¹ Kuruma nampo, norukira mo mbingu bhuri murenge wasuma wa bhea bhingi nti bhebhange: Areruya! E nchukaro, er' itatwa, n' ebhunkangwe biri na Ongo witu. ² Bhushwa esemansa sae s'eira na sarengekana; bhushwa wamaronj' erobhansa rw' ekihanga kikiri ngy' abhesanga kihusang' echuo mor' osingirwa rw'ae, na wamatuwany'e nchama y'e bhakori bhae mw' ikongayo mo mine yae. ³ Na bhebha r'emet' abhi: Areruya! N'e mwiki wae wataya bhiranga na bhiranga. ⁴ N'e bhakungu makumi abhi n'ebhanye n'ebhashere bhanye bhindama na bhakiere Ongo mpero warika mo kitumbi ch'ebhubhake, bhebha: Bhibhesi mbo, Areruya! ⁵ Murenge watuka mo kitumbi ch'e bhubhake webha: Mutate Ongo witu, bhanu ebhakori bhae bhati, bhanu mbi mu musubhaha, bhanunke n'ebhakakare! ⁶ Norukira bhuri murenge wa bhea bhingi bhuri changa cha mecha mingi na bhuri changa cha murabyo wasuma ch'ebha: Areruya! Bushwa Nyerekuritu, Ongo witu min' ebhunkangwe, wamakime mo bhusime bwae. ⁷ Tukokome, tubhe mosangoa na tumutate; bhushwa ebhuheruki bw' Emwan' emburi bwameya, mukari wametunganyanya. ⁸ Na wakuninkwa iyambara ngombe sisanange, sakonda sarangara, bhushwa esangombe s'isanange, ng' emikorere yarengekana y' ebhashuururwa. ⁹ Engashani yan'ire: Tiranya: Bhakasanirwa e bharebhikirwa mo bhuheruki bw'Emwan'emburi na wan'ire: Ebhino bhinwa by'eira, bhinwa bya Ongo. ¹⁰ Nahita hamindy'ae mw'emuronjie mpero, eina wan' ire: Irange mor' ekiya mbyo! Ani mutindikiri wabhe mo murimo, na wa mo bhanakinu mbi bh'ekariho kuri Yesu. Ronjie Ongo mpero. Bhushwa ekariho kuri Yesu ng' emutima w'ebhutahwa. ¹¹ Nasung' embingu y'obhoka nasunga hasaa farasi isanange. E wabhesanga uri habasirwa nayo wabhikirwa ngi w'esimira na w'eira, uronjang' obhansa n'okwanange n'eira. ¹² E meso ae abhesanga arikire bhuri omini rwa kasha, habhasirw' emuntw'ae nti hari twembo tw' ingi, wabhesang' orikire na rina ratiranyiwa, nti r'isibhirwe na mwea, ina iwe wesine ho. ¹³ Na ntiwambara nshangi yatirwa nshama. Erina rae ngi kinwa cha Ongo. ¹⁴ Emaimba ebhakwani bhari mo mbingu nti bhamwemisa habhasirwa na farasi sisanange, bhambara nshangi sisanange, sarangara, sashuurukara. ¹⁵ Mo bhunu bwae, nti musaange obhasi rwatwa, rw'ehumb' esanganda n'iranga to mu nkoma ya chuma n' inyenshaa erosara rw'ebhusubhuke bwa Ongo min' ebhunkangwe. ¹⁶ Wabhesanga urikite mo nchangi y'ae na mo kinga rina ratiranyiwa; Mubhake w'ebhabhake na Nyerekuritu wa bha Nyerekuritu. ¹⁷ Nasunga ngashani yasimana mo mwishi. Wakua mu murenge wasuma: Webha n'emironge iti yokange mo chanya: Mw'iye, mukumanane mo nkumanano nkiri ya Ongo. ¹⁸ Kongo murisa esanyama sebhabhake, esanyama s'ebakakare bh'ebhashirikani, esanyama s'ebhankangwe, esanyama s'esafarasi nambi bhari habhasirwa nato, esanyama s'ebhati, ebhahime n'ebhafuku , bhanunke na bhakakare. ¹⁹ Nasung' enyamishwa, ebhabake bh'echuo n'ebhakwani bhabho, bhakumanana mw'ironja bhita n'angu wabhesanga warika habhasirwa nanjo farasi n'ebhakwani bhae. ²⁰ N'enyamishwa yatingirwa hima n'emutahwa w'ebhushukishuki, ingwa bheseng' oronjange bhishisharo bhusondori nayo, mumbyo bhishisharo ngi byahusanga mowe ebhabhesanga n'ensimiko y' enyamishwa, n'ironjie mpero ekamoi kae. Bhatawa ebhati babi bhashere mor'eribha r'ekasha k'eminubho. ²¹ Ne bhampe bhashurwa n'er' obhasi rw' abhesanga rutukange mo bhunu bwangu abhesanga warika habhasirwa n'efarasi, n'emironge iti yasikuta mo sanyama sabho.