1 Echimanyiiso chaboneeka oku nkuba: habaneka omukazi mubwiike iizuba nka gw'omushangi, omweezi gw'amuuli omu lushando n'echimane chiri kwo e Ntonde zikimi nazibirhi uku irhwe. ² Aali hofi aburhe omwaana, namalumwa n'emikeero y'izimi byakamuyaamisa. ³ Echindi chimanyiiso cha boneka oku nkuba: haboneka omujoka muneene bweneene wa muko. oyo aali gwerhe birhwe nda na mahembe ikumi, aali gweerhe ishungwe oku ngasi irhwe. ⁴ Omuchira gwaage gwamanula chihimbi chiguma ch'omu bisharhu ch'e a Ntonde zoku nkuba, azikweeba en'igulu. Ayiimanga emalanga g'olya mukazi wali aburha omwana, mpu lyo hano oyo mwana aburhwa, amurhole, amulye. . ⁵ Oyo mukazi anaburha omwanarhabana, y'e warhambuula embaga zooshi nakarhi k'echuum. chikwoone oyop mwana alengezibwa ahekwa hali Mungu n'aha ntebe yaage. ⁶ Oyo mukazi ayakiira omu mpiinga mwo Mungu aaliamurheganyiize ah'abeera, mpu lyo abera ho analisibwe ho nsiku chihumbi namaga gabiri namakumi gali ndarhu. ⁷ Ago mango entambaala zazuuka enyanya e mwa Mungu. Mikaeli bona bamalahika baage balwiisa olya mujoka, n'oyo mujoka naba malahika baage balwisa mikaeli. ⁸ Chikwoone oyo mujoka ahimwa. ye boshi naba malahika baage barhachiyemereeragwa mpu babeere enyanya emwa mungu. ⁹ Oyo mujoka munene bweneene akwebwa embuga. Yeri erya njookaa yamiira ederhwa Lyangombe erhi Shetana, yerheba abantu booshi. Akwebwa omu igulu, bamalahika baaga nabo booshi bakwebwa haguma naye. ¹⁰ Enyuma ly'aho nayumva izu lineene omunyanya oku nkuba, lyaderha mpu: " OKu Mungu achiza kwahisirage! Mungu anayeerekinage obuhashe bwaage bwakaanabwaami! Kristu waage anayeerekinage obukulu bwaage! bulya olya wakaag'isidaka beene whirhu, olya wakaag'imanga emalanga ga Mungu oku basidaka bucha buyiira anakwebiirwe, akulwa enyanya emwa Mungu. ¹¹ Abo biirhu Bakristu bahimire erhi muko gw'Omwaanabuzi n'okuli baderhaga mpu byo birhuma: bayemeera okuhana obuzine bwaabo, bayemeera n'okufa. ¹² Cho chirhumirage mwe muli enyanya emwa mungu mweeshi mushagaluke niinyu mwe muyiba! chikwoone igulu n'enyanja nkurhi oku bihanyagiirage waani! Bulya lyangombe amuyandagaliire yo, anagayiirage bweneene, bulya amanyire oku hamusigalire kasanzi kasungunu bweneene." ¹³ Erhi oyola mujooka abona oku nakwebirwe omu igulu, arhondeera okushimbulula olya mukazi wa burhagaolya mwanarhabana. ¹⁴ Chikwoone olya mukazi ahabwa byuubi bibirhi b'yikozi lineene mpu lyo abalala mwo, ahike ahantu haage omupinga, mwo aliisibwa myaaka isharhu n'echimbi, halya eyo njooka erhachi mushiimbe. ¹⁵ Ago mango eyo njooka yaliika a miishi omu kanwa kayo enyuma ly'olya mukazi.Ago miishi kwo gaali nka miishi ga lwiishi luneene. Yali mpu lyo umuhusi gumuheka. ¹⁶ Chikwoone idaho lya rhabala oyo mukazi, lyayashama, lya mira galya miishi olya mujoka alikaaga omu kanwa kaage. ¹⁷ olya mujoka agaya oyo mikazi beneene akanya akola aj'ilwiisa abantu basigalaga bw'omu buuko bw'oyo mukazi, ngasi bayumvagya, n'okujira oku amarhegeko ga Mungu gadesire booshi, bo banalahire mpu barhankaleka okuli Yesu afuluulaga. ¹⁸ Ago mango olya mujoka ayimanga oku burhambi bw'enyanja.