¹ Batcha, netchu kunoko, e kuba tchusungurwe na lwakungu lunene lw'e baamlyisa balyi nga bano, batcha, tchubike bure netchu, ngasi musiwo musito, n'e byaa bira bitchusungure ilyi bitchuhwekire kwa busibu; na batcha, tchube bakuhuta ilyi kuyira e ndambala mwa bita ilyi ndambala s'ilyi e muhondo wetchu. ² Tchube tchumulolyire Yesu, nga mundju w'e kutangilyisa n'e kuyikilyisa e bwemere bwetchwu; oyola Yesu, kwa bushi n'e bushaaluke bwabaa bulyi e muhondo saye, era kwemera kweka e musalaba ilyi tchimanyi, n'ekukula e honyi, na Yesu era ekere mwa kuboko kulyo kw'e tchifumbi tch'e bwami tcha Ongo. ³ Kwa bushi n'oko, musime busibu oyo w'emera ekweka e masibu manene malyi ngamwo m'e bandju bendee bayira e byaa e ndonga s'e kalamwo kabwo beyine, muteshaa kutama, mungesha kwola mwa mitchima yenyu. ⁴ Tchiro, mutasa kuyira e ndambala kuyika e kushesha e mikira, muyimane n'e byaaa. ⁵ Kandji mwebilyire mala mano, matetchire nenyu nga kuteta n'e bana, "Mwana wanyi, uteebilyiraa e kualukirwa n'enawenyu, Kandji otafaa e mutchima emango wakalyiyirwa naye, ⁶ kwa bushi oyo enawetchu asimire, ende amualukira, Naye Ongo ende ahuta waye ola asimire." ⁷ Na bushi, e ndonga s'e kualukirwa ne Ongo kumwende mwaba mulyi b'ekunalyi; Ongo abayilyire ilyi abakorere nga bana; kwa bushi alyi mwana mutchiye ola utanga alukirwa n'eshe? ⁸ Na batcha, nga mungaba mutalyi bakualukirwa, ku kulyi kuterene bwoshi, ilyi mwera mulyi bana ba mukasi w'e mbuwa, si mutalyi bana ba mukasi w'e kunalyi. ⁹ Na alauma n'oko, netchwu tchwabaa tchwete ba tata b'e mubilyi bala bendee batchualukira, netchwu tchwera kubakenga. Batcha, ilyi bitalyi bibuya busibu kutchibika e masina ma tata wetchu w'e mitchima yetchu n'e kulama? ¹⁰ Kwa bushi, bilyi by'e kunalyi, abwola e nyuma sa siku sieke, bera kutchuhubira ilyi kutchualukira ngoko beyine babwonaa bilyi bibuya; si kweyine yeki kwa bunguke bwetchu, ilyi tchuala kuyikilyira e butchesibwa bwaye. ¹¹ Ngasi butchindjibuke e kashangi kabwo butabwonekana kuba kandju ka bushaaluke, si ka bute ilyi malumwa; si kweyine obwo butchindjibuke e nyuma lyi bwende bwabaretera abwo babukomere e maree m'e kulyi m'et'e bwolo. ¹² Kwa bushi n'oko, mulambule e maboko marembire ilyi manoyire n'e mafi marembire. ¹³ Muyilyire e maulu menyu e ndjira sikubukire, ilyi e kandju kalyi kw'e burema kata terekaa, si kweyine akwo kandju kalame ilyi kafume. ¹⁴ Muhonde kwa bushibilyisi e kuba n'e bwolo ne bandju bwoshi, n'obwo butchesebwe, kutalyi e mundju woshi ola ukalola ku enawetchu nga atabwete. ¹⁵ Mulorerese busibu e mundju woshi atakulumbiraa e lukoo lwa Ongo; etchisina tch'emalumwa tchingesha kusuka n'ekubalyibusa; na bandju bengi bangesha kubikwa mw'e bubi kw'oyo mwasi. ¹⁶ Kutabaa etchihungu ilyi eutemere Ongo ngokula Esau, yi wausaa e bwime bwaye bw'e kubutchwa mutanzi kwa bushi n'e bilyo bya lyiuma. ¹⁷ Kwa bushi mumenyire oko atatchialaa kubutola tchiro angaba ahondaa ekwima e migisho, era kulayirwa (kwa bushi ata bwonaa e andju e kutchiundjusa), tchiro angaba abuhondaa busibu kwa malyira ilyi mihonyi. ¹⁸ Kwa bushi mutayikilyiraa e muruko unga ala kuatchibwa kwo, e wakorera ilyi aulumira kw'e mulyiro, ilyi lwakungu lwerafulu, n'e mwisinya, n'e mbusi, ¹⁹ n'e mukulumiro w'e ngunga n'e murenge w'e myasi; bala bayunvire, bera kweme babirwe yindji myasi; ²⁰ kwa bushi, bata alaa kubabalyira oyo mwasi watetchibwaa, tchiro n'e nyama ilyi inga atchire k'oyo muruko angahutchi bwa n'e makoyi. ²¹ N'ebye byabwonekanaa nga bya kushalyimya, tchiro ne Musa era kuteta, "Nasimbirwe n'e bwoba n'e kuku kumana." ²² Si kweyine mwabo mwayikilyire kw'oyo muruko w'e Sayuni, n'oyo musi wa Ongo usene, Yerusalemu y'e mbingu, na ebikembe bya ba malaika banene. ²³ Mukundamano munene n'e kanisa k'ebabutchwa batanzi bandjikirwe mwa mbingu, ne Ongo mwishi w'e mandja w'e bandju bwoshi, n'e mitchima y'e bandju bala b'e kunalyi, ²⁴ ne Yesu, ndjumwa y'e malaanyo mayaya, n'e mikira y'e kushesherwa kwo, mikira y'e kuteta e mabuya kulusha ilyi kureka e ya Abeli. ²⁵ Lolaa, mutalayiraa oyo utetchire. Kwa bushi, nga bala bamulayiraa batatchungukaa, ilyi kufuma, oyo wabaanulaa endonga s'e tchiwo, na batcha, netchwu tchwutakatchunguka ilyi kufuma ilyi tchungatchiberula n'oyo watchwaanula kutenga e mbingu. ²⁶ Oyola yi e murenge waye akukumanyaa e butala akwo kashangi; si kweyine batcha, era alaanyise n'e kuteta, "Kandji lyindji lyiuma nyikakkukumanya ata e butala bweyine, si n'e mbingu naye." ²⁷ Si kweyine oyo mwasi, kandji mango mauma, atetchire e kana ngana kwa, akahamisa ebye bingaala ekukukumanyisibwa, nga bindju ilyi bikayi byaremirwe, ilyi e bindju bitangaala kukuku manyisibwa, bikale. ²⁸ Na batcha, e kuba tchwangilyire e mwami butangaala ku kukumanyi sibwa, na batcha, mube n'e lukwoloo, kwa bushi kurengera olwo lukwoo tchwumuyilyire Ongo e meyilyisa m'ekumusimisa, alauma n'e kutchirembuya, n'e bwoba ilyi kutchitchesa. ²⁹ Kwa bushi Ongo wetchu, alyi mulyiro ola w'e kulya.