¹ Mwebye bishangi, e muandjo w'endjumwa era kuhuka, e Bayunani bera kutangira batetemba kwa Bayaudi, kwa bushi e bahumbakasi babo babe ngwaa kwa byendee byaabibwa ngasi lusiku. ² Ely'ekumi na babilyi lyera kubalangira ebandji baanda, n'ekuteta: Bitalyingamene tchureke e mwasi wa Ongo kwa kukorera ebilyo. ³ Tchi tchitchumire benye wetchu, muhombole mwa kakatchi kenyu bandju balyinda, bet'ebuamilyisa bubuya, behure muka mweru n'ebwenge, tchube rese ono mukolo. ⁴ Na tchubano, tchungaende rera tchwatchibika mwa memi n'oko bukoresi bw'e mwasi." ⁵ Ese ndanya sera kusimisa emukundamano. Bera kuhombola Stefano, mundju hwihur'ebwere ne muka mweru, Filipo ne Prokoro, ne Nikanoro, ne Timoni, ne Parmena, ne Nikola, ushinganene we Antiyokia. ⁶ Bera kubareta emwendjumwa. Ne nyuma s'ekwema, bera kubalambulyira kw'e maboko. ⁷ Emwasi wa Ongo era kulumilyira busibu na busibu, e muandjo w'ebaanda era kuhuka busibu e Yerusalemu, na banene mwa badjindji bera kuke nga ebwemere. ⁸ Stefano, ehure ebutchunguke n'ebuashe, era kuyira ebitangasa n'ebisomerene mwa lubaa. ⁹ Bandju bauma bw'omo Sinagogi, yabalangirwaa Sinagogi ye Mahuru na y'e Bakureni ne y'e Baskanderia, alauma n'e Bayaudi b'e Kilikia b'e Azia, bera kutangira babanganya Stefno. ¹⁰ Si batendee baala kwimanga kwa bwenge bwaye ne muka ola endee ateta nao. ¹¹ Arero, bera kureta ebandju b'enyifindjo sibi n'ekuteta: Tchonvaa Stefano ateta e myasi yibi y'ekukamba Musa ne Ongo." ¹² Bera kuteba elubaa n'ebahosi n'ebandjisi, ne kutchihuta kuye, n'ekumusimba n'ekumureta emuhondo s'eluhu. ¹³ Bera kureta e baamilyisa babi ne kuteta: Ono mundju atendjire areka kuteta e myasi yibi kwa andju atchesibwa noko maano; ¹⁴ Kwa bushi tchwamunvaa ateta kwa Yesu w'e Nazareti angasheresa anola, n'ekualula emaano tchwarekarwaa ne Musa. ¹⁵ Ebandju boshi babaa bekere mwolo luhu, bera kusesa emeho mabo ku Stefano, bera kulola ebuso bwaye bwera kuba nga bwa malaika.