¹ Kuruma nampo, nasunga ngashani ihitang' etuka mo mbingu, yabhesanga irikire na buhime bhukiri; n' echuo kiti charis' echaka chae. ² Wakua mu murenge wasuma, webha: wam'enduka, wam'enduka, Babironi mukiri! wamakind' ebhunduka bhuriki bwa bhashumbu, karangariro ka kinsi kifasi, karangariro ka kinsi muronge w'ema na w'ibhawa. ³ Bhushwa esanganda siti sar' omo e mau ebhusubhuke bw' er' osingirwa rwae, n'ebhabhake bh'echuo bharikweria hima nae mor osingirwa, n' ebhachuyi bh'echuo bharikw'etumbiya mo bhunkangwe bw'erehunda rae. ⁴ Na n'erukira mo mbingu umpe murenge un'erengi: Tuka munkati nae, bhea bhani, kongo mutubhesingi nae mo bhubhi bwae, na mutubhesingi na muhango mo mario ae. ⁵ Bhushw' ebhibhi by'ae byamakind' etumana iya mo mbingu, na Ongo wamesubhukia n'ebhubhi bw'ae. ⁶ Mutue bhuri bw'atuananga we, na mukuruchii ngendo sibhi etukana n'emikorer'yae. Mor' osara himpo hariteranenga we, muriteri ho ngendo sibhi. ⁷ Etukana n'ebwitatangawe, n'ekime mokw'esunga, bhumbo ngi bhumuninke bhanu minubho na kiro. Bhushwa weshishange mo mutimae: Narika bhuri mumbo, nt'yani mushumbakari, na n'tasungiyo kiro. ⁸ Bhushwa nancho, mw'otu ruma e minubho yae isiya, er'oku , ekiro n'erwaka, na useshikwa na kasha. Bhushwa uri na bunkangwe, Nyerekuritu Ongo ng'wakumukereng' erobhansa. ⁹ N'ebhabhake bhati bh'echuo, imbi bharekime hima nae mor' osingirwa na mo byakomakoma bhasere na, kw' irakasae bhushwa nae, bhasekiya bhasung' emwiki w'erishire rae. ¹⁰ Nti bhasimana kore, mo bhobha bw' eminubho yae, bhasebhayo: Bhonso! bhonso! er'obhungu rukiri, Babironi, obhungu rwa bhunkangwe! Mukashangi kima er'obhansa rw'abhe rwameya! ¹¹ N'ebhachuyi bh'echuo bhare na bhari mo kiro bhushwa nae, bhushwa kusira tu'ngu uchurengi bho emirio yabo. ¹² Mirio ya noro ya bhehe, ya makoi ebhusyasuma, na bhutea, ngombe sasanguhyaa, nshangi saritohyaa, hariri, na nshangi sasanyaa bhuri nshama, kinsi muti uti ngu nt' warira, kinsi bhikai bhiti bya muramba, kinsi bhikai bhiti bya bhisai bya bhusi bwasuma nguru, na cha shabha, na chuma na cha mukuta. ¹³ N'er'ebhumba, na bhikai by'erikomy' emushwashwa, na rungo. na kasuku, mau, mawese, nshano 'nji yahunda, bhuhi, nkambu, na mburi, na farasi, na tutibita twa bhita, na mibhi na mitima ya bhea. ¹⁴ N'ebyuma akosanga byashim'emutim' abhe byam' enda kore nabhe; n'ebhikai bhiti byatende na byakonda byamakurimina, n' otusheiyo tu byo. ¹⁵ Ebhachuyi bha mbyo bhikai, imbi bhamabhesanga bhatumba mu byo bhasesimanayo kore, mo bhobha bw'emario ae; bhasereyo na bhasebhesayo mu kiro; ¹⁶ Na bhasebhayo: Bhonso! Bhonso! Er' obhungu rukiri rw'abhesanga rwambara ngombe sasanguhyaa, nshangi saritohyaa na sasanyaa, n' itondwa noro, makoi abhus' yasuma na bhutea! mukashangi kakeke bhutumba bhurehe mpi bwamabhishiwabhishwa! ¹⁷ N'ebhenjii bh'esanfio bati, n'ebh' etang' ekusi mumbo bhutaka, e bhendi mo bwato, n'ebhasisirisi bhati bh'esenyansa bhasimana kore. ¹⁸ Na nti bhakuange, mor' esunga e mwiki w' er' eshire rae: Runi obhungu atuka rususene n' er' obhungu rukiri. ¹⁹ Bharekeraa yo mukungu habhasirwa n'emintw' abho, bhare na bhabhesa yo mu kiro, bhakuange na bh'ebhange: Bhonso! Bhonso! E r'obhungu rukiri, indu rwatumbianga bho mo bhutumba ebhati mbi bhakwengi bwato mo nyansa mu kashangi kakeke bya mabhishiwabhishiwa. ²⁰ E mbingu, kokoma kuri we! Na bhanu, e bhashuururwa, esantumwa n'ebhatahwa, mukokome hotu! Bhushwa Ongo wamabhukier' eira mor' imukekere er' obhansa. ²¹ Ngashani nima munkangwe wating' ikoi r'isusene n'osho, warekera ro mo nyansa, webha: Bhumbo ng' warekerwa ongo na bhusubhuke Babironi, erohbungu rukiri na r'utasungwiyo tu. ²² N'ekuri ongo kutorukirwiyo tu mirenge y'ebhamini bh'esansimbi, na bhamini bha kanyamurera n' ey' ebhamini bh'etuhanda. kutasungwiyo tu kuri ongo kiro na murenga uti uti, kutorukirwiyo tu kuri ongo echanga ch'er'osho. ²³ Echaka ch'er'itara kitasakiyo tw' ekuri ongo, n'emurenge n'eabhume na mukari utorukirwiyo tu kuri ongo, bhushwa ebachuyi ngy' abhesang' ebhakakare bh'echuo, esanganda siti sahuswa n'ebhukufi bwabhe. ²⁴ Na bhasung' ekuri we enshama y'ebhatahwa , y'ebhashuururwa n'ey' ebhati bhakerwanga mo chuo.