¹ Kuruma nasunga etuka mo mbingu ngashani uma uhitange urikire n' echana ch'eri obhor'ekwerunga na bhurebhure bhukiri mo mwine wae. ² Wating' ekisoka, ensoka ya karekare ngi mushumbu na nyamurairi, wamumina myaka kihumbi. ³ Wamurekera mor'erunga, warindika n'eriya nsimiko habhasirwa nae, kongo watahusingi tw' esanganda iya m'oero myaka kihumbi ibhererere kuruma nampo , nti rakomenwa w'obhorwe mukashangi kakeke. ⁴ Na nasunga bhitumbi bya bhubhake, n'ambi bhabhesanga bharika mubyo bhaninkwa bhunkangwe bw'iker' obhansa. Na nasung' emitima y' ebhashurwanga bhushwa n' ekariho kabho kuri Yesu bhushwa n'ekinwa cha Ongo na ya 'mbi bhatinanga ironjie enyamishwa mpero ari ekamoi kayo, na nti bhareriarwa nsimiko yae mo s'embaso sabho na mo mine yabo. Bhafuka na bhasima hima na Yesu mu myaka kihumbi ⁵ E bhampe bhakwi bhatafuki iya hende n' emyaka kihumbi ibhererere. Indo nger' efuka ra roso. ⁶ Bhakasanirwa na bhashuururwa imbi bhari mor' efuka raroso! Er' oku rw'emet' abhi rusira bhunkangwe kuri bho; eina bhasebhesanga bhakungu bha Ongo na bha Kirisitu, na bhasesimayo hima nae mo myaka kihumbi. ⁷ E myaka kihumbi isekiayo yabhererera Nyamuraire usobhorwayo etuka mo muri wae. ⁸ Na usetukayo mw' ienda kasheeresha esanganda siri mosenkaro sinye s' echuo, Gogu na Magogu, kongo watuma bho mo bita; e mwanso wabo bhuri misie y'enyansa. ⁹ Bhataya mo bhuari bw'echuo kiti n'etimba enkambi y'ebhashuururwa n'er' obhungu rwakonda. Eina kasha kahita etuka mo mbingu n'ekindirisanya bho. ¹⁰ Na mushumbu, ingw' abheseng' usheereshange bho, watawa mor' eribha r'ekasha n'eminubho, imo ngi murikire enyamishwa n'emutahwa w'emanko. Bhasenubhayo mumwishi na mutu, mo bhiranga n' ebhiranga. ¹¹ Kuruma nasunga kitumbi kikiri chabhubhake kisanange, nangu wabhesanga warika hambasiro nacho. Echuo n'embingu byabheka bhusondori n'embaso yae. ¹² Nasung' ebhakwire, ebhakakare n'ebhanunke, abhesanga bhasimana habhusondori bw' ekitumbi ch' ebhubhake. Turisi tw' oborwa, na kampe karisi. k'obhorwa, iko ng' ekarisi k'ekaramo. N'ebhakwire bhakekererwa obhansa etuka n'emikorere yabho, iyemisanya n'eby' abhesenga byatiranyiwa kumunda nanto turisi. ¹³ Enyansa yakurucha ebhakwi bhabhesanga bhari kumunda nayo, e roku n' er' erunga bya kuruch'ebhakwi abhesanga bhari kuri bho; na kinsi uma wakererwa obhansa etukana n'emikorere yae. ¹⁴ Er' oku n'ererunga byarekerwa mor' eribha r'ekasha. Ng'er' oku rw'emet' abhi, er' eribha r' ekasha. ¹⁵ Kinsi ngu nt'washee rina rae ratiranyiwa kumund' ekarisi k' ekaramo nt'wakurekerwa mor'eribha r'ekasha.