¹ Aye! kwo kurhi oku! Ennoro yalangashanaga Kulya, galya masholo minja minja ci byacuyire! Ci amabuye gâli gayubasire aka-nyamuzinda Gakola gaba gashandîre omu njira? ² Abantu b'omu sayuni bayinjihaga nka nnoro lero kwo bakola balolwa nka rhubindi rhw'ibumba! ³ Ciru banyambwe bananyose abana babo. cikwone abantu bâni kwo bakola bayorha nka kanyunyi kaderhwa musambi ko karhakaliza abana bako. ⁴ Orhubonjo rhwabo rhwayumire ebiraka n'enyorha. abana barho bali balakira ebiryo. ci Ntaye wabaha byo. ⁵ Abantu bakag'ilya ebiryo binja, bakola bakaholera omu njira n'ishali. balya balimbaga kulya bakola bali balolera ebiryo omu camvu. ⁶ Ebyaha by'abantu b'e Yerusalemi byo bidarhi kulusha birya by'ab'e sodoma, abirundulwa ngungu nguma na Ntaye omuhumire kwo. ⁷ Abarhambo bamwo kwo balazagya nka safiri bâli beru beru nka marha, Bagwerhe omubiri gurhuzire nk'ibuye lya korayi. Emisi yakâlangala omu mibiri yabo Nk'ibuye lya safiri lishusha omunigi. ⁸ lero buno bakola baba biru biru bashusha enziro y'enyungu, ntaye weakacibatwire cigero omu njira aha balambamire, bayumire, bakola baba nka lushali. ⁹ Oyu batumirha akalumba afîre ye mukulu kulusha owafa n'ishali, omuntu arhak'ifa ayaba. ¹⁰ Ciru abakazi mpu bo balumwa n'omula gw'abana, bakâbayenda babalye mpu lyo balama balole erhi bacira ago malibuko. ¹¹ Nyamuzinda akunira arhalusa olugero, arhûla omujina oku Bantu. Ayokêra sayuni* kw'omuliro Gwayoca emisingi Yoshi. ¹² Abami b'en'igulu n'abantu bamwo barhamanyaga okw'omushombanyi akarhula enyumvi zâli omu mihango y'e Yerusalemi. ¹³ cikwone Okwo kwabîre, bajinji* n'abalêbi* bo bakudwirhe erhi mabi Gabo garhuma . Bakanyirha abantu bantu barhagwerhi byaha omu cishagala. ¹⁴ Abarhambo Baja batataba eyi n'eyi omu njira bâba nka mihurha, Emyambalo yabo yahumâna n'omuko, bahanza mpu Ntaye wabahumaga kwo. ¹⁵ Erhi abantu bakabwine bayishire banayakûzanye mpu: "Muyegûke, bayumânyire abo murhabayegeraga!" babula aha baja omw'igulu, bkarhabonaga cayigulira. okuhandi, bayaka barhanamanyiri ngahi Baja, abantu b'emahanga bakâbabwira mpu: " Abo barhâkacibêra kuno nsiku la!" ¹⁶ Nyamuzinda abashanda bulya arhacilonzagya abalole kwo, barhacikengaga Abajinji* erhi okukenga ihano ly'abagula*. ¹⁷ Amasu garhuhwera embuga rhwalinga owayish'irhurhabala, Mpâga ye! Rhwalinga owayish'irhurhabala, mpâge ye! Rhwamanya nti hali lubaga lwayish'irhurhabala rhurhalubonaga. ¹⁸ Omushombanyi arhulinga omu njira; Rhurhâcihulukaga, ensiku zirhu z'okufa zalinda zihika. ¹⁹ Abo bashombanyi birhu, kwo bali nka kula enyunda ehona emalunga. Barhuhîva oku ntondo, barhurhega olugogwe omu mpinga. ²⁰ Omwami wirhu Nyamuzinda ayimikaga, mpu arhurhegeke, ye rhwakag'iderha nti: "Oyu yeki warhuma rhwabona aha rhwabêra omu mashanja." lero y'oyo okola mushekere amaboko emugongo bamâmurhogeza omu mwina. ²¹ Mwe Bantu b'e Edomu, n'ab'e usi, musheke munashagaluke. cikwone ciru mukasheka, ninyu obu buhane bwacimugalukira burhume mwahabuka, mugende murhanayambîrhî nka balalwe. ²² sayuni* amabi gawe gababalirwe, orhacilulizibwe, cikwone weki Edomu, amabi gawe gacirhuma nyamuzinda akuhana, ayalagaze n'ebyaha byawe.