¹ Bhate 'mbi turi na maa, twahwa iriya e bhutetera bwe bhatetera ,na nti tutesungi. ² Kinsi mwea munkati nitu wishee mwishima munachabho e uri kwihi nae mu byakoma morimwumba. ³ Ne bhuri Kirisitu nti weshimanga, iina na'mbu ebwatiranyiwa cho: er'ikutiko rambi bhakukambange byanikuruke. ⁴ Bhushwa e bhiti byatiranyiwa bhushe r'ituhana, mw'etukana ne riandira hima ne rininkwa e ramarama ininkanang' e mitiro, tubhesi na mwenyihiro. ⁵ E Ongo we muho na we ribhongabhonga wabhuninke mubhe ne myanikiro njo bhanu bhisine na bhisine itukana ne bhuri Yesu Kirisitu. ⁶ Bhushe mubunduki ne mwanikiri uma na mwebhe mwebe uma, kongo mutata Ongo tita wa Mukota witu Yesu Kirisitu. ⁷ Itukana nancho mukokani bhima mu bhampe e bhuri Kirisitu e bwabhukokenga we mor'itata Ongo. ⁸ Ngi chasingwa nebha mbu Kirisitu wakiirwanga mukobhe w'ebhet'ekotende, mor'ishea reira ra Ongo, mor'ibhereresha endani yaronjienga we bhatita. ⁹ N'e kuri e nti bhasimira bhatate ongo bhushwe bwe sa nsasi sae, itukana nebwatirwanyiwa cho: ngy'asingwa nsekutata munkati ne nti bhasimira na nakusimbeyo ndumbo s'ikutata mo rina r'abhe. ¹⁰ Charebwa tu bhuno: mumowe bhanu esanganda ne bhea bhae. ¹¹ Rebwa tu: mumoi Mukota, bhanu esanganda siti na mumutate bhanu e bhea bhati. ¹² Isaya webha: kwaatukayo musesa mo bhura bwae na wasimanayo n'esumba esanganda, esanganda sisebhesayo na mwenyihiro kuri we. ¹³ Ongo we mwenyihiro wabhurisiye ne ngoa siti ne bhuhoro e bhuti mor'isimira, bhushwa kongo murisiwa mo mwinyihiro we bhunkangwe bwe Mutima Mushasha. ¹⁴ Ani sine niri n'isimira mu roharo rwinu, bhanakitu mbu bhanu bhati murise na bhongo-bhongo, murise n'esibha riti,n'ikocha ihanana bhanu mu bhanu. ¹⁵ Itukampo nabhutiranyie e mitiro na bhunkangwe e bhuti mw'ibhusubhukia tu, bhushwa bwe nchumo eyar'eninkwa 'ni na Ongo. ¹⁶ Bhusha nibhesi mukori wa Kirisitu Yesu ntumwa we nti bharesimira, namakind' e murimo ngo wakonda wa Ongo, kongo nti bhasimira bhisimirwe bhabhesi ohembo rwkonda, rwashuururwa mo Mutima mutabheri. ¹⁷ Bhushwa na'ncho niri ne cha mwitate ani kuri Kirisitu Yesu mumbi bhinwa byakae Ongo. ¹⁸ Bhushwa nterekiyo ikimisha kinwa kiti irenga imbi e bya bherereshanga Kirisitu itukana nani muririsha e nti bhasimire mwi morikire, mo kinwa na mo mikorere. ¹⁹ Mo bhunkangwe bw'ebhishisharo n'etushingishiro, mo bhunkangwe bw' e Mutima Mushasha wa Ongo etukire ku Yerusaremu n' ebyuo bya kwendende iya ku Iririko rar'itura ko nguru emwasi wakonda wa Kirisitu. ²⁰ Narekwironjie otunda, mw'eture emwasi wakonda inko nti kwariturwa Kirisitu bhushwe kiro numba mu ntangiro ya umpe, etukana n'ebwaretiranyiwa cho. ²¹ Kuri mbi ntibariturirwa 'ni bhasungayo, na 'mbi nti bhorukiranga o bhaasimirayo. ²² Ngy' asingwa nabhesenga ntangenda kuri bhanu. ²³ E r' otu rweendayo ani ku Espanye nanikira, iya mu matu mingi nabhesanga na mwanikiri wiya kuri bhanu. ²⁴ E rutu nendayo ku Esipanyi, na nikira ibhusunga na nti netange, n'itindikiwa ninu, itukana ne rintindike rinu re sangoa e siri nani mo kashangi kima. ²⁵ Hano nenda ku Yerusalemu, mwikore e bhakirisito. ²⁶ Bhushwa bisa ku Makedonia na ku Akaya bhabhesa nti beninka momba wa mukongoro w'ebhasene munkati ebhashuururwa mwisake bho ku Yerusaremu. ²⁷ Nancho ngyabhesenga e murao wabho, na bhashima eninka bhoo, na kubha e nti bhasimira bhamaninkwa mihango mo ye Mutima, kai risondange mukori bho mo bhinwa byabho e bhiti. ²⁸ Nsekiya namakindanye e bhiti mbi, n'eninka bho emihango njo, nseeta ko kwinu, mwi enda ku Espanye. ²⁹ Nisi mbu muriya ko kwinu, nti mukisa mwingi wa Kirisitu. ³⁰ Nibuhemange, e bhanakitu, mo rina ra Nyerekuritu Yesu Kirisitu, na monchimi ye Mutima,mw'ikwana hima n'ani mw'iniheme kuri Ongo. ³¹ Mukiye mbo kongo netunja mo bhabhi bha ku Yudea ne mihango yarisha ani ku Yerusaremu isimirwe n'e bhakirisitu. ³² Kongo niya ko kwinu na ngoa kuti isasa ra Ongo, na kongo nashee iruhuka ninu hima. ³³ Ongo we bhuhoro wabhe ninu.