¹ Tiranya kuri engashani y' er' irameso ra ku Sardi: Sung' ech' ebha 'ng' uri n'e mitima irinda ya Ongo n' esankekeni sirinda: Nisi e mikorere yabhe. Nisi mb' umeta mw' ibhesa ongo 'shere, na nt' umakwa; ² Ukohyanga, na 'simik' echunda charindir' er' ikwa; bhushwa nti nakusung' emikorere yabhe 'mbu yarengekana hamakako na Ongo wani. ³ Esubhukie kwe bhuni bwaninkwanga ongo n'iyorukir' ekinwa, ranga cho nobunduke. Umafundi 'kohya, n'seya kuri ongo bhuri mwibi, n' utusibiyo mu ntambi singa ng' iseyayo ani kuri ongo mu nsisu. ⁴ Eina ongo 'ri na bhea bhima ku Sardi nti bharebhisha esangombe sabho; bhasebhungayo hima n' ani mu ngombe sisanange, bhushwa bhakomenwa to. ⁵ Ing' wasehima usambichiwayo ngombe sisanange; ntariribhanyiyo erina rae mo karisi k'e karamo, nanisetikoyo erina rae hamakako na Tita na hamakako n' esangashani sae. ⁶ Ing' uri na mate worukire 'nchi chebhang' Emutima mo marameso. ⁷ Tiranya kuri engashani y' er' irameso ra ku Filadelfia sung' ech' ebha ewashuururwa, ew' ereira, ing' uri n' echana cher' erindo cha Daudi, ing' urindonga, nti kusir' ewarindika, ing' urindikanga, nti kusir' ewarindo: ⁸ Nisi emikorere yabhe. Sunga bhushwa ongo 'ri na bhunkangwe bukeke, n' orirang' ekinwa chani, na nt' uritun' erina rani, natereka hamakako nabhe rubhi rwobhoka, indu rutamurindikwa na mwea. ⁹ Sunga, nakuninka bhima mu 'mbi bher' irameso ra Nyamuraire, imbi bh'etiko ngi 'mbu bhayahudi na nti bho, eina bhatimange; sunga, niserisha bho, k' ehicha mo mindi yabhe, n'esibhirira 'mbu nakushimanga. ¹⁰ Bhushwa urirang' ekinwa ch'er' esumy' emutima kuri ani, nsekurangayo hotu mo kashangi k' emwereko useya mo chuo kiti, mor' iereka bhis' echuo. ¹¹ N' eyange tete. Tingenga ekiri nabhe , kongo kutabhesingi mwea waseriy' ekembo kabhe. ¹² Eusehima, nsemuronja nkuso kumund' erirameso ra Ongo wani, n' utatukiyo tu mo; nsetiranyayo 'kuri we erina ra Ongo wani, n' erina, r' erobhungu rwa Ongo wani, rwa Yerusaremu nshasha ruhitange etuk' ekwiyo kuri Ongo wani, n' erina rani rishasha. ¹³ Ing' uri na mate worukir' ech' ebhang' Emutima mo marameso. ¹⁴ Tiranya kuri engashani y' er' irameso ra ku Laodikia: Sung' ech' ebhange bhibhesi mbo, e kari ho kasimana 'shu na w' eira,e mwenjo w' ebyaronjiwa bya Ongo. Nisi emikorere yabhe. ¹⁵ Nisi mbu nt' uhorerwa na nty' Ongo huwe! ¹⁶ Himpo, bhushwa ongo kibembere, na nt' uhorerwa na nty' ongo huwe, nsekusara etuka mo bhunu bwani. ¹⁷ Bhushwa ongw' ebange: ani mutumba, narekwetumbia, na nti naraa mu kikai, na bhushwa nty' ongo 'si 'mbu ongo wa bhonso, wa mario, musene, kihumihumi n' ongo 'ri munkanga. ¹⁸ Nakunink' ihano r' echura ekuri ani noro y' erekwa mo kasha, kongo 'bhesa mutumba, na ngombe sisanange kongo umbara n' esankene s' emunkanga 'be sitasungwingi, na bhushake bw' emeso abhe, kongo ukae. ¹⁹ Ani, nikurukanenga, na nihumbanga ebhati 'mbi bhashima 'ni. Bhesa na muho ubhunduke. ²⁰ Sunga, nisimene hamiyango, na nikongotange. kuti mwea werukir' emurengy' ani n' erindo 'rubhi, nsekime 'kuri we, nserengera hima nae, nae hima n' ani ²¹ Eusehima, nisemurikecha hima n' ani mo kitumbi chani ch' ebhubhake, imbu bwahimanga 'ni na narika hima na Tita mo kitumbi chae ch' ebhubhake. ²² Ing' uri na mate worukire ech' ebhang' Emutima mo marameso.