¹ Yesu watukire mpo n'ienda ku kwabho. E bhafuku bhae bhamwemisa. ² Akiya erotu rweriruhuka rwa m'eya, wabhuch'ihana mu sinangoki. Bhea bhingi mbi bhamwerukiranga bhashishara n'iebha: kuni ngi kwamusaire e bhikai mbi ? Bhuni bhuteesa mbu bwareninkwa we, na bhuni bhukiange bhishisharo bhiri mbu byakorwa nae? ³ Nting'e mwimbi uno, musike wa Maria, musiky'abho Yakobo, Yose, Yuda na Simoni? na bhabhitu bhae ntibari n'itu hano? rabhesa kuribho nse y'iruka imusimira. ⁴ Ina Yesu werebho: E mutahwa utanenwanga nti kukwabho, munkati e bhabhuti bhae, na mumwa'bho. ⁵ Utakori'mpo anga na kengeko, ritabhi ho itereka mine mubhakoni bhima n'iramya bho. ⁶ Na washishara n'erifund'isimira rabho. Yesu watimb'esambungu sa wendende mw'ihana. ⁷ Nampo wabhikira e rikumi n'e bhabhi, n'ibhuch'irebheka bhabhibhabhi, wanink'abo bhunkangwe kuri e bhashumbu. ⁸ Waninka bho myomba y'ifund'iria kikai mor'oendo, kubha nti nkoma ho; anga kamboosa, anga kimbesa, anga bhehe mo mukobha; ⁹ Imbara bhirato, na angi mbara ngombe sibhi. ¹⁰ Nampo were bho : murikanga mo numba mwakime bhanu murik'emo n'ebwakii mutuka 'mpo. ¹¹ Na hamabha mpi hakiy'e bhea bhahund'ibhukoke n'i bhorukire, nti mutuka mpo, na nti mutito e mukungu we bhisando bhinu, kongo wabhese kariho kabho. ¹² Bheenda, n'itura mwasi w'esiya e bhubhi. ¹³ Bhahensa bhashumbu bhiingi, na bhasingo mawese bhakoni bhiingi n'iramya bho. ¹⁴ E Mubhake Herode worukira e bwebwange bhusha na Yesu, n'erina rae nti ramakind'ibhese na nkuru, webha: Yohana Murubhiki wafukayo mubakwire bhusha na'ncho ngi bhukorange we e kuri we bhishisharo. ¹⁵ Bhampe bhebha: mbu Elia. Na bhampe bhebha mbu mutahwa uma bhuri uma mo bhatahwa. ¹⁶ Ina Herode mor'iyorukira mbo w'ebha: Ungu Yohana wakera'yo ani muntwe, iwe ng'wafukayo. ¹⁷ Bhushwa Herode wesine ngwaminanga Yohana, n'imuria mo ngori, bhusha Herodia, mukari wa Firipo, musike waabho, bhusha wamubhinganga, ¹⁸ Na Yohana wa mushishanga nti rakomenwa kuri o'ngo ibhinga mukari wa moto wabhe. ¹⁹ Herodia wasubhuke Yohana n'ihun'imushura. Ina ntwakochanga; ²⁰ Bhusha Herode ntwaresubhaha Yohana, nti umusi mbu mwea w'eira na washuurukara; wend'umukitengi, na ikind'imurukira, washunana, n'imusumya mate nguru. ²¹ Na hakia ot'uma rwa ngoa rw'ianikira eribhutwa ra Herode, n'imoesha e bhakakare n'e bhashirikani bha ku Ngariraya. ²² Herodia mwisi we, wakime mo butara bw'enumba; wamina n'imoesha Herode n'ambi bhamutimba. E mubhake Herode washisha mwisi we: konga cha sasa ongo,na nakuninka cho. ²³ Warengeresha mw'isere: kiti nchi chakonga ongo, nsekuninka,nakiro chunda ch'ebhubhake bwaani. ²⁴ Wakia wasaa, washisha nina: Nikonge nki? Na nina wasako: e muntwe wa Yohana Murubhiki. ²⁵ Wakanyaha tete kuri e mubhake n'imushea e murao wae: nakonga mo ntengi mokashangi kano e muntwe wa Yohana Murubhiki. ²⁶ E mubhake wabhesa na bhonso; ina, bhushw'erisere rae nambi bhamutimba wafund'itina. ²⁷ Watuma mushirikani wae uma hihahiha, warishe muntwe wa Yohana Murubiki. ²⁸ E mushirikani weenda kakera e muntwe wa Yohana mo ngori, n'erisha'o mu ntengi. waninkao