¹ Erhi Mordekayi achimanya ebyabire, lero achiberera kwo emishangi yage, ayambala obusunzu, achikweba omuluvu, agenga anahika omukarhi kw'olugo abalanjira okw'izu linene ly'obululu. ² Anayisha anahika oku muhango gwa mwami bulya ntamuntu wankahisire ho anayambirhe obusunzu. ³ Ngasi chihugo, halya irhegeko n'omulaliko gwa mwami gwahisire, bachishalisa banaja balaka n'okuyambala emishangi y'emishibona abanji bayambala amasunzu, n'okugweshera omu muvuu. ⁴ Lero abanyere abge n'abamabalikazi bomu mwage bamuhikira bamubwira emyanzi, lero omugoli agaya bwenene; ahekera Mordekayi emishangi lyo amuyambikalyo amuhola obusunzu chikoki yehe arhayemeraga. ⁵ Buzinda Esteri ahamagala Hadbaki muguma w'abimangizi bomu nyumpa ya mwami, aliregesirwe okukolera Esteri, amurhuma emwa Mordekayi, lyo amanya ebyo ngahi birhenzire na kulikubiderha gurhi. ⁶ Lero olya Habdaki ahulukira embuga agendera Mordekayi amushimana omulugo emelanga gw'omuhango gw'ekanabwami. ⁷ Lero Mordekayi amubwira byoshi byamuhikire, n'omuganjo gw'enfaranga Hamani arheganyize okuly'omuhako gwa mwami, mpu lyo Abayahudi banigwa. ⁸ Kandi amuhereza amaruba n'omulaliko gw'okuniga Abayahudi, gwalalikwagwa Eshunami, mpu lyo agendi langula Esteri, anamubwira, anamurhegeke agende emwa mwami, anamuyinginge anasengerere abantu abage. ⁹ Habdaki anagaluka ayisaha abwira Esteri emyanzi yoshi ya Mordekayi. ¹⁰ Lero Esteri aderha bona Hadbaki, achiri murhuma emwa Mordekayi aderha; ¹¹ Bambali bwa mwami boshi bamanyi okwo chirhu n'abantu b'omu bihugo bya mwami, oku omuntu yeshi yeshi; akaba mulume erhi mukazi, erhi akayishira mwami omu karhi k'olugo kw'olubako na mwami arhamuhamagire, hali irhegeko liguma ashinganie okunigwa, nkabaga abe olya mwami analambulire akarhi k'ennoro, lyo alama, chikoki niehe ntachihamagalwa okunyishe ebwami zikola nsiku makumi garhanu zino. ¹² Lero vbabwiraga Mordekayi emyanzi ya Esteri . ¹³ Naye Mordekayi abarhegeka oku bahekere Esteri ishuzo lidesire, woyo orhamanye mpu wehe wewachira omu nyumpa ya mwami, kulusha abayahudi boshi. ¹⁴ Bulya wehe okahulika bwenene omwaka kasangi, lyo oburhabale n'obuchire bw'abayahudi bwayisha omuzindi zindi njira, chikoki wehe washeshera haguma n'enyumpa yinyu (mulala), chiki ndigi wakamanya oku arhayishiraga obwami omu kasangi kali nk'ako? ¹⁵ Esteri arhuma abantu lyo bashuza Mordekayi, ¹⁶ Ogendi oshoboze Abayahudi boshi bali muno shushani, muchishalise enyanya zani, murhalye, murhananywe kasanzi ka nsiku zisharhu, budufu na mulegerege , na nani rhweshi na bambalikazi bani rhwachishalisa kw'onokwo. ¹⁷ Mordekayi anagenda ageijira nka kulya kwoshi Esteri anamurhegekaga.