¹ E mwasi w'Enawetchu w'eshiraa Yoeli, mwana wa Pethueli. ² Onvilyisa binera, mwabwo bahosi, munvilise, mu besha tchine tchiwo. Kute! Binera byera bibere mwa siku senyu, ilyi mwa siku sa b'eho? ³ Mubir'e bana benyu e mwasi waye, n'e bana benyu baka bira e bana babwo, n'e bana babwo bakabira etchindji tchibutchi. ⁴ E bya rekibwaa n'e tchuuka-uka byera kulyibwa n'e nziye, n'e bya rekibwaa n'e nziye byera kulyibwa parare; n'e bya rekibwaa n'e parare byera kulyibwa n'e madumadu. ⁵ Mutenge mwa bulalwe mu balalwe, mulyire; mulakange, mubwoshi mu mwenyire mwamw'e divai; kwa bushi n'e divayi yiyaa; kwa bushi mwakabulyirwe bure n'e mwonu menyu. ⁶ Kwa bushi e lubaa lwerukir'e ndonga s'e tchiwo tchanyi, tchet'e misi, kandji tchitete luero; e meno maye kumalyi nga meno ma bulyi, naye et'e magego nga ma bulyi bukulu. ⁷ Era kusheresa e muzabibu wanyi, era kufum'e mutini wanyi; era kukula e bifufu byaye e kunalyi, era kuukumbaasa kwa tchitaka; e matabi mawo mayilyire kuba meru. ⁸ Uyir'e mishibwo nga munyere wimber'e busunzu kwa bushi n'e mutabana w'enyere lyaye. ⁹ E nderekero y'e shano n'e nderekero y'e mafu byakaburwe bure n'e nyumba y'Enawetchu; abwo badjindji, bakosi b'Enawetchu, bendjire bayir'e mishibwo. ¹⁰ Ehwa lyasherere, e tchiwo tchilyi mwa mishibwo; kwa bushi e biumbulwa byasherere, e mafu mayaya mwomire, e mafuta mwondjire. ¹¹ Mutchikubule mu bayinzi, mulakange, mu mwende mwalanga e mizabibu; kwa bushi n'e ngano n'e shiyiri, kwa bushi e biumbulwa by'e mahwa byelyire. ¹² E muzabibu wasimire, e mutini nao welyire; n'e mukomamanga n'e mutende n'e mutofaa, batcha; e mitchi yoshi y'e mahwa y'omire; batcha, e bushaaluke bw'omire mwa bandju. ¹³ Mutchisese mulakange, mu badjindji; mulakange busibu, mu bakosi b'e nderekero; mwishe muondjere e butchufu bwoshi mwa kakatchi k'e masunzu, mu bakosi ba Ongo wanyi; kwa bushi e nderekero y'e shano n'e nderekero y'e tchinywebwa byanzibirwe mwa nyumba ya Ongo wenyu. ¹⁴ Mutchese e saumu, mubalangire e mukundamano w'e dini, e bahosi bakundamane e beshe tchiwo bwoshi; baye bwoshi mwa nyumba y'Enawetchu, Ongo wenyu, n'e kumulyilyira Ongo. ¹⁵ E bwanya bwo luno lusiku! kwa bushi e lusiku w'Enawetchu lulyi pofi, nalo lungesha nga busheresi bwateng'e mwaye yi nyinabye. ¹⁶ Kute! E bilyo bitakabulyirwaa bure e muhondo s'e meho metchu? Na batcha, e bushaaluke n'e masheka bure n'e nyumba ya Ongo wetchu? ¹⁷ E mbuto sibwolyire e masina m'e butaka mwaye; e ngulyi sarekirwe busira kandju; e andju e kuyilyira e mbuto afunyikire; kwa bushi e biumbulwa byomire. ¹⁸ Ng'okwo e nyama sende salwala! Ebikembe by'e ngafu byatambukere, kwa bushi bitet'e bitchi; N a batcha, e bikembe by'e bibusi byabwen'e malyibukwo. ¹⁹ Ee, Enawetchu, nikulyilyilyire; kwa bushi e mulyiro walyire e bitchi by'omw'erungu, n'e ngunyekunye s'e mulyiro sasheresis'e mitchi yoshi y'e mahwa. ²⁰ Na batcha, e nyama s'omwo mahwa sakulakangira woyo; kwa bushi e hokololo s'e meshi somire, n'e mulyiro washeresis'e bitchi by'omw'erungu.