¹ Na norukira murenge wasuma wabhesanga usairengi mor' irameso, webha n' esangashani sirinda: Mwendi na mukubhuri mo chuo esensara sirinda s' ebhusubhuke bwa Ongo. ² E waroso wenda, wakubhura erosara rwae mo chuo. Ihote r' ema na ra bwae rasundw' ebea bhari, n' ensimiko y' enyamishwa n' ironjie mpero ekamoi kae. ³ Wemet' abi wakubhur' erosara rwae mo nyansa. yabhunduke nshama, bhuri ya mukwi; n' ebhishere bhiti bhiri kumund' enyansa byakwa. ⁴ W' emet' ashatu wakubhur' erosara rwae mo sandusi nkiri nkiri na mo sanchoko s' endusi. Sabhunduke nshama. ⁵ Norukir' engashani w' emecha webha: Ongo w' eira, ing' uri ho, ubhesanga ushuururwa, bhushwa umaronja run' obhansa. ⁶ Bhushwa bhakuburang' enchama y' ebhashuururwa na y' ebatahwa n' umaninkabo nchama y'iomo: bhakomenwa cho. ⁷ Na norukira umpe ngashani etuka mor' irango, webha: Eir' Enyerekuritu, Ongo mine bunkangw' ebuti, esemansa sabhe s' eira na sarengekana. ⁸ W' emet' anye wakubhur' erosara rw'ae mo mwishi. Na waninkwa eshik' ebhea mu kasha. ⁹ Ebhea bhashire na chuka kikiri, na bhakamb' erina ra Ongo, ing' urikire n' ebhukakare mo mario ngo, na bhatabhunduki mw' emutata. ¹⁰ W' emet' asanu wakubhur' erosara rw;ae mo kitumbi ch'ebhubhake ch' enyamishwa. N'ebhubhake bw'ae bwabhumbirwa na mwerimya; ebhea bhabhuran' erwami mo bwae; ¹¹ Bhakamba Ongo wa mo mbingu, bhushwa n' ebwae bwabho n' emote abho, na bhatabunduki mo mikorere yabho. ¹² W' emeta mutubha wakubhure erosara rwae habhasirwa n' erusi rukiri, Efrate, N'emech' aro akama, mw' ironjie inse mo bhabhake bhasairengi kusaa ng' emwishi kurengekanyiwe. ¹³ Nasunga mwatuka mo bhunu bw' ekisoka, na mo bhunu bw' enyamishwa, na mo bhunu bw' emutahwa w' ebushukushuki, bhifasi bhishatu, bya bhususe bwa bhikere. ¹⁴ Bhushwa iyo mitima ya bhashumbu, ng' ironjange bhishisharo, na ngi y' endange kury' ebhabhake b' echuo kiti, konga yakumanyanya bo mo bhita by' erotu rukiri rwa Ongo mine bhunkangwe. ¹⁵ Sunga, n' eyange bhuri mwibhi. Bhakasanirwa mbi bhakohya, na bharang' esangombe sae, kongo bhatendingi munkanga na bhatasungingi esankene sae! ¹⁶ Bhakumanyanya bho mo bhuari 'mbu bwabhikirwa mo kiebrania, Har magedoni. ¹⁷ W'emet' arinda wakubhur' erosara rwae mo mwanya. Hasaa mor' irameso, mo kitumbi ch' ebhubhake, murenge wasuma webha: Byamabhesa! ¹⁸ Kwabhesa bhimpenya, mirenge ya mirabyo, na karingiri kakiri, inki katangabhesenga etukir' e mwea wabhesa mo chuo hotu karingiri kakiri bhur' inki. ¹⁹ Nand' obhungu rukiri rwabhanyiwa mo mihango ishatu, n' esambungu s' esanganda s' enduka, na Ongo, w' esubhukia na Babiloni mukiri mw' emuninka erosara rw'emau rw' ebhusubhuke bw'ae bwasuma. ²⁰ N'ebhisanga bhiti byarimina n'esangu sitasungwi tu. ²¹ Na mauu makiri, a bhuritohe bwa bhiro makumi anye, nty' asurukengi ebhea etuk' ekwiyo, n' ebhea bhakambaa Ongo bhushwa n' emario e mauu, bhushwa ngo mario abhesa nti makiri nguru.