¹ Niono ndi muntu warhindibusire, erhi buhane bwarhenga omu bukunizi bwa Nyamuzinda burhuma. ² Amvuma ampêka omu mwizimya, Ci arhampebaga omu bulangale. ³ Niehe arhâhwaga arhampa buhane ngasi lusiku. ⁴ Ambuza olukoba lw'omubiri, amvuna entibadu. ⁵ Ampeba omu lugorhe lw'amalibuko n'amalumwa. ⁶ Anjugucira omu mwizimya guli nka gula abafâga mîra baba mwo. ⁷ Anyubakira ecôgo ntâkacîkûla mwo, cazinda ampira mw'enkoba. ⁸ nkolaga ndaka nti Nyamuzinda antabale, Mpâga ciru okunyumva. ⁹ Ampebera ehikango hy'olûrhe omu njira ampabulira omu njira mbi. ¹⁰ Aningira omu njira nka kula empangaza elinga anningûsa nka ntale ampamira kwo. ¹¹ Ampabwire anjonjaga n'ebirumbu, Ansiga bwamwa. ¹² Anfôlera omuherho gwage, akângerera kw'isaba. ¹³ Andasha n'emyampi yage, yantula amabunda gombi. ¹⁴ Abantu bakola bakalegerera banshekera, nie nkola lwimbo lw'omw'igulu. ¹⁵ Anyigusa ebiryo bilulu, ananywesa amîshi mahereke. ¹⁶ Ankugusa amabuye gankûla amino, amvumvuza n'omu luvu. ¹⁷ Ntacijira magala minja, Ntacijira na murhûla ntanacidêkerera. ¹⁸ Nkola ndi nabona oku ntâcilame, bulya nta bulangalire ncigwerhe kwo Nyamuzinda. ¹⁹ Nkagerêreza amalibuko gani n'obuligo ndi, binabe nka bwoge ndîre. ²⁰ Nka bikengera banantwe omurhima omu nda. ²¹ Haciri kantu kaguma kone kone kakacinshubiza omurhima omu nda. ²² Buli bula buzigire bwa Nyamuzinda, na Lula lukogo lwage lurhahwa, ²³ ngasi mango erhi ho binali, obwikubagire bwawe burhâluga wani! ²⁴ "Nyamuzinda ye ndesire nti bwo buhirhi bwani, Co cirhuma mmulangalira." ²⁵ Aba wa murhima mwinja kuli ngasi yeshi omulangalira, Aba wa lukogo kuli ola omukulikira. ²⁶ Okwo kwo kwarhuma, Rhugwasirwe rhulinde arhucize. ²⁷ Bulya kuli kwinja omuntu akâlembera amalibuko amango aciri musole. ²⁸ Ayorhe buhumba ahulikirire, bulya Nyamuzinda omuhizire oku lugero. ²⁹ Ayuname ashurhe ak'amalanga okw'idaho, alangalire oku nyamuzinda amurhabala! ³⁰ akâyerekeza owamushurha omwanganga, Arhânababale bijaci. ³¹ Bulya Nyamuzinda Aba wa bwonjo, Arhâkarhulîkirira ensiku zoshi. ³² Analibuze omuntu erhi anacimusîmire, bulya obuzigire bwage buba bunji. ³³ Naye arhaba alonzize abonese abantu nshonyi, erhi okulonza mpu abalibuze. ³⁴ Amango bali barhindagira ebigorogo bya muli cihugo cilebe, ³⁵ Amango bali bashonza Nnâmahango ow'Enyanya-bwenene omu kuja alenganya abantu, ³⁶ Amango bali batwa olubanja kubi, ka mpu nyamuzinda arhabona obwo? ³⁷ Nndi wundi wadesire akanwa kânaba? Nyamuzinda yene ye twa oku byaba. ³⁸ Akanwa Nyamuzinda aderhaga ko kalêrha aminja n'amabi byoshi emwage nga. ³⁹ Bici birhuma omuntu aja acîduduma anacizîne, Ngasi muguma akâlakira ebyaha byage. ⁴⁰ Rhuleke engeso zirhu mbi rhucîyunjuze Rhugalukire Nyamuzinda. ⁴¹ Rhusengere n'omurhima gwoshi, Rhulambûlire amaboko Emunda Nnâmahanga w'emalunga ali. ⁴² Bulya rhwajijire ebyaha rhwakugomera, nawe Nyamuzinda orhacirhubaliraga. ⁴³ erhi okunira warhushimbulula, warhuyirha buzira kurhubera bwonjo. ⁴⁴ Wacîfulika omu lwikungu mpu lyo orhag'iyumva omusengero gwirhu. ⁴⁵ Warhujira nka camvu Warhujira nka njalira omu kagarhi k'ezindi mbaga. ⁴⁶ Abashombanyi birhu bali barhushekera banali barhujacira. ⁴⁷ Rhuli omu malibuko omu mbaka n'omu bwoba, rhwanasherire. ⁴⁸ Nalasire nalakûla erhi kusherera kw'abantu bâni murhuma. ⁴⁹ Nalasire nahumbulukîrwe ntanacihulika, ⁵⁰ Ndi nalinga oku Nyamuzinda ahengûza Ahengûze âli n'enyanya abone, ⁵¹ Okw'abanyere b'omu cishagala cani; Babajîre cîrolêro. N'okwo kwanjijire mutula. ⁵² Abakâlonza okunyirhira obusha bali bampîva nka kanyunyi. ⁵³ Bankweba omu nyenga nanzine bagal'ikunungulira ibuye omu munwa gwayo. . ⁵⁴ Amîshi gangera enyanya, Naderha nti: ''Namafa wani!'' ⁵⁵ oku ndi omu nshinda waliha Nyamuzinda nakuyakuza, ⁵⁶ Wayumvîrhe erhi mmanda Endûlu: orhabulaga obuyumva oku ndi nalumba nabanda n'endûlu. ⁵⁷ Erhi nkuyakuza wanyegera washuza wambwira erhi: ''orhayobohaga.'' ⁵⁸ Nyamuzinda we wasambîre bulya, wafûngira omûka gwani. ⁵⁹ Nyamuzinda wabwine oku banjiraga bulya, muhânyi ombûlanage. ⁶⁰ Wabwine okw'abashombanyi bacîhôla nie, n'oku banjiriraga irhigi kwoshi. /v 61 Yagirwa nyamuzinda, Wayumvîrhe n'oku bali bampigira. ⁶² Enshambalo z'abashombanyi n'engerêrezo zabo za ngasi lusiku Nie ziba ziri kwo. ⁶³ Amango goshi, erhi nie banali bayimba. ⁶⁴ Mâshi Nyamuzinda obagalulire amabi, mabi gali nk'aga bananjiriraga. ⁶⁵ Obadundaguze emirhima, Gube gwo mulagi obahebire kwo. ⁶⁶ Obashimbire akalungu obahungumule, obakule en'igulu.