¹ E mukulukulu w'ebadjindji, era kuteta: e bindju kubiblyi batcha? ² Stesfano era kuhusa: Benye wetcgu na batata, munvae! Ongo w'etchunda, ayi kiraa tata wetchu Abrahamu, e mangoabaa e Mezopotamia, e muhondo aye e Harani n'ekumubi ra: ³ Tenga mwa tchiwo tchawe n'omwo mulala wawe, uye mwa tchiwo tcha nyinga kwereka. ⁴ Batcha, era kutenga mwa tchiwo tch'eBakal dayo, n'ekwikala e Harani. Eyera, enyuma s'elufu lw'eshe, Ongo era kumuyisa mwa mwikere mwo; ⁵ na atamweresa andju mwetche tchiwo, tchiro ala angabika e kuulu, si era kulaanya ekumweresa tche, n'ebangesha enyuma saye atanete mwana ⁶ Ongo era kushambala batcha: Ebabutchwa baye bakaba baenyi mwa tchindji tchiwo, nabo bakabayira bakobe, n'ekubalyibusa myaka maana mane. ⁷ Si etchirongo tchikabayira bakobe, nyi katchilyibusa nyono, Ongo erakuteta. Enyuma s'ebye, bakatenga n'ekunyikorera anola. ⁸ Ne Ongo era kweresa Abrahamu e tchiraane tch'ekwi shibwa; ne Abrahamu mwa kubuta Isaka, era ku mwishisa e lusiku lwa munane; Isaka era kubuta Yakobo, n'ekumwishisa, ne Yakobo era kubuta eku mi na babilyi, bahosi betchu. ⁹ Abo bahosi betchu, mwa kubera Yusufu e mu fula, bera kumuusa, ilyi ekibwa e Misri. ¹⁰ Si Ongo era kuba alauma naye, n'ekumutchungula mwa malyibuko maye mwoshi; era kumweresa e bwenge n'ekumweresa e bwolo e muhondo sa Farao, mwami w'e Misri n'e lubaa lwaye lwoshi. ¹¹ Kwera kuba e bsinya mwa tchiwo tchosi tch'e Misri, n'omwo tch'e Kanani. Emalyibuko mera manene; ne batata batabonaa ebilyo biterene. ¹² Yakobo era kunva kwa, ebilyo bilyi e Misri, na era kutchuma batata elyi tanzi tanzi; ¹³ N'oko lya kabilyi, Yusufu era kumenyekana ne benye wabo, ne Farao era kumenya, alyi mulala wande. ¹⁴ Enyuma, Yusufu era kutchuma engumo yaye baye kuhond'eshe Yakobo, ne ngumo yaye yoshi, ya bandju makumi malyinda na batanu. ¹⁵ Yakobo era kwandaalyira e Misri, y'anafiraa, ngoko batata nabo. ¹⁶ Na bera kwekibwa e Shekemu, n'ekubishibwa mwa shinda Abrahamu aulaa kwa faranga, emwe bana ba Hamori, eshe we Shekemu. ¹⁷ Ebishangi byera kuyika, ebyekuyikilyira kw'e biraane Ongo ayiraa emwa Abrahamu, n'elubaa lwera kuluwa n'ekuhuka eye Misri, ¹⁸ Na undji mwami era kwimuka mwa Misri, utamenyaa Yusufu. ¹⁹ Oyo mwami, era kuyira ebibi kwa mulala wetchu, era kulyibusa batata, kuyika kunyia ebana babo ilyi batalamaa. ²⁰ Mwako kashangi, Musa era kubutchwa, yi wabaa mubuya mwa meho ma Ongo. Era kulyisi bwa myesi ehatchu mwa nyumba y'eshe. ²¹ Na emango akabulyirwe, mwalyi wa Farao era kumu tola, n'ekumurembera nga mwana waye. ²² Musa era kwiyilyisibwa mwa bwenge bwoshi bw'eba Misri, na abaa w'ebuashe mwa myasi n'omwo biyiro. ²³ Era kuba ete myaka makumi mane, mu mango bya mwishilyire mwa mutchima kuya kutangula benye wabo, bana be Israeli, ²⁴ era kubona balyibusa muuma wabo, na era kumu lwira, n'ekuhuta emu Misri: ²⁵ era kutanya kwa benyewabo bangamenyerere kwa Ongo anga bere sise ebutchunguke kwa kuboko kwaye, si batame nyaa. ²⁶ E kusiku lwa kulyikiraa, era kwilukira ekaka tchi kabo, bendee balwa, na era kubanza kwa bwolo; era kubabira, benye wetchu: mulyi bauma; kute mwa lyibusanya muuma kwa undji? ²⁷ Si oyo w'endee walyibusa mulyikabo, era kumubira n'ekuteta: Nde, wakubikaa mukulu n'ekwish'ema ndja ku tchubano? ²⁸ Wahond'ekunyita, ngoku la weshe wetaa mwo olo emu Misri? ²⁹ Kwono mwasi, Musa era kushaa, n'ekuya kwikala mwa tchiwo tch'ebe Mediani, y'abutchiraa bana babilyi. ³⁰ Myaka makumi mane enyuma, malaika muuma era kumuyikira, mw'erungu ly'e ndjulungu y'e Sinai, mwa ngulumira y'endjitchi y'emulyiro. ³¹ Musa, mwa kulola batcha, era kusomerwa