwa ndjulungu y'e Sayuni n'omwo Yerusalemu mukab'e bandju baka fumisibwa, ng'okwo Enawetchu atetchire, ''Na mwabwo baeke bashibire Enawetchu abalangire.''