¹ Wakiya wakindanya e mwebhe munkati n'e kikembe nchi abhesanga kimorukirengi , Yesu wakime ku Kapernaumu. ² Mukakare uma wabhashirikani wabhesanga na mufuku ung'wamushima we nguru nae nti mukoni w'ikwa. ³ Iyorukira bhashambarange kuri Yesu wamutumire bakungu bha bhayahudi murimuhema weye karamya e mufuku wae. ⁴ Bheya mu makako na Yesu n'imubonganya mwiebha: wakomenwa isimirwa n'abhe 'ngo; ⁵ Bhusha washima e chuo kitu , na iwe ng'wimbanga e sinangoki yitu. ⁶ Yesu wenda nabho, na nti abhesenga kwihi ne munyumba impi hakianga watuma bhira bhae muri mushisha: Mukota angi nuba ringi bhusha mor'ikwesibhirira, utumukochange ikime mo numba yani. ⁷ Bhushwa tu naancho ntamukochange iya mo makako nabe. Iina ebha kinwa ne mufuku wani userama. ⁸ Bhushwa ani ne bhukakare bwani mubhashirikani, niri nabhashirikani bani n'irenga bho; na namire uma enda! na nti wenda; kuri umpe iya! na nti weya; na kuri e mufuku wani: Ronja cha! na nti wa ronja. ⁹ Yesu warukira e bhinwa mbyo, wasimira e mukakare we bhashirikani, worukira tu e kikembe nchi chabhesenga kimubhungurange webha: Nabhushisha; akiro mo Isiraeri ntangakumanananga n'isimira rikiri mbu. ¹⁰ Murikuruka re bheya mbi bhatumwanga ne mukakare we bhashirikani, bhasunga e mufuku nti wamarama. ¹¹ Rump'otu; Yesu wenda mo rubhungu rukiri rwa ku Naina, E bhemisa bhae na kikembe kikiri ch'emisanganyanga nae. ¹² Bhiya kwihi hekura e r'obhungu rukiri; bhasicha e kwansi kinda cha mweya na nti mwana changomo, nina nti mushumbakari; watimbwanga na bhea bhingi. ¹³ Mukota mor'imusunga worukira bhonso bwingi n'imushisha: Ang'iire! ¹⁴ Washeere waturana mor'ekingi. E bhabhesanga bhariy' er'ekingi bhasimana. Webha: ongo musike na kushisha, simana! ¹⁵ Ne mukwi warika n'ebhucha ishambara. Yesu wamuninka nina. ¹⁶ E bhati bhasubhaha n'itata Ongo mwiebha: mutahwa mukiri wasungwa munkati n'iitu, na Ongo wakusona e ruanda rwae. ¹⁷ E mwebhe kuri Yesu watamba mu Galilaya iti na mu byuo bhiti bya wendende na ku Galilaya. ¹⁸ Yohana worukir' ebhiti mbyo kuri e sa ntumwa sae. ¹⁹ Wabhikira bhabhi n'itumabho kuri Yesu, mw' emushisha: kuti oongo ngwiiya kuti turindiritu umpe? ²⁰ Bheya mu makako a Yesu, bhebha mbu Yohana murubiki wabhea watutuma kuri ongo mwiebha: oongo ngi ungo warerindirwa , kuti umpe ngu urindengi bhate? ²¹ Muntambi nso, Yesu waramya bhea bhingi makoni abho; esankata; mashumbu n'iramya bhihumihumi bhiingi. ²² Na washisha e santumwa sa Yohana: mwendi kature Yohana byamasunga bhanu n'iyorukira: Bhihumihumi byamakae, esankata s'ienjange na mindi, bhabhembi bhashuururwange, e bhatwitwi bhorukira, e bhakwi bhafuka, mwasi wa konda uturwange mo bhasene. ²³ Wakasanirwe ngu ani nti ntangiro y'er'imina rae! ²⁴ E santumwa sa Yohana sakiya sa kuruka, Yesu webha ne bheya mo mwasi wa Yohana: mukwenda kasunga hasira kikai? kifafa kikunya n'iyuhu? ²⁵ Iina mukwenda kasunga nki? mweya wambara shu? kae e bhambara nchangi sahunda, na bharika hakoma; bhari mu manumba a bwami. ²⁶ Mukwenda kasunga nki? mutahwa? bhumbo ngi bwabhushisha ani n'irenga mutahwa. ²⁷ Ngi ungo uri mo mitiro: sunga bwarebheka e mureri wani kubhusondori nabhe; mw'etunganya ense yabhe kubhusondori nabhe. ²⁸ Nebhange munkati ne rubhuto rw'ebhomina; kusira mukakare kuri Yohana. Ngi chasingwa; e mwansare mo bwami bwa Ongo nge mukakare imurenga. ²⁹ N'ebhati mbi bhamwerukiranga na bhashehoro bhasimira Ongo mor'irubhikwa mu mecha ra Yohana; ³⁰ Iina e bhafarisayo ne bhandiki bhatasimiri erubhikwa na Yohana; bhanena bhitukange kwa Ongo. ³¹ Kurinye ngi kwamurengekanya 'ni e bheya bhe kiranga kino; na nti bhasusana na bhanye? ³² Bharengekane na bhana mbi bharikechiwa mu rushu na bheshishange: Twakubhombe tuhanda na nti mukumina. Twakubhusimbe mu bhoonso, nti mukure. ³³ Bhushwa Yohana weyanga, nt' warisanga munkati n'inu na nti womonga nsande nti mweba mbu uri n'eshumbu. ³⁴ E Mwana we mweya wiya urisange n'iyomo, na mweba: murohoroho na mwomori, mira wa bhisa e chuo n'ambi nti bhikocha. ³⁵ Ina e risengeha rasungwanga mo b ana bhae bhati. ³⁶ Mufarisayo uma wahemanga Yesu wariri nae hima. Yesu wakime mo numba ye mufarisayo n'ibhucha irisa. ³⁷ Hasungwa momina uma mubhi munkati ne rubhungu rukiri, wasibha mbu Yesu urisange mo numba ye mufarisayo warishamo e chupa ririsere rungo. ³⁸ N'ihita mubhisando bya Yesu. waare, na kuruma: watocha e mindi ya Yesu na bhiririyo byae, kuruma wakono ne bhuteo bwