² Kwa bushi n'oko, kw'e bahosi betchwu ba mira baamilyisibwa e kulyi. ³ Kwa bwemere kutchumenyire kwa e butala bwaremi bwaa kwa mwasi wa Ongo, tchiro e bindju byende byabwonekana, bitayirwaa kwa bindju bilyi by'e kunalyi. ⁴ Kwa bwemere Abeli era kwamwanyira Ongo e nderekero ilyi yibuya busibu kulusha Kaini; kwa bushi n'oko era kwamilyisibwa kw'alyi w'e kunalyi; Ongo era kuamilyisisa e ndjulo saye, kwa bushi n'oko, tchiro angaba afire, atchilyi ateta ilyi atchilamire. ⁵ Kwa bwemere Enoki era kuamisibwa asene, angesha kunwona e lufu, tchiro atabwonekanaa, kwa bushi Ongo yeyine yi wamuamisaa; kwa bushi e muhondo s'e kuamisibwa, abaa amilyisibwe kwa asimisibwe ne Ongo. ⁶ Si kweyine, busira bwemere bitangaalyikana e kusimisa Ongo; kwa bushi e mundju woshi ola wende wamuendera Ongo, ashingenene amenye kwa Ongo walyi, n'oko endeeresa e lwembo abwo bamuhonda kwa bushibilyisi. ⁷ Kwa bushi, e mango Nuhu abaa era abirwaa ne Ongo, kwa myasi era yitasa kubwonekana tchiro ne hitcha, kwa bushi n'oko abaa amwemere Ongo, era kwibaka e bwato (safina), ilyi aala e kutchungula e nyumba yaye. Na batcha, Ongo era kutchindjibusa e butala bw'e byaa, Nuhu era kuba w'e mwimwo w'e kunalyi ubwonekene kwa bwemere. ⁸ Kwa bwemere ilyi Abrahamu abalangirwa ne Ongo, era kwemera, atenge, aende ilyi aye e andju ala angeresibwa eeme; (mwimwo) era kutenga n'e kuenda ateshi n'er'aya. ⁹ Kwa bwemere era kwikala nga muenyi mw'etche tchiwo tch'e tchiraa ne, nga mwa tchiwo tchitalyi tchaye, era kwikala mwa hema alauma ne Isaka ne Yakobo, bu bakema alauma naye mw'oyo mwimwo yinoyo yinoyo. ¹⁰ Kwa bushi, Abrahamu endee alangalyira e musi wet'etchibandja, musi ola wawibaka alyi Ongo. ¹¹ Kwa bwemere tchiro Sara yeyine era kwangi lyira ilyi kutola e simi; na era arengise e kashangi kaye; kwa bushi abwonaa kwa oyo wamulaanyaa alyi mwemeresi. ¹² Na kwa bushi n'oko, bera kubutchibwa na mundju muuma, naye abaa alyi nga mufu, bandju banene kulusha e ngununu somwo mbingu, banene busibu na nga mutchanga ulyi kwa musike, ola utangaala kuandjibwa. ¹³ Abwo bwoshi bera kufa mwa bwemere, bata nasa kwangilyira etche tchiraane, si kweyine bendee batchilola kwo kutengera bure, n'e kwemera kwa babaa baenyi, na babalama kwa butala. ¹⁴ Kwa bushi, bala bende bateta e myasi ilyi ng'eye balosise e kunalyi kwa bahondjire e tchiwo tchabwo beyine. ¹⁵ Na nga bangakengere etche tchiwo batengaa mwo, bangabwene kwa baaluka ilyi bahubira mutche. ¹⁶ Si kweyine, batchifindjire ilyi kutchaanyira e tchiwo tchibuya, tchi tchiwo tch'e mbingu. Kwa bushi n'oko, Ongo atet'ehonyi kubalangirwa Ongo wabwo; kwa bushi abayilyilyi re ilyi abebakilyire e musi. ¹⁷ Kwa bwemere ilyi Abrahamu atangulwa ne Ongo, era kwana Isaka abe nderekero; n'oyo Abrahamu yi wendee wangilyira ebye biraane anaa e mwana waye, mubutchwa waye, mwana w'etchusha. ¹⁸ Na batcha, oyo yi wabirwaa ne Ongo, kwa mu Isaka mu e mulala wawe akatenga; ¹⁹ Abrahamu era kuba amenyire kwa Ongo anala kumufula mwa bafu ilyi kumukula mwa kuzimu; era kumutola kandji kut'eye kwa muanyi. ²⁰ Kwa bwemere Isaka era kugisha Yakobo ne Esau, tchiro n'omwo myasi era yikaba e nyuma s'e kufa kwaye. ²¹ Kwa bwemere Yakobo, ilyi eralyi mwa kufa, era kugisha ngasi muuma mwa bana ba Yusufu, era kutchikumba