¹ Obwo budufu, mwami abu'iro, arhegeka mpu bamulerhere echitabu ch'amaandiko g'ebyajirikine, babisoma aha malanga gaage. ² Byabonekana oku Mordekayi asôngeraga Bigitana na Tereshi bâli bimangizi babirhi ba mwami amu bo bakâgilanga omuhango; abo balikola baniga mwami. ³ Mwami aderha, kahali oluhembo lw'olukengwa Mordekayi achimâbirwe okw'ago minja ajijire? Abakozi ba mwami bakâgimukolera( balahira) bamubwira oku ntacho choshi choshi ahâbirwe. ⁴ Mwami aderha, ndi oyo oli mu ngô? Bulya Hamani ali amadaha kugerera omu chogo ch'embuga ebwa nyumpa ya mwami mpu lyo amubwira oku bamanike Mordekayi oku murhi ali amarhegenya. ⁵ Balya bakozi ba mwami, bamubwira erhi: weliha Hamani yeri omu chôgo, ayimanzire omu ngô; Mwami aderha oku adârhe. ⁶ Hamani adâha; mwami amubwira erhi: Gurhi rhwanka jirira oyu muntu mwami olonzize okuhwa olukengwa? Hamani achibwira emurhi mpu, kahali owundi muntu mwami ankasima okuha olukengwa kundusha? ⁷ Lero Hamani abwira mwami erhi: oyo mwami asimire okuha olukengwa; ⁸ Bamulerhere emishangi y'akanyabwami eyo mwami akalugi yambala, balerhe n'echihesi chirya mwami akalugi shona kwo yene, bamuhebe kwo n'echimane ch'obwami akw'ikw'irhwe. ⁹ N'eyo mishangi nn'echo chihesi babifumbase muguma omu baganda ba mwami ola oshinganine, naye abiyambiyambike oyo muntu mwami asimire okuh'olukengwa , amushonye n'okw'echo chihesi kugerera omu muhanda munene gw'omulango, n'okujabuh'omushekera embere lyage, anaje aderha mpu: Ntyo kwo bajira olya muntu mwami asimire okuha olukengwa. ¹⁰ Buno buno oheke eyo mishangi n'echihesi nk'oku wanaderhaga, kwo n'okwo kwo wagenda ojirire Mordekayi w'omuyahudi, ola okab^ra oku muhango gwa aha bwami; ntabyo wahindamula omu ebyo byoshi waderhaga. ¹¹ Ago mango Hamani ah^ka elya mishangi n'echihesi ayambisa Mordekayi eyo mishangi amushoneza oku chihesi, aja amugeza omu njira nnene y'omu lugo erhi anaja abalanjira erhi ntya ko mwami anajirire omuntu ùwaùi asimire okuha olukengwa . ¹² Enyuma ly'oho Mordekayi agaluka ho gulya muhango gwa mwami, chikwone Hamani agenda arhalulwiri emwage erhi anakola afire omurhima n'irhwe lyage achirhumbikire. ¹³ Lero Hamani aka ganirira mukâge Zereshi n'abira bage boshi ngasi byoshi byamuhikire ! Lero abantu bage bali bw'obukengukwe, na mukâge Zereshi bamubwira erhi: Akaba oyu Mordekayi okola wakumuyunamira. Ali w'omw'iburha ly'emwa Abayahudi; wehe orhachimuhashe, Chikwone we okola wamuyunamira. ¹⁴ Erhi bâba bachiri bamubwira ntyo abimangizi b'enyumpa ya mwami baheka Hamani dubaduba okuja omw'idinye omugoli Esteri alirheganyize.