¹ Kuruma nampo, nasunga ngashani sinye sisimene mo sankaro sinye s'echuo; nti sating' emayuhu anye echuo kongo kutetingi eyuhu mo chuo, ari mo nyansa, ari mw' anga na muti. ² Nasunga impe ngashani, nt' utayange w' endende n'e mwishi mor' isaa rao, nt' wating' ensimiko ya Ongo 'ngu 'ri ho; wakua mu mwengere wasuma kuri esangashani sinye insi sabhesanga samaninkwa ironj' echuo bhubhi, n'e nyansa, weba: ³ Kiro muronje 'chuo bhubhi, ari e nyansa, ari mo miti, iya tubhese nti t' wamariya nsimiko mo sambaso s'e bhakori bh' e Ongo witu. ⁴ Norukira e mwanso wa 'mbi bhariarwa nsimiko bhihumb' iyana na makumi anye na bhanye bh'esanganda siti s'e bhana bha Isiraeri. ⁵ Bh' er' oanda rwa Yuda, bhihumbi ekumi na bhibhi bhariarwa nsimiko; bh' er' oanda rwa Reubeni, bhihumbi ekumi na bhibhi; bh' er' oanda rwa Gadi, bhihumbi ekumi na bhibhi; ⁶ Bh' er' oanda rwa Asheri, bhihumbi ekumi na bhibhi; bh' er' oanda rwa Naftari, bhihumbi ekumi na bhibhi, ⁷ Bh' er' oanda rwa Simeoni, bhihumbi ekumi na bhibhi bh' er' oanda rwa Lawi, bhihumbi ekumi na bhibhi mo bh' er' oanda rwa Isakari, bhihumbi ekumi na bhibhi, ⁸ Mo bh' er' oanda rwa Saburoni, bhihumbi ekumi na bhibhi mo bh' er' oanda rwa Yosefu, bhihumbi ekumi na bhibhi; mo bh' er' oanda rwa Benjamina, bhihumbi ekumi na bhibhi bhariarwa nsimiko. ⁹ Kuruma nampo, nakae, nasunga, habhesanga kikembe kikiri, nti hasira mwea wamwansa cho, bh' esanganda siti, bh' ebhisasa bhiti, bh'e bhea bhati na bh' emyebhe iti. Nti bhasimana bhusondori bw' e kitumbi ch' ebhubhake na bhusondori bw' e mwan' emburi, bhambichiwa nganju sisanange na ntabhi sa miti mo mine yabho. ¹⁰ Nti bhakuange mu murenge wasuma, mw' ieba: E nchukayo ya Ongo witu ing' warika mo kitumbi ch' ebhubhake na kw' e mwan' emburi. ¹¹ N'e sangashani siti nti siri w'endende n' e kitumbi ch'e bhubhake, by'e bhakungu na by' e bari ho bhanye bhahita iya e sambaso sabo bhusondori n'e kitumbi ch'e bhubhake, bharonjie Ongo mpero. ¹² Mw' iebha: Bhibhesi mbo! er' itatwa, ebhusime, er' osubhahwa,e bhunkangwe , n' e maa bhibhesi na Ongo witu mo bhiranga n'e bhiranga bhibhesi mbo! ¹³ Na uma mo bhakungu wating' ekinwa wan' ire: Imbi bhambichiwa esa nganju sisanange, bhanye na bhatukange kuni? ¹⁴ Namw' ire: E Nyerekuritu, ongo 'si cho. Na wan' ire: Ibho ngi bhatukange mo mario makiri; bhashuang' esanganju sabho na bhasanya to mo nshama y'e mwan' emburi. ¹⁵ Bhushwa nancho ngy' asingwa bhabhese hamakako n' ekitumbi ch' ebhubhake cha Ongo, n' imukore mumwishi namutu kumund' er' irameso rae. Ing' warika mo kitumbi ch' ebhubhake wasebhumbe bho n' er' ihema rae habasirwa nabo. ¹⁶ Na bhatorukiriyo tu rwaka, bhatorukiriyo tu mbusha, e mwishi ari chuka kiti kiti bhitabhabhayiyo tu bo. ¹⁷ Bhushwa e mwan' emburi ing' uri munkati n' e kitumbi ch'e bhubhake, warishayo n' ienja bo ekunshoko s' emecha e karamo , na Ongo usekonoyo kiro kiti mo meso abho.