¹ Olusiku lwa kasharhu Esta ayambala emishangi yage y'obugoli, ayimanga omu chôgo ch'endalala ch'enyumpa ya mwami; na mwami atamala oku ntebe yage y'oburhambu omu nyumpa ya mwami akalola ebwaluso lw'enyumpa. ² Erhi abona omugoli Esat ayimanzire omuchôgo, ayemererwa na mwami alambulira Esta akari k'ennoro alifumasire omukuboko. Lero Esteri ayegere hofi ahuma oku nshongongo ya kalya karhi. ³ Mwami abwira omugoli Esteri erhi: gurhi olonzize? na olwifinjo lwawe lw'oluhi? Chiru oluhande lw'echihugo wanachihabwa. ⁴ Esteri aderha erhi: Byakasimisa mwami waliha, anayishe emwani ene, mwami anayisha boshi na Hamani omu idinye nalimu reganyize. ⁵ Lero mwami aderha erhi. harhuli mulerhe Hamani lyo rhujira nk'oku Esteri adesire. Nantyo mwami na Hamani banahika omw'idinye emwa Esteri. ⁶ Lero mwami abwira Esteri erhi: banachiri banywa e Divai mpu: Bichi ochifinjire? wabihabwa! na olwifinjo lwawe luli luchi? chiru oluhande lw'obwami wanaluhabwa. ⁷ Esteri ashuza aderha mpu: waliha, omusengero gwani, n'olwifinjo lwani luli ntya: ⁸ Erhi akaba nyemerirwe embere za mwami, na mwami akabona bishinganine okumpa ebi na sengera n'okuhikiriza olwifinjo lwani, waliha mwami ashubi yisha bosgi na Hamani irhondo kandi, omu idinye nabarhegenyiza, lyo nanajiraga okwo mwami ambwizire. ⁹ Olwo lusiku Hamani ahauluka n'obushagaluke n'omurhima guchwemire, chikwone erhi abona oku Mordekai wali oku muhango gw mwami arhayimusiri mpu: amufukamire, omutula gwamugwarha enyanya lya Mordekayi. ¹⁰ Chikwone Hamani achihanga alekwa ntyo achigendera emwage; arhumiza oku bamuhamagalire abira aâge na mukage Zereshi, ¹¹ Naye Hamani arhondera abaganirira obunji bw'ebirugu byage n'obunji bw'abana bage, na ngasi byoshi mwami amujirire na nka gurhi mwami amukuzagya kulusha abandi bakulu n'abakozi ba mwami. ¹² Na bwenen Hamani aderha erhi: chiru n'omugoli Esteri ntawindi muntu anayegerezize haguma na mwami, omu idinye analirhegenyize nkaba niene, chiru na irhondo kandi andalisire haguma na mwami. ¹³ Chikwone ebyo byoshi birhanchi nsimisa omu mango nchiri nabona ola muyahudi Mordekayi achi atamala kw'ogula muhango gwa mwami! ¹⁴ Lero mukage Zerishi amubwira ntya: n'abira bage boshi haguma baderha: (Otulise) orhegenye omurhi gwa makano makumi garhanu oku buli, n'irhondo sezi sezi, ogende obwire mwami ahane irhegeko Mordekayi amanikwe oku ogo murhi lyoki wanaishi genda mweshi na mwami omu idinye erhi anakola oshagalusire. Erhi Hamani ayumva, asima bwenene, lero atula gulya murhi.