nebine bibonekeresi; na mwa kusheerera ilyi alo reresa, e murenge w'enawetchu era kunvikana: ³² Nyi Ongo wa b'eho, Ongo wa Abrahamu, wa Isaka na wa Yakobo. ne Musa, mwa kukukumana, ata alaa kuloreresa. ³³ Enawetchu era kumubira: kula e birato kwa maulu mawe, kwa bushi ano andju ulyi tchilyi tchi taka tchitchere. ³⁴ Nalolyire emalyibuko m'e lubaa lwanyi lulyi e Misri, nonvire emalyira mabo, na kunandaere kubatchisa, batcha, nyingakutchu ma e Misri.' ³⁵ Oyo Musa balayiraa, mwa kuteta, nde wakuyiraa mukulu n'ekwish'emandja? yi Ongo atchumaa nga mukulu w'ekuboola kwa ndjira ya malaika wa muyikiraa mwa ngulumira y'emulyiro. ³⁶ Yi Musa wabakulaa e Misri, mwa kuyira ebitangasa n'ebisomerene mwa tchiwo tch'e Misri, kwa myaka makumi mane. ³⁷ Oyo Musa yi wa biraa ebana b'e Israeli: Ongo akareta mu benyewe nyu murebi muuma nga nyono.' ³⁸ Yi, emango m'emukundamano omw'erungu, alyi ne malaika wamubiraa kwa ndjulungu y'e Sinai na alaum na batata, yi waangilyiraa emyasi y'eka lamo, ilyi atchuwe ye. ³⁹ Batata batahond'eku munva, bera kumulayira, na bera kwerekesa emi tchima yabo e Misri. ⁴⁰ Mwa kubira Aruni, utchuyilyire e baongo baend'emuhondo setchu; kwa bushi oyo Musa watchukulaa mwa tchiwo tche Misri, tchuteshi kut'abere.' ⁴¹ Na mwes'esiku, etcha tch'engafu, bera kwana endjulo kwa shushanyo n'ekushaaluka kwa biyiro by'emako mabo. ⁴² Arero, Ongo era kuaya, n'ekubana ilyi batchikumba e barwanyi b'embingu, ngoko byaandjikirwe mwa tchitabu tch'ebaerbi: Mwanyanyiraa endjulo n'enderekero myaka makumi mane mw'erungu, nyumba y'Israeli? ⁴³ Mwekaa ehema ya Maleki n'engununu ya Ongo wenyu Rafani, ebye bimbusa byayiraa kwa kutchikumba bye! Nanyi nyika beeka kutchiruka e Babiloni.' ⁴⁴ Batata baata mw'erungu e Tabernakle y'ebwamilyisa, ngoko atetaa, oyo wabiraa Musa e kuyiyira ngoko akalola. ⁴⁵ Na batata, mwa kutatola bera kwingisa, kwa kuhonda kwa Yoshua, mwa tchiwo tchabaa tchilyi tch'emilala Ongo ako rokanyaa emuhondo, n'ekwikala ye kuyika e siku sa Daudi. ⁴⁶ Daudi era kubona elukoo emuho ndo sa Ongo, n'ekwema bemuse ebushenge ku Ongo wa Yakobo. ⁴⁷ Na akwer'aba Sulemani yi wamwibakilyire e nyumba. ⁴⁸ Si, ewe ndonga at'ekala mwa yayi lyirwe n'emaboko m'ebandju, ngoko atchire emure bi: ⁴⁹ E mbingu tchi tchifumbi tchanyi, n'etchita ka tchi tchibikiro tch'emaulu manyi. Nyumba yi tchi ye munganyibakira, kw'enawetchu atetchire, ilyi ngayi angaba andju anyi e kutamukira? ⁵⁰ Ata kuboko kwanyi kukwayiraa ebye byoshi? ⁵¹ Bandju b'eosi lyisibu, mut'eshibwaa e mitchi ma n'ematchi, mwende mwa tchitenza e siku soshi ku muka mweru. Oko b'eho babaa, nenyu ku munalyi. ⁵² Nde murebi b'eho batatchindjibu saa? Bera kwita e bende bashambala e muhondo ekwisha kw'eulyingemene, yi mwanaa mwesine siku, mulyiko betanyi; ⁵³ mu mwangilyiraa e yano ku malaika, mutana mabikaa.... ⁵⁴ Mwa kunva eye myasi, bera kuba n'ebute mwa mitchima yabo, n'ekuowa emeno kuye. ⁵⁵ Si Stefano, ehure muka mweru, n'ekwerekesa ebuso bway'embingu, era kulola e bukuse bwa Ongo ne Yesu emangire e kulyo kwa Ongo. ⁵⁶ Na era kuteta: Nalolyir'embingu s'eukere, n'emwa na wa Ongo emangir'ekulyo kwa Ongo." ⁵⁷ Bera kuhuta lubi lunene, n'ekusiba ematchi, na bera kutchihuta kuye boshi. ⁵⁸ Bera kumweka enyuma s'emusi, n'ekumuhuta emakoyi. N'ebaamilyisa bera kubika endjimba sabo kwa maulu ma mutabana muuma ubalangirwa Sauli. ⁵⁹ Na bera kuhuta Stefano, endee ema n'ekute ta: Enawetchu Yesu, angilyira e muka wanyi." ⁶⁰ Na, ilyi akom'emafi, era kulakanga kwa murenge munene:" Enawetchu, uta baandjiraa etche tchaa." Na, enyuma s'eye myasi,era kuwondjera.