¹ Kwiya, otu ruma rweruhuka rubhikirwange mbu rwemetabhi-rwaroso, Yesu nt'ukundukanyange mashwa a mbuto. E bhemisa bhae bhanoanga etukobya n'erisa to, kuruma n'eritokoto mo mine yabho. ² Bhafarisayo bhima bhashishabho: bhushe nanki bhanu muronjange mbi nti byasimirwa ironjiwa morotu rw'er'iruhuka? ³ Yesu wasako bho: nti muresisiris'echebha Daudi, warekiya uri na rwaka, iwe nambi bhabhesenga hima nae; ⁴ Imbw'akimengae kumund'enumba ya Ongo, wating'etumbonsa tw'erohembo rwa Ongo, mw;erisa, n'eninka imbi bhabhesenga hima nae, kiro mbu abhesenga nti nti twa ninkwa ho e bhashe bhakungu mw'erisato? ⁵ Na washisha bho: e mwana w'emwea nge mukakare nakubha w'erotu rw'er'iruhuka. ⁶ Rwiya, rumpe otu ruma rw'eruhuka , Yesu wakime kumund'erirameso, na nt'uhanange. Mwabhesenga nti muri mwey'uma emwine wae w'ekwabhume ntwarekama. ⁷ E bhandiki n'e bhafarisayo abhesenga bhasisirisange Yesu, mw'ikairire kuti useramya erotu rw'eriruhuka: abhasenga hende nti bhahunange ntangiro y'emusongere. ⁸ Ina wasibha e myanikiri yabho, na washisha e mwea ngo wabhesenga n'emwine wakama: simana na rika munkati. wasimana, n'erika usimene. ⁹ Na Yesu washishabho: nabhushisha kuti rasimirwa, erotu rw'eruhuka, ikiya bhongo ari ikiya bhubhi, iyoshukaya mwea ari imushura. ¹⁰ Himpo, watamby'emeso mo bhaati, webha nango mwea; oro e mwine wabhe. Waronjambo, n'emwine wae warama. ¹¹ Bharisa bhusubhuke, n'ishishana bhasibhe bhuni bwakiyabho Yesu. ¹² Mo kashangi nko, yesu wenda kubhasirwa n'erou bhushe n'ihema, na wecha mutu emuti mw'ihema Ongo. ¹³ Bwarekiya bwamacha, wabhikira e bhemisa bhae, warondora bho mw'ekumi na bhabhi, waninkabho rina ra ntumwa: ¹⁴ Simoni, ngwabhikirangawe mbu Petero; Andere, musiky'abho, Yakobo, Yohana, Firipo, Bartoromayo. ¹⁵ Matayo, Tomaso; Yakobo, musike wa Alfayo; Simoni museroti; ¹⁶ Yuda, musike wa Yakobo, na Yuda Isikariote ngwabhundukenga weri musibhura. ¹⁷ Wahita hima nabho n'esimana mo bhurambo, himpo habhesengang'ekikembe ch'ebhemisa na kikanda cha bhea Yudea iti, bha ku-Yesrusaremu, n'ebhe wendende nyansa ya ku-Tiro na ku-Sidoni. Bhiyanga mw'emurindire, na mw'iramiwa e makoni abho. ¹⁸ Imbo abhesenga bhanubhiwange na bhifasi bharamiwa. ¹⁹ N'enkumanano iti abhesenga isondange e mutinge mo, bhushe maa abhesenga amutukange mo na nt'uramyang'ebhati. ²⁰ Nampo Yesu, wasimany'emeso kuri e bhemisa, webha: mukasanirwa bhanu mbi e bhasene, bhushe e bhubhake bwa Ongo bhuri kuri bhanu! ²¹ Mukasanirwa bhanu mbi muri na rwaka e kashangi kano, bhushe mukusikutayo! Mukasanirwa banu mbi murengi e kashangi kano, bhushe bhasebhesayo munkaty'esangoa. ²² Mukubhesayo mukasanirwa, bhasekiayo ebhea bhabhubhaa bhasekiayo bhabhuhiange, bhabhunubyange na bhasekiayo bh'erikirang' erina rinu bhuri rema, bhush'erina r'emwan'emwea. ²³ Mukokomanga mo rotu ndo, n'iyomerae na ngoa, bhush'erohembo rwinu rusebhayo rukiri ekwiyo, bhushe ngwakianga bhishe bhakor'ebhatahwa! ²⁴ Ina, bhonso kuri bhanu, bhasoki, bhushe bhanu mumakinda er'ibongwabhongwa rinu! ²⁵ Bhonso kuri bhanu mbi musukuta, bhushe mubayo na rwaka! bhonso kuri bhanu mbi museange kano kashangi, bhushe mukubheseyo mu kiro na