¹ Kwa bushi, mulolae, ese siku na mwo mango, nyika alulyira e bahwekwa b'e Yuda n'e Yerusalemu, ² nyika kundamanya e nyibaa soshi, nanyi nyika bareta e masina mwa lubanda lw'e Yehoshafau, n'eye yi nyika batchindjibusa kwa bushi n'e bandju banyi, na kwa bushi n'e mwimwo wanyi, bu babashandabanyaa e kakatchi k'e lubaa, n'e kuaba e tchiwo tchanyi. ³ Nabwo bahutchilyir'e bandju banyi e buhonga, n'e mwana w'e mulume bamwanyire ilyi babwon'e tchihungu, n'e mwana w'e mukasi bera kumuusa ilyi babwon'e divai, ilyi bamwa. ⁴ Na batcha, nenyu mulyi kandju katchiye era nyilyi, mu Tiro, ne Sidoni, n'e biwo byoshi by'e Filistini? Kute! Muka nyialulyira e lwembo?Ilyi mukaalyira mwasi woshi woshi? Fuba fuba nyika baalulyira e lwembo lwenyu e ndonga s'e matchwe menyu mubeyine. ⁵ Kwa bushi mwatolyir'e faranga sanyi n'e milyinga yanyi, nenyu mwera kutola e bikayi byanyi bibuya by'e kusimisa, n'e kubiingisa mwa tchunisa tchwenyu. ⁶ Kandji e bana ba Yuda n'e bana b'e Yerusalemumwaba usise e mwe Bayunani; ilyi mub'eka bure n'e nyibibi sabwo. ⁷ Mulolae, nyinga basusa ilyi batenga eye andju woshi mwa bausaa, nanyi nyika baalulyira e lwembo lwenyu e ndonga s'e matchwe menyu mubeyine. ⁸ Nanyi nyikausa e bana benyu n'e banyere benyu, n'e kuba bika mwa mabwokwo m'e bana ba Yuda, nabwo baka bausa e mw'e bandju b'e Sheba, e lubaa lulyi bure busibu; kwa bushi Enawetchu yi watetchire ono mwasi.'' ⁹ Mushambale binera mwa kakatchi k'e lubaa, mutches'e ndambala, musus'e barwanyi; e bandju b'e ndambala basheerere, b'eruk'e ndonga. ¹⁰ Mutas'e fuka senyu sibe mapanga, n'e bimbunga byenyu mabe mafumwo, ola ulyi mutambukare atete okwo, 'nyilyi munyake.' ¹¹ Muyire fuba fuba, mwishe, mu nyibaa soshi, mutchikundamanye alauma; n'eye wandaase e barwanyi bawe bwoshi, Enawetchu. ¹² E lubaa batchisese, b'eruk'e ndonga mwa lubanda lw'e Yehoshafau, kwa bushi eyera yi nyik'ekala e mango nyikaba natchindjibusa e nyibaa soshi e byande byoshi. ¹³ Batcha, Mubik'e mundu, kwa bushi e biumbulwa by'era byelyire, mwishe, mubirate; kwa bushi e tchitchilyi tch'ehure, n'e mitchindji yasheshekere, kwa bushi e mabi mabwo mera malyi manene busibu.'' ¹⁴ E mukundamano munene, mukundamano munene, ulyi mwa lubanda lw'e kushir'e mandja. Kwa bushi e lusiku lw'Enawetchu lulyi ofi, mwa lubanda lw'e kwishir'e mandja. ¹⁵ E suba n'e mwesi byabikirwe mw'e mwisimya, n'e ngununu sarekir'e kulomeka. ¹⁶ N'Enawetchu aka ruruma kuteng'e Sayuni, akana e murenge waye kuteng'e Yerusalemu; n'e mbingu n'e butala bikakukumana; si kweyine Enawetchu akaba eshayiro ly'e bandju baye, na andju a kutchibisha w'e bana b'e Israeli. ¹⁷ Na batcha ku mukamenya okwo nyono nyi Enawetchu, Ongo wenyu, nyi nyiker'e Sayuni, murukwo wanyi utchere; mu mango Yerusalemu ukaba mutchesibwa, na tchiro e baenyi bataka tchirenga mwo. ¹⁸ Kandji lukaba olo lusiku, e mirukwo ika'ndaas'e divai yaloka, n'e tchurukwo rukwo tchuka'as'e mata, n'e hokwololo soshi s'e Yuda sikan'e meshi mengi; n'e hokwololo yik'e lukira mwa nyumba y'Enawetchu, n'e kumwes'e lubanda lw'e Shitimu. ¹⁹ Misri itakaba mwo kandju, n'e Edomu lukaba lukiya lw'e kunalyi, kwa bushi n'e bubi bayilyiraa e bana b'e Yuda; kwa bushi basheshir'e mikira yitet'e bubi mwa kakatchi k'e tchiwo tchabwo. ²⁰ Si kweyine Yuda akalama e myaka n'e myaka, ne Yerusalemu kutengers e ychibutchi kwa tchindji. ²¹ Nanyi nyika tchesa e mikira yabwo bala ndafiraa kuyitchesa; kwa bushi Enawetchu yi w'eker' Sayuni,