¹ Kanguka, kanguka, wambar' imbaraga zawe, Sioni; ambar' imyambaro yawe y'umurimbo, Yerusalemu umurwa wera; kuk' uhereye none utakebge n'umwanduye batazongera kukwinjiramo. ² Ihungur' umukungugu, uhaguruke wicare, Yerusalemu; wibihor' ingoyi mw ijosi, yewe mukobga w'i Sioni wajyanyw' ar' imbohe. ³ Kuk' Uwiteka avuze ngo: mwanguzw' ubusa; na none muzacungurw' ari nta fez' utanze. ⁴ Umwami Imana iravuz' iti: ubgambere abantu banjye baramanutse bajya mw Egiputa basuhukirayo; abashuri barabarenganya babahor' ubusa. ⁵ None ndagira nte? ni k' Uwiteka abaza; kw abantu banjye banyazw' ari nta mpanvu! ababategeka barasakuza, kandi biriz' umunsi batuk' izina ryanjye. ⁶ Nonehw abantu banjye bazameny' izina ryanjye: kuri wa munsi bazamenya kw ari jy' uvuga. Dore ni jye. ⁷ Ereg' ibirenge by'uzany' inkuru nziza ni byiza ku misozi, akamaz' iby'amahoro, akazan' inkuru z'ibyiza,akamamaz' iby'agakiza, akabgir' i Sioni ati: Imana yaw' iri ku ngoma. ⁸ Ijwi ry'abarinzi bawe! baranguruye baririmbira hamwe; kuk' ubg' Uwiteka azagaruk' i Sioni, bazamwireber' ubgabo. ⁹ Ni muturagare muririmbire hamwe munezerewe, mwa myanya y'i Yerusalemu mwe yabay' imyirare, kuk' Uwiteka ahumuriz' abantu be, acunguy' i Yerusalemu. ¹⁰ Uwiteka ahin' umwambaro wo ku kuboko kwe kwera imbere y'amananga yose; impera z'isi zose zizabon' agakiza k'Imana yacu. ¹¹ Nimugende, nimugende musohokemo; ntimukore ku kintu cyose gihumanye; muve muri Babuloni hagati: yemwe bahetsi bahek' ibintu by'Uwiteka, marajye mwiyeza. ¹² Ntimuzavayo mwihuta, kandi ntimuzagenda nk'abahunga; kuk' Uwiteka azabajy' imbere; Imana y'Isiraeli ni y'izabashorera. ¹³ Dore, umugaragu wanjy' azakor' uby'ubgenge asumb' abandi, azashyirwa hejuru, akomere cyane. ¹⁴ Nkuko benshi bamutangariraga, kuko mu maso he hononekaye ntihase n'ah' umuntu, n'ishusho ye yononekaye ntise n'iy'abana b'antu. ¹⁵ Uko ni kw azaminjagir' amahanga menshi, abami bazumirirw' imbere ye, kuko bazabon' icyo batabgiwe; n'icyo batunvise bazakimenya.