¹ Nariya Febe, mwisiitu, mu makako n'inu, iwe mukori mor'irameso ku Kenkurea. ² Kongo mumukoke mo rina ra Mukota,imbu wakomenwa ibhese uma mumbi bhashuururwa na kongo mumuangirira mu kinsi cha muraa muwe, bhushwa naye wamasake bhea bhingi, n'ani hotu wamakind'insake. ³ Munkereyanga Prisila na Akila imbi bhakoranga n'ani e murimo wa Mukota, Yesu Kirisito, ⁴ Bhashiang'e bhuingo bwabho kongo bhandamya. Na kokome bho, na nti an'isine, iina n'emarameso ati esanganda. ⁵ Mu 'nkereer'irameso ririkire mu mwabho. Mu'nkeree Epeneto, ing'washim'ani, iwe ng'etangi ya Kirisito mo Asia. ⁶ Mu 'nkereanga Maria, ing'wabhukorenga nguru. ⁷ Mu 'nkeree Androniko na Yunia, uanda rw'ani na ngi bhantindikiyanga mor'ibhisama ritu, n'abho bhakomenwa munkati n'esantumwa, n'abho bhansondorenga mor'ikime kumunda na Yesu. ⁸ Mu'nkeree Ampuliato, ing'washim'ani kumunda na Mukota. ⁹ Mu'nkeree Urubano, mukori hima n'itu kumunda na Kirisito na Staki, ing'washim'ani. ¹⁰ Mu'nkeree Apele, ing'wasimirwa kumunda na Yesu, Mu ;nkere bheya bh'e numba ya Aristobulo. ¹¹ Mu 'nkeree Herodio, mubuti wani. Mu 'nkeree bhea bh' e numba ya Narkiso, imbi bari kumunda na Mukota. ¹² Mu 'nkeree Tirifena na Tirifosa, bhakorengi Mukota nguru. Mukeree Pereside mukori nguru. ¹³ Mu'nkere Rufo, murondorwa kumunda na Mukota, na nina, nani koyo ho tu. ¹⁴ Mu'nkereyanga Asinkrito, Fuleyo, Herme, Patroba,Herma na bhanakitu imbi bhari hima n'abho. ¹⁵ Mu 'nkeree Filologo na Yulia, Nereo na mwisi 'abho, na Olimpa, n'ebashuururwa bati bhari hima n'abho. ¹⁶ Mukeane bhanu bhesine na bhesine n'ikokane ndi rashururwa. E marameso ati a Kirisitu abhukea. ¹⁷ Enompena nibhuhanange ebhanakitu, mwirange n'ebhashuanyi na bhakorange bhitikotiko, irenga e mahano areninkwa bhanu. Mubhekanga bho. ¹⁸ Bhushwa bheya bh'ebhususe mbo bhatangakore Kirisitu, Mukota w'itu, iina bhakorengi e mara abho, na mo bhinwa byabho byahehera na bhinwa byabho by'ibonganya, bhinoange mitima ya 'mbi bhakwirengi bhusa. ¹⁹ Ekuri bhanu, ebhurongu bwinu bhuri bw'ebhea bhati, bhushwa n'acha mubhesi bhateesa mu mbi byakonda, mu mbi byashuururwa, musungwe. ²⁰ Mumatu makeke, Ongo w'ebhuhoro waabhunguraa mushumbu mo mindi yinu. E nchumo ya Mukota Yesu Kirisito ibhesi n'inu. ²¹ Timoteo, mukori h'ima n'ani, wabhukea, na Lukio na Yasona na Sosipateri, bhabhuti bh'ani. ²² Ani Tertio 'ngu nibhutiranyiengi bhino, nabhukea kumunda na Mukota. ²³ Gayo, ingw'aniangiriranga, n'er 'rameso e bhati, bhabhukeya. Erasto, murangi w'e nku ye r'ubhungu, na musike w'abho Kwarto , bhabhukeya. ²⁴ E nchumo ya Mukota w'itu Yesu kirisito ibhesi hima n'inu. Amina. ²⁵ kuri 'ng'uri n'ebhunkangwe w'ibhusimanya itukana n'e mwasi wakonda n'e mahano a Yesu Kirisitu etukana n'erisheiwa re nama mu matu mingi. ²⁶ Eina byasheiwa run'otu mo mitiro y'ebhatahwa, mu momba wa Ongo w'ebhiranga 'bhiti na byasheiwa mo senganda 'siti kongo bharisiy'er'isimira, ²⁷ Kuri Ongo, wesine muteesa, wabhesi n'itatwa mo matu ati n'eati, kuri Yesu Kirisitu! Amina!