emwana mukari,n'emwan'emukari waninkao nina. ²⁹ E santumwa sa Yohana, mor'iyorukira mbo, bheya karing'emubhi wae,bhaterekao mor'esinda. ³⁰ E santumwa sakiya sa masonjana kwihi na Yesu, bhamuture e bhiti mbi bya kukora bho n'e bhiti byakuhana bho. ³¹ Yesu washisha bho: mwiye kumushi mo bweru,na muruhuke kakeke. Bhushwa kwabhesenga bhea bhingi b'endange n'e bhakurukange na nti bhasira n'entambi yeririsa. ³² Bhenda mo bwato mukweshika mo bweru. ³³ Bhea bhingi bhasunga bwendange bho, bhateerera bho, na musambungu siti e bhea bhakanyaha mo bhisando n'isondore bho kwendang'ebho. ³⁴ Murituka mo bwato,Yesu wasunga nteko nkiri, wakwire bho bhonso, bhusha nti bhari bhuri mburi sisira murangi; wabuch'ihana bho bhikai bhiingi. ³⁵ E bwakianga e ntambi nti yamakind'ieta, e santumwa sae seya kuriwe n'imushisha: Hano bweeru n'entambi ya meeta; ³⁶ kuruch'abho kongo bheenda mo tunsari na mo sambungu se bwendende, bhachure chamur'abho. ³⁷ Yesu wasako bho: muninke bho by'erisa bhanu b'esine. Iina bhamushisha: Tweendi kachura tumbonsa twa bhutea mana abhi, na tuninke bho bye risa? ³⁸ Na washisha bho: bhanu muri na tumboosa tunga? Mwendi kakae. Bhamakindi isibhirira bhamusako: Tumboosa tusano na bhikwa bhibhi. ³⁹ Yesu washisha bho: murikech'ebhea mu bhisu bhikembe bhikembe. ⁴⁰ Na bharika mu mikororo w'iyana na wa makumi asano. ⁴¹ Watinge e tumbosa tusano ne bhikwa bhibhi, wakae kwiyo watata Ongo. Kuruma naha wanoa e tumboonsa waninkato e bhafuku bhae kongo bhabhanyieto e nkumanano. Bhabhanya n'e bhikwa bhibhi mo bhea bhati. ⁴² Bhati bharisa n'isukuta, ⁴³ Bhakurucha mitundu ikumi na ibhi irisere byunda bya tumboosa n'ebhikwa mbi byasianga. ⁴⁴ Bhea bhihumbi bhisano ngi bharisang' etumboonsa nto. ⁴⁵ Kuruma nampo wakonga e santumwa sae sikimi mo bwato n'imusondore m'umpe muiri mushere ku Betesaida, na w'isine ntiukuruchange e nkumanano. ⁴⁶ Wakia wamakurucha bho, w'enda mo rou kahema. ⁴⁷ Mumurisisi, e bwato nti bhuri ntikiri munkati enyansa na Yesu nturi wesiine mo kirindo. ⁴⁸ Wasunga ntibatanga kocha iendja e bwato bhushwa e r'iyuhu nti risairengi kwendange bho. Bwarekia bhuri kaacha, wenda kuribo nti utandairange hambasiro n'e nyansa, n'isond'iteana bho. ⁴⁹ Bhakia bhamusunga utandairange hambasiro e nyansa, bhahaka mbu mushumbu, bhirachae; ⁵⁰ Bhusha e bhati bamusunganga na bhakwa bhoobha. Yesu werebho: muininke maa, kiro mubhese na kooha, ani uno. ⁵¹ Kuruma nampo wataya mo bwato, ne r'iyuhu mo mecha rakobha. Bhashishara n'ibhese na bhoobha; ⁵² Bhusha nti bhatereranga e bhishisharo bye tumboonsa, bhusha bhabhesenga na mitima yasuma. ⁵³ Bhakia bhamakind'isoka e nyansa, bheya mo chuo cha ku Kenesareti bhasoka. ⁵⁴ Mu ntambi yatukangabho mo bwato, e bhea, bhakia bha terera Yesu, ⁵⁵ bhatamba e sankaronkaro siti, bhabhuch'imurishie e bhakoni mu bhipoi, kutinku kw'orukiranga bho ngi kuriwe. ⁵⁶ Kwimakwima wiyanga musambungu,mumbungu nkirinkiri na mutunsari, abhesenga bhariang'e bhakoni mo bhutara,nti bhashishiwange mbu bhatingengaho mo murumuro we nchangi,nakinsingu wamutingenga mo warama.