Ongo na ilyi eyamire e katchi kaye. ²² Kwa bwemere Yusufu, ilyi aba eralyi wofi kuyika e busnda bwaye, era kuteta e myasi y'e kutenga kw'ebana b'e Israeli, era kuteta ilyi kwana e myasi e ndonga s'emakinya maye e mango akafa kwa batamarekaa e Misri. ²³ Kwa bwemere Musa, ilyi abutchwa, era kubi shibwa myesi ehatchu n'ebasere baye, kwa bushi balolaa oko alyi mwana mubuya; tchiro batobwo waa e teeko lya mwami. ²⁴ Kwa bwemere musa, ilyi aba era mundju mukulu, era kulayira kubalangirwa mwana w'e mwalyi wa Farao; ²⁵ era kulola kwa kulyi kubuya ilyi kwa bulayilyire ekulyibuka alauma n'e bandju ba Ongo, alyi kutchi simisa mwa byaa kwa kashangi kaeke. ²⁶ Era kulola ilyi era kuandja kwa ekulyibusibwa kwaye e ndonga sa Kristo bulyi buare bunene kulusha e buare bw'e Misri; kwa bushi abaa alangalyire olo lwembo. ²⁷ Kwa bushi abaa akengire Ongo, kwa bwemere Musa ilyi ateng'e Misri, tchiro atobwoyire e butchindjibuse bwa mwami; kwa bushi abaa alyi nga endjire amulola kwo oyo utabwonekana ilyi atalorekana kwo. ²⁸ Kwa bwemere Musa era kuyira e Pasaka, n'oko kubi kwa kw'e mikira, ilyi oyo wendjire asheresa e babu tchwa baberebere atabaata kwo ilyi kubalaa kwo. ²⁹ Kwa bwemere e bandju b'e Israeli bera kurenga mwa nyandja y'e mikira (nyandja y'e Shamu), bera kushabuka ngokula e mundju angashabuka ala omire ilyi akalyire; ilyi e bandju b'e Misri nabwo bahond'ekuyira batcha, bera kusherera ilyi kufa bwoshi. ³⁰ Kwa bwemere e bitchumba byoshi by'e musi w'e Yeriko byera kukulumba, ilyi baba bera babisungulaa siku elyinda. ³¹ Kwa bwemere Rahabu, ola tchihungu, atashereraa alauma nabala baayisaa ilyi bat'emeraa, kwa bushi angilyiraa abwo batangusi ilyi ndjumwa kwa bwemere. ³² Nanyi tchiye neraa nateta kandji? Kwa bushi tchiro ebishangi bitanganyemerere e kureta ilyi kuteta e myasi ya Gideoni, ne Baraka, ne Samsoni ne Yefuta ne Daudi, ne Samweli n'e myasi y'e barebi. ³³ Abwola, kwa bwemere bubayimaa e misi y'e bami. Bera kuyira e kunalyi, bera kutola e tchiraane, bera kuhweka e bunu bwe ndare (simba). ³⁴ Bera kusimwa e misi y'e mulyiro, bera kufumisibwa kutenga mwa bukalyi bw'e bupanga. Bera kubikwa mw'e misi alyi e butambukare, bera kuba banyakire mwa ndambala, bera kukorokanya e barwanyi b'e baenyi. ³⁵ Ebakasi bera kutola e bafu babwo bafukire. Si kweyine e bandji bera kubabala busibu tchiro n'ekwitchibwa ilyi kunyiyibwa, batemeraa e butchunguke, ilyi baala kuyikilyira e kufuka kushingenene. ³⁶ Ebandji bera kutangulwa kwa lupalyi n'e kuhutchwa, na batcha, ebandji kwa kuhwekibwa, n'ekubikwa mwa buroko; ³⁷ bera kuhutchibwa kwa makoyi, ebandji bera kwishibwa kwa musumeni, ebandji bera kutangulwa, ebandji bera kwitchibwa kwa bupanga; bera kusungula sungula bembere enyiwu s'ebibusi n'ese mbene; babaa bakutchaanyira, n'e kulyibusibwa, n'ekuyilyi rwa e mabi. ³⁸ (Bandju bala e butala butabaa bushingenene ekuba nabwo), bendee basungula sungula mwa lukiya, n'omwo kakatchi k'e miruko ilyi ndjulungu, n'omwo bilyimbi, n'omwo bitobwore by'etchitaka ilyi tchiwo. ³⁹ Nabwo bandju bwoshi ilyi baba bera baamilyisibwaa kwa bushi ne bwemere bwabwo, bataangilyiraa e tchiraane. ⁴⁰ Kwa bushi Ongo abaa era atangiraa kutchubikira e kandju kalyi kabuya busibu, ilyi nabwo batabaa b'e kunalyi busira tchubano.