¹ E bhafarisayo n'ebhandiki bhatuka ku Yerusalemu, bharika mo nkumanano na Yesu. ² Bhasunga bhima mo sa ntumwa sae nti bharisange na nti nti bhashua mine. ³ Na nti kisibhirwe mbu e bhafarisayo n'e bhayahudi bhatakoche irisa na nti bhashua mine shushu, itukana n'e myomba yabho ya kare; ⁴ na murikuruka rabo ha nteko ye bheya, bhatakoche irisa na nti bhashuururwa. Bhari hotu na impe myomba yabho yi bhutirirwa bhuri erishua e sa nsara, e marea na bhimpe by'eshabha. ⁵ N'e bhafarisayo n'ebhandiki bhamushisha; Bhusha nki e sa ntumwa sabhe sitangemisa-e myomba ye bhakungu, iina bharisange bhiyo byabho na mime irisere mikonsi? ⁶ Yesu wasubhie bho: bhanu bhea bhakorotima, Isaya wabhuta bhirenga shu, bhuno ngi bwatiranyiwa cho: E bheya mbi bhantundange ra mitutu, iina e mitima yabho irikore n'ani. ⁷ E ritunda rabho ra bhusa, mw'ihana myomba ya bhea nti yatukire kuri ani. ⁸ Musinja e myomba ya Ongo, musimira inji ye bheya. ⁹ Washisha tu bho: murimya nguru e myomba ya Ongo, kongo musiya ho na nji yiinu. ¹⁰ Bhusha Musa webhanga: tunda so na nsoko; na: Ungu waher'ishe na nina wakomenwa oku. ¹¹ Ina bhanu, mwebhange: Kubha mweya webhakur'ishe kuti nina: Inchi chamukunink'ani korobhani, ngi riebha mbu uhembo kwa Ongo, ¹² Kiro musierere waronje kikai kur'ishe ari nina, ¹³ Ngi bwa noa bhanu e kinwa cha Ongo itukana n'e myomba yiinu, inji yironjie bhanu. Na bhimpe bhiingi bhikorange bhanu byasusane hotu nambyo. ¹⁴ Kuruma nampo, wabhikira e kikembe kuri we, washisha bho bhuno: Muntee mate bhanu bhati, na murukire. ¹⁵ Kusira, mu mweya, inchi kikimengi chamu mu bhishabhisha, iina inchi chasaa kumunda nae ngi kimubhishabhishanga. ¹⁶ Ingu uri na mate eriyorukira, worukire. ¹⁷ Wakiya wamakime mo numba, na nti wamasheere kore ne kikembe, e ntumwa sae samushisha momushumo ngo. ¹⁸ Washisha bho: Nti musibha mbu kusira kiri kumbuka cha mubhishabhisha mwea na kiro cha kime kumunda nae? ¹⁹ bhusha ncho nti chakime mo mutima, iina mo bhura bwae, na kwiire ekubwiya, kushururwange e bhiyo bhiti. ²⁰ Webha tu'cho: E kisaange kumunda n'e mweya, ngi kimubhishabhishanga. ²¹ bhusha ku munda, n'e mitima ye bheya, ngi kutukanga e myanikiri yanyara, bhusingirani, bhushuma, ishura, ²² Bwibhi, ishima bhehe indi rema, bhushu, manko, bhukorotima, karawa, ihambike, eyume. ²³ E bhikai bhiti byemema bhisaanga kumunda, na ngi bhibhishange mweya. ²⁴ Yesu, mwituka rae mpo, wenda wakiya wamatuka mpo wenda ku Tiro na ku Sidona. Wakime mu numba nima, ntwashimanga mweya wa sibha; iina nti w'ebhisanga. ²⁵ Bhusha mumina uma, ungu mwisi we ntwamatingirwa n'ishumbu, irukira nti bhebhange kuri Yesu, weya na kwitaa mo makako nae. ²⁶ E muminango abhesenga nti muyunani, musirofonika w'ibhutirwa. Wamuhema wahensanye e rishumbu kuri mwisiwe. Yesu wa mushisha: ²⁷ Reke kasa e bhana bhasukute; bhusha nti rahunda irisa e kamboonsa ke bhana, n'itaire ko bhiwaana bya mbibhi. Webha, mureki kasa bhana bheye kuri ani bhushwa e bhubhake bwe mbingu bwasusa bho. ²⁸ nanki, e Mukota, e mumina wamusubhie, iina e bhiwana, bhirisanga e bhikirengi e kwansi e bhutanda. ²⁹ Mucha wa mushisha: Bhusha n'e kinwa ncho, enda, e rishumbu ra mwisi wabhe ramatuka. ³⁰ Na wakiya wamakuruka mo mwae, wakumana Musiwe nti wekinde ha ntange, e rishumbu nti ramatuka. ³¹ Yesu watuka ku Tiro, wakuruke ku Sidoni mu nse y'ienda e kunyansa ya ku Galilaya, itiyana e chuo cha ku Dekapori. ³² Bhamurishie mutwitwi, wabhesanga utanga koch'iebha, na bhamuhema, wamuterek'emine. ³³ W'eshika nae kore ne nteko, wamuriya e mirimba mo mate, waturana mo rwami rwae ne rote rwae; ³⁴ Kuruma naha wararame e kwiyo, wahumura, n'iebha: Efata, ng'eriebha, kanduka. ³⁵ Nampo e mate ae akanduka, hihahiha, e rw'ami r'obhoka, na webha shushu. ³⁶ Yesu washisha bho, kiro bhature mwea uti uti e mwasi ngo; ina mor'eshisha bho bhansansa e mwasi na nti wamahangire bho. ³⁷ Bhabhesenga nti bhari mu bhishisharo bh'ikiri, bhebha: Ukorange bhiti nongobho; a kiro ukandong'emate ebhatwitwi, niebhesha e turumbu.