¹ E ngashani y' emet' asanu yabhuha mo kahanda. Nasunga nkekeni yamakire mo chuo etuka mo mbingu. Waninkw' echana ch' er' iyobhoro er' erunga; ² Na wobhora er' erunga. Kwataya mwiki etuka mor' erunga, bhuri mwiki wa mutura mukiri; n'e mwishi n' ekeme byabhesa mwerimya mo mwiki w' er' erunga. ³ Mo mwiki mw' asaa tukuku, twansansabhana mo chuo; na twaninkwa bhunkangwe buri bhunkangwe burikanga n' esankutu s' echuo. ⁴ Bhashishiwa bhabhish' ebhisu by' echuo, ari kisu kibhisi, ari muti uti uti, eina bhea ho imbi bhasir' ensimiko ya Ongo mo mbonso. ⁵ Bhaninkwa, ang'ishura, eina enubya bho mumyeri isanu; n' eminubho iseronjayo bho yabhesanga yasusana na minubho yarushiwa na nkutu, yamabhure mwea. ⁶ Mo matu 'ngo, e bhea bhasesondekanyayo er' oku, na bhatasheiyo ro; bhasesasayo ikwa, n' er' oku r' usebhekayo kore nabho. ⁷ E tukutu 'nto twabhesanga twasusa bhuri farasi satunganyiwa mu bhita; habhesanga hambasiro e mintwe yato bhuri twembo twasusa noro, n' esambaso sabho nti sirikire bhuri mbaso sa bhea. ⁸ Nti tukwengi buteo bhuri bhuteo bwa bhomina, n' emeno ato bhuri meno a ntare. ⁹ Nti tukwengi nguba bhuri ngubha ya chuma n' echanga ch' ebyubhi nti kirikire bhure tutibhita twa farasi singi sikanyirengi bhita. ¹⁰ Nti tukwengi mikira isusene na nkutu n' itwa, na mo mikira yabho ngy' abhesanga murikire 'bhunkangwe bw' er' enuby' ebhea mu myeri isanu. ¹¹ Nti tukwengi bhuri mubhake, engashani w' er' erunga, wabhikirwa mo kiebrania mbu Abadoni, na mo kigriki Apolioni. ¹² E mario aroso amakind' iyeta, sunga kweya tu ampe mario abhi kuruma nango. ¹³ E ngashani y' emutubha yabhuha mo kahanda. Na norukira murenge utukirengi mo sankaro s'inye s' er' irango r' e noro ririkire habhusondori na Ongo. ¹⁴ N' iebha n' engashani y' emutubha eyabhesanga n' ekahanda: obhor' esangashani sinye esaminwa mo rusi rukiri Efrate. ¹⁵ N' esangashani sinye abhesenga sarind' entambi er' otu, emweri n'e mwaka, bhobhorwe kongo bhashura e muhango uma w' eishatu w' ebhea. ¹⁶ E mwanso w' ebhari mo s' efarasi bh' er' eimba r' ebhakwani bhabhesanga nti bhichiri bhibhi bya bhichiri: norukir' emwanso. ¹⁷ Nampo nasung' esefarasi mor' isheiwa,na 'mbo bhabhesanga bhari hambasiro nato bhari na ngubha sa bhususe bwa kasha, nasa makoi a kanyiki na sa kibhiriti, n' emintwe y' esafarasi nti bhuri mintwe ya ntare, na mo monu abho nti musaange kasha, mwiki, na kibhiriti. ¹⁸ Muhango uma w' eishatu w' ebhea washurwa na' ngo mario ashatu, mo kasha, mo mwiki, na mo kibhiriti, byabhesanga bhitukange mo monu abho. ¹⁹ Bhushwa ekara k' esefarasi abhesanga kari mo monu abho na mo mikira yabho; e mikira yabho yabhesanga yasusa bhuri nsoka s' iri na mintwe , na muyo ngy' abhesanga munubhiengi to. ²⁰ E bhampe bhea 'mbi nti bhashurwanga nango mario bhatabunduki n'e murimo w' emine yabho mw' efund' ironjie mpero ebhashumbu, n'e tumoi tw'e noro na tw' efesa, na tw' eshabha, na tw' e makoi na tw' e miti, intu tutamukoch' ikae, n' iyorukira, n' ienda. ²¹ Na bhatabunduki mo bhurori bwabho, n'e maira abho, n' erosingirwa rwabho, ari n'e bwibhi bwabho.