1 Isheiwa ra Yesu Kirisitu, indi rakia Ongo wamuninka mor'ishea ebhakori bhae bhikai mbi bhiseya kubhusondori, na ngi byashea we, mor'irebheka we ngashani wae, kuri e mukori wae Yohana; 2 Euno wabhereresha e kinwa cha Ongo n'eribhesa ho ra Yesu Kirisitu, ebiti mbi byaresunga we. 3 Wakasanirwa kinsi ng' wasisirisa na mbi bhorukira e bhinwa by'e bhutahwa, nambi bharanga ebyatiranyiwa kumunda bhushwa e kashangi kari kwihi. 4 Yohana, mo marameso arinda ingi ari mo Asia; enchumo n'ebhuhoro bhibhesi kuri bhanu etuka kuri ng'uri ho, wabhanga ho, na weyange n'etuka e mitima irinda inji irikire habhusondori n'e kitumbi chae ch'e bhubhake. 5 N'etuka kuri Yesu Kirisitu, e kariho w'eira, e ntangi y'ebhakwi, n'emubhake w'ebhabhake bh'echuo! Kuri ng' watushima, ing'waretukuto mo bhubhi mo nchama yae, 6 Na ng'waronja iyetire bhate bhubhake bwa bhakungu bha Ongo Tita wae, kuri we kuri bhusime na bhunkangwe, mo biranga n' ebhiranga! Bhibhesi mbo! 7 Sunga weya n'er'otundo. Na kinsi riso ramusungayo, nambi bhamutobhoranga; n' esenganda siti s'echuo sisekwirakasaeyo bhushwa nae. Eina Bhibhesi mbo! 8 Ani ntangiro n'ehende, webhange Nyerekuritu Ongo, ing' uri ho, ing'wabhesanga na weyange, min'ebhunkangwe bhuti. 9 Ani Yohana, munakinu, ing'uri na muhango uma ninu mo minubho, mo bhubhake na mo kwesimike kuri Yesu abhesenga nirikire mo kisanga cha ku Patmos, bhushwa n'ekinwa cha Ongo n'er'iyebhere Yesu. 10 Natingirwa n'e Mutima mor' otu rwa Nyerekuritu, nerikira kuruma n' ani murenge mukiri, bhuri murenge wa kahanda. 11 Nti webhange: E chasunga ongo, tiranya cho kumunda na Karisi, na rebheka cho mo marameso arinda, ku Efeso, ku Smirna, ku Pergamo, ku Tuatera, ku Sardi, ku Filadelfia, na ku Laodikia. 12 Nikebhera mw'esibha inye murenge ng' webange n'ani. Na kuruma n'ekwikebhera nasunga tutara turinda twa noro tw'itereka mo tusuku; 13 Na, munkati nanto tutara tw' e noro, mwey'uma abhesenga wasusana na mwana 'mwea, wambara nganju nere, na nt' uri na mukabha wa noro mo nkubha. 14 E muntw'ae n'ebhuteo bwae byabhesanga bhusanange bhuri hariri isanange, yasana bhuri mauu, e meso ae abhesenga ari bhuri omini rwa kasha. 15 E mindi yae abheenga yasusana na shabha yashuururwa nguru, yabhesanga yakwechiwa mu mutura; n' emurenge wae nt'uri bhuri changa cha mecha mingi. 16 Abhesenga watinge mo mwine wae w'ekwabhume nkekeni sirinda. Mo bhun' wae nti mutukange obasi rwasongoka, rwa mai abi, n' embaso yae nt' iri buri mwishi usakange nguru. 17 Narekia namusunga, nahita mo mindy' ae bhuri na makwa. Wanitereka e mwine wae w'ekwabhume webha: Ang'isubhaha! 18 Ani waroso na wa hende, n'e uriho. Nakwanga nasunga, niri ho e bhiranga n' ebhiranga. Natinge erofunguro rw'eroku n' ekw'erunga. 19 Tiranya 'ke e byamasunga ongo, e bhiriho, n'ebhiseya kuruma; 20 E kishisharo ch'esankekeni sirinda chamasunga ongo mo mwine wani w'ekwabhume, n'etutara turinda tw'e noro twer'itereke tusuku. Esankekeni sirinda, ito ngesangashani s'emarameso arinda, n'etusuku turinda iyo marameso arinda.