¹ Wan' chea rusi rukiri rw'e mecha e karamo, arangara bhuri kirauri, nty'asairengi mo kitumbi ch'e bhubhake cha Ongo n' e Mwan'e mburi. ² Munkati n'ense nkiri y'er' obhungu na mo bhirindo bhibhi by'e rusi , nti hari muti w'e karamo, ubhutange byuma ngendo e kumi na sibhi, ubhutange byuma kinsi mweri, n'e masani nty'ari na murimo, w'iramya esanganda. ³ Kutabhesiyo tu otaki. E kitumbi ch' e bhubhake cha Ongo n'e mwan'e mburi kisebhesayo mor' obhungu; e santumwa saemukoreyo. ⁴ Na saasungayo e mbaso yae, n' erina rae raabheseyo mos' embaso sabo. ⁵ Kutabhesiyo tu mutu: na bhataraiyo ari mu kasuku ari chaka, bhushwa Nyerekuritu Ongo waasaneyo bho. Na bhasimayo mo bhiranga n' ebhiranga. ⁶ Wani shisha: Bhino bhinwa bhirikire na by' eira; na Nyerekuritu, e Ongo w' emitima y' ebatahwa, wakurebhek' engashani yae mw' ishea e bhakori bhae ebhiseya kuruma. ⁷ Na sunga n'eyange tete. wakasanirwa ingw' aranga e bhinwa by'e karisi kano! ⁸ Ani Yohana, ngi norukira n'esunga bhino bhikai. Na narekiya norukira n' esunga, nahita hamakako n'e ngashani wabhesanga un' sheange byo mw' emuronjie mpero. ⁹ Eina wanire: Irange mw' ironja ncho! Ani mutindikiri wabhe wa murimo na wabhanakinu ebhatahwa, na w'ambi bharang' ebhinwa by'e karisi kano. Ronjie Ongo empero. ¹⁰ Na wan' ire: Ang' itereka nsimiko mo bhinwa by' ebhutahwa bw'ekarisi kano. Bhushwa e kashangi kari kwihi. ¹¹ Kinsi ng' usir' eira wabhese ho nt' usir' eira, kinsi ng' urisere mikonsi w'ironjei ho mo mikonsi, na ngw'ereira waronje ho eira, na' ngw' ashuururwa weshuurure ho. ¹² Sunga n' eyange tete, hima n' erohembo rwani, mw'ekuruchie kinsi mwea etukana n' emikorere yae. ¹³ Ani Alfa na Omega, Waroso na wa hende, ntangiro na wa hende. ¹⁴ Bhakasanirwa 'mbi bhashua esangombe sabo, kongo bhakomenwa emutiw' ekaramo, n' ikime mo miyango y'er' obhungu! ¹⁵ E kubhutara kuri esambibhi, ebharosei, ebhasingirani, ebhayeri, ebharonjei bh' etumoi mpero, na kinsi uti 'ngw' ashima n' ironja bhushukishuki! ¹⁶ Ani Yesu, nakubhurebhek' engashani wani mw' ebhuture ebinwa bhiti 'mbi mo marameso. Ani ng' er' etina na w' erobhuto rwa Daudi, e nkekeni isakange y' emukomakoma. ¹⁷ E Mutima na mukari bhebha: Iyanga. Na kinsi 'ng' uri na mbusha w' iye, kinsi 'ngw' asasa washei e mecha ekaramo, bhusa. ¹⁸ Nebhange mu kinsi ngw' erukira e bhinwa by' ebhutahwa bw' ekarisi kano: Amabhese mwea useongerere ho kikai, Ongo wasemusund' emario atikurwa kumunda n' ekarisi kano; ¹⁹ N' amabhese mwea watunja kikai mo bhinwa by' ekarisi bya bhuno bhutahwa, Ongo watunjayo e muhango wae mo muti w' ekaramo na mor' obhungu r' washuururwa , rwatikurwa kumunda n' ekarisi kano. ²⁰ Ingw' aronj' ekariho ka bhino bhikai webha: Eira, n'iyange tete. Bhibhesi mbo! Iyanga, Nyerekuritu Yesu! ²¹ E nchumo ya Nyerekuritu Yesu ibhesi hima n' ebhati!