munkaty'eminsori! ²⁶ Bhonso, amabhesa ebhea bhamebha yo byakoma kuri bhanu, bhushe ngwanikiranga bhishe, kuri e bhatahwa bhashukishuki! ²⁷ Ina nibwerengi, bhanu mbi munorukirengi: mushime e bharenda bhinu, mukore byakonda mu mbi bhabhubhaa, ²⁸ Mukasanyii imbi bhabhuheraange, muhemi mbi bhabhunubyange, ²⁹ Kuti bhakuhumba moritema rima, mushee n'erimpe hotu. kuti bhakunyaka e ngombe yabhe ya kunanda, kiro muhangisa ne yabhe ya kumbo. ³⁰ Ninka kinsingu usekuhema, n'angisonda e kuruchiwa chabhe kuringu wasekubhakacho. ³¹ Inshi kihunange bhanu ebhea bhabhukoricho; mukore bhubho-bhubho kuribho. ³² Mumashima mbi bhabhushima, murengana mukini chaasibhirwa mo bhuni? ebhabhi nabho hotu bhashima imbi bhashimabho. ³³ Amabhese nti mukukor'ebhongo mumbi bhabhukore byakonda, murengana munki ch'esibhirwa mo? ebhabhi nabho hotu bhakianga mbo. ³⁴ Na amabhesa nti mukusombya mbi kuri bho murindire ininkwa, murengana munki ch'esibhirwa mo? ebhabi hotu bhasombyange bhabhi kongobhaninkwa bhubho-bhubho. ³⁵ Ina mushime e bharenda bhinu, mukore bhongo, na musombye nti ntimurinde kikai. N'erohembo rwinu rusebheseyo rukiri, na mukubhese bhana bhangu uri ekwiyo nguru, bhushe wahunda mo bhasir'enchimi n'ebema. ³⁶ Mubhese bhabhonso, imbu bhuri iso winu wabhonso. ³⁷ Angi muronjie umpe obhansa, na bhanu muturonjiwi obhansa; angi ronjie umpe obhansa rwikwa, na bhanu muturonjiwi yo obhansa rwikwa; musiereri na mukusiererwa. ³⁸ Muninkane, na mukunikwa: bhasekubhure mo muhango winu ngerero yakonda, yasoserwa, yainyiwa- inyiwa na iritabyaange; bhushe bhasekuronjie oero hima n'engerero nji yaakoresha bhanu ³⁹ Webha nabho hotu uno mushumo: kihimuhumi chamwenja kimpe kihumihumi? ntibatenduki ebhati bhabhi kumunda na kiribu? ⁴⁰ Emwemisa utamurenga Nyerekurwabo; ina kinsi mwemisa ngu wabhererera waasusana na Nyerekurwabho. ⁴¹ Bhushanki bwasunga ongo e kasukari kumunda n'eriso ra munakinu, na nti ntungasung'ekisu kiri kumunda n'eriso rabhe? ⁴² Ari bhuni bwamebha ongo kuri munakinu: e munakitu, ndeki ntakuto e kasu kari mo riso rabhe, ongo ngu utungasung'ekisu kiri kumund'erabhe? mukorotima, tunj'eraroso ekisu moriso rabhe, nampo kusunga bhuni bwamutuka e muremba uri kumund'eriso ra munakinu. ⁴³ Nti muti wakonda ng'urianga byuma byema, ari muti wema ngwaria byuma byakonda. ⁴⁴ Bhushe kinsi muti usibhirwange mo chuma. utumukora byuma mumenke, na bhatatunjanga byongo mu runkenke. ⁴⁵ E mwea konda utunjange bhikai byakonda mo katiri kakonda k'emutima wae, nang'wema utunjiengi bhikai byema byekatiri kema; bhushe mo bwingi bwe bhiri mo mutima ngi byebang'ebhunu. ⁴⁶ Inki kisingwange mumbikira Nyerekuritu, Nyerekuritu! na mutungaronja ebyebh'ani? ⁴⁷ Nsebhushea inye ngwasus'emwea ingu wiya kuri ani, worukirang'ebhinwa byani n'ibhereresha byo. ⁴⁸ Wasusanyiwa na mweangu, wimbanga numba, watima, watima nguru, n'eriy'emuhafu mw'okanga. kwiya mbura, n'ereyuhu resunda munjo numba, rafund'iyendura yo, bhushe yumbwanga ishu. ⁴⁹ Ina kinsingu werikira, na nti wabhereresha, wasusanyiwa na mwea ngu wumba numba habhasirwa er'otu, hasira muhafu. Ereyuhu resunda muyo: kuruma yenduka, n'er'erumo ranjo numba rabhesa rikiri.