¹ Tiranya kury'engashani w' er' irameso ra ku Efeso: Sung' ech'ebha ing' urikit' e sankekeni sirinda mo mwine wae w'e kwabhume, ing' wendange mo tutara turinda twa noro tweriterek' etusuku. ² Nisi emikorery' abhe, e murimw' abhe, n' er' isumy' emutima rabhe. Nisi 'mbu 'tumukoch' iendana na bhabhi; Ubhura 'mbi bh'etiko 'mbu ntumwa na nti nt' ibho ito, n'osunga bho nti bhashukishuki; ³ N' Ongo 'ri n'esumya mutima, n'urenubha bhushwa n'erina r'ani, na nt' uriruha. ⁴ Eina chatin' ani kuri ongo, nt' imbu b'wamasia Ongo e nchime y' abhe 'yaroso. ⁵ Esubhukie kwe hani ngy' arikweshine ongo, ubhunduke, na ukore emikorere yabhe y' aroso; ntimbo, niseya kuri Ongo, n'etunje katara k' ekasuku kabhe harikanga ko, amabhesa nt' ubhunduka. ⁶ Nakubha ongo 'ri na kino, uyongw' emikorere y'ebhanikolai, mikorere nayongwa yo n'ani. ⁷ Kinsi ng' uri na mate worukire 'mbi by' ebhang' Emutima mo marameso: Mu kinsi ng' wahima ns' emuninka erisa mo muti w' ekaramo, ing' uri mor' ishwa ra Ongo ⁸ Tiranya kuri engashani w' erirameso ra ku Smirna: Sunga eby' ebha ewaroso n' ewahende, ng' wabhesanga wamakwa, na wamakindang' ibhesa ho: ⁹ Nisi eminubho yabhe n'e bhusene bwabhe (nakiro mbu ongo mutumba), n' er' itikurwa ra 'mbi bhetiko ngi mbu Bhayahudi na nt' ibho, eina ibho irango ra Nyamurairi. ¹⁰ Kiro subhaha imbu bhusenubha ongo, sunga, mushumbu usemina bhima mu bhanu, kongo mwerekwa, na mukubhesa na minubho ya matu ekumi. Bhesanga w'eira iya mor' ikwa, na nisekuninka kembo k'ekaramo. ¹¹ Kinsi ng' uri na mate w' erukire 'mbi by' ebhang' Emutima mo marameso: Ing' wasehima watanubi n'eroku rw' emet' abhi. ¹² Tiranya kuri engashani y'er' irameso ra ku Pergamo: sunga 'mbi by' ebha 'ng' uri n'erobhasi rwatwa mo mai abhi: ¹³ Nisi harika ongo, nisi mbu himpo ng' ekitumbi ch' ebhubhake bwa Nyamuraire. Utingirira erina r'ani, na nt' uretuna eresimira r'ani, nakiro mor' otu r'wa Antipa, kariho kani k'eira, ing' washurwanga ekuri bhanu, impo hari Nyamuraire n' ebhuriki bwae. ¹⁴ Eina nikwengi kikai kuri ongo, ngy' ebura mbu ongo kwengi mpo bhea bhetingire mo mwenjo wa Balaamu wabhesang' uhanange Balaki itereke bhaisiraeri ikoy r' esitara, kongo bharisa nyama sa kibhimbi cha tumoi n' ekime mu mikonsi. ¹⁵ Ng' ebhumbo n' ongo hotu, ongo 'ri na bhea bhetingire bhumbo bhumbo mo mwenjo wa bhanikorai. ¹⁶ Bhunduka kwe, nti 'mbo niseya kuri ongo tete, na nsekwanya bho n' er' obhasi rw' ebhunu bwani. ¹⁷ Kinsi 'ng'uri na mate worukire 'mbi by' ebhang' Emutima mo marameso: Mu kinsi ng' wahima nisemuninka e mana abhiswa, na nsemunink' erikoi r' isanange; na hambasiro nerikoi ndo hatiranyiwa rina rishasha indi ntir' isibhirwe na mwea, kubha nt' ingu waninkwa ro. ¹⁸ Tiranya mo ngashani ya ku Tuatera: Sung' ech' eba Musike wa Ongo, ing' uri n' emeso bhuri Omini rwakasha, n' emindi iri na bhususe bwa Shabha yakonda. ¹⁹ Nisi emikorere yabhe, enchime yabhe, er' esimira rabe emurimo wabhe w' ereira, er' ikwesimike rabhe, n' emikorere yabhe yahende mingi kuri eyaroso. ²⁰ Eina echatin' ani kuri ongo nt' imbu umasiy' emomina wabhe Yeseberi, w'etiko mbu iwe mutahwa, ihana n' isheeresha ebhakori bhani, kongo bh' emis' emikonsi n' erisa nyama satunjiwa mu kibhimbi cha tumoi. ²¹ Namuninka kashangi kongo wabhunduka, n' utangahun' ebhunduka mor' osingirwa rwae. ²² Sunga n'semurekera habhasirwa na ntange, n'irebheka minubo mikiri mu 'mbi bharonjange nae er'asingirwa, amabhesa nti bhatabhinduki mo mikorere yabho. ²³ Niseshur' ebhana bhabho; n' emarameso ati asesibhirira mbu ani ngi nisisirisang' emangati n'e mitima, na nisekuruchie kinsi uma mu bhanu iyemisanya n'e mikorere yae. ²⁴ Ekuri bhanu, kuri bhati bhampe bhaku Tuatera, imbi nti bh'emis' emwenjo uno, na nti bharesibh' ehende Nyamuraire, imbu bhukiyange wabhikira bho, nabw' ire: nti natereka umpe murio; ²⁵ Ina ho, ikiri n'inu, mutingirire cho iya n' ebhusekurukayo ani. ²⁶ Kuri ng' usehimayo, na 'ngu 'serangayo emikorere yani iya hende, ns' emuninka bhukakare kuri esanganda. ²⁷ Warishayo bho hima na nkoma ya chuma, imbu bhubhenganga bho ekiriko ch' er' oto, anisine hotu nar' eninkirwa bho bhunkangwe bwa Tita. ²⁸ Na ns' emunink' e nkekeni ya mukomakoma. ²⁹ Ung' uri na mate worukire 'nchi ch' ebang' e Mutima mo marameso.