¹ Kuruma nasunga mbingu nshasha na chuo kishasha; bhushw' embingu yaroso n' echuo charoso byameta, n' enyansa nt'isira tuko. ² Nasunga etuka mo mbingu, ekuri Ongo er' obhungu r'washuururwa, Yerusaremu nshasha, r'watunganyiwa buri momina wakw' itonda bhushwa moke. ³ Na norukira etuka mo kitumbi ch' ebhubhake murengya 'suma webha: Sung' erirameso ra Ongo hima n' ebhea! Usebhesa hima nabho, na bhasebhesa bhea bhae, na Ongo wesine wabhesa hima nabho. ⁴ Wasekono kiro kiti mo meso abho, n'er' oku rutabhesiyo tu; kutabhesiyo tu minsori, ari k'wirake, ari bwae, bhushwa ebhikai byaroso byameta. ⁵ Nangu wabhesanga warika mo kitumbi ch' ebhubhake webha: Sunga , naronja ebhikai bhiti bhishasha. Na webha: Tiranya; bhushwa bhino bhinwa bhiriko na by' eira. ⁶ Wan' ire: Byamabhesa! Ani Alfa na Omega; e ntangiro n' ehende. Mukinsi 'ng' urina mbusha, n'semuninka nshoko ya mecha a karamo, bhusa. ⁷ Kinsi 'ng' usehimayo wasebhesa mine 'mwandu wa bhino bhikai; N' sebhesa Ongo wae, na usebhesa musiky' ani. ⁸ Eina mo bhatetera, e nti bhasimira, e bh'emikonsi, e bhayeri, e bhasingirani, e bharosei, e bharonjei bh' etumoi mpero, n' ebhashukishuki e muhango wabho usebhesayo mor' eribha rasuma r' ekasha ng' er' oku r' wemet' abhi. ⁹ Kuruma uma mosangashani sirinda bhabhesanga bhating' esensara sirinda esirisere 'mario arinda weya, wan' shisha Kinwa webha: Iya, n' sekushea mukari, e momina w'e mwan'e mburi. ¹⁰ Wan' diya hambasiro n'ou rukiri na rwakangama. Wan' shea er' obhungu r' washuururwa, Yerusaremu, nti ruhitang' etuk' ekwiyo kuri Ongo, ruri n' eritatwa ra Ongo. ¹¹ Er' irangara raro nti r' isusene n' ikoi ra bhusy' asuma, ikoi ra Yaspi ra rangara bhuri kirauri. ¹² R'wabhesanga nti ruri na muruta mukiri na wakangama. Wabhesanga nti uri na miyango ekumi n' ebhi, ne miyango, ngashani ekumi na sibhi, na mina atiranyiwa, esenganda ekumi na sibhi s'ebhana bha Isiraeri. ¹³ Mo kwabhume miyangw' eshatu, kubhusondori miyangw' eshatu, ekurembe miyangw' eshatu na kuruma miyangw' eshatu. ¹⁴ Emuruta w' er' obhungu w' abhesenga nti uri na ntangiro ekumi na sibhi, na hambasiro na to emin' ekumi n' abhi esantumwa s' e Mwan' emburi. ¹⁵ Ing' wabhesanga w' ebhange n' ani nt' urikite ndengo y' oseke rwa noro, kongo wansa ebhore bw' er' obhungu, e miyango, n' e muruta. ¹⁶ Er' obhungu r' wabhesanga r' urengekane esenkaro sae sinye, ebhore bwae nti bhurengeke n' ebhukikane bwae. Wans' ebhore bw' er' obhungu n' er' oseke, wansa nkaramika bhihumbi ekumi na bhibhi; ebhore, ebhukikane n' er' ohando nti bhirengekane. ¹⁷ Wans' ebhore bw' emuruta, wasunga nti nkaramika iyana na makumi anye na sinye, mwanso wa mwea, nti ng' uri nango ngashani. ¹⁸ Emuruta w' abhesanga w'imbwa mu Yaspi, n'er' obhungu mu noro yashuururwa, isusene na kirauri chashuururwa. ¹⁹ E ntangiro y' emuruta w' er' obhungu nti wa 'tondwa na makoi a bhusy' asuma a kinsi bhususe: e ntangiro ya roso nti Yaspi, y' emet' abhi wa safira; y' emet' ashatu karekedoni, y' emet' anye Hemerode. ²⁰ Y' emet' asanu Sardoniki; y' emeta mutuba akiki; y' emet' arinda Krisoritho; y' emeta munane Sabarajadi; y' emeta mwenda yakuti yasusa buri binjari; y'erekumi Krisoproso, y' erekumi n' enima Hiakintho; na y' erekumi n' esibi Ametisto. ²¹ E miyango ekumi n' eibhi abhesanga nti bhutea ekumi na bhubhi, kinsi orubhi nti rwa bhutea bhuma. Ebhutara bw' er' obhungu nti noro yashuururwa, bhuri kirauri kirangarange. ²² N' tasung' irameso mund' obhungu; bhushwa Nyerekuritu Ongo min' ebhunkangwe n' emwan' emburi ng' erirameso raro. ²³ Er' obhungu nti r' waraa mu mwishi ari mweri mw' isachie ro chaka; bhushwa eritatwa ra Ongo rasachie ro chaka, n' emwan' emburi ng' ekasuku karo. ²⁴ Esanganda sisendereyo mo chaka chae, n' ebhabhake bh' echuo bharishieyo ro eritatwa rabho. ²⁵ Esandubi saro sitarindikwiyo mumwishi, bhushwa inko kutabhesiyo mutu. ²⁶ Kuserishiwayo eritatwa n'erosubhahwa rw'e sanganda. ²⁷ Rutangakimi mw'anga kiri na mikonsi, ari mwea wironja bhubhi na bhushukishuki, kusekimeyo ho 'mbi bharetiranyiwa mo karisi k'e karamo k'e mwan'e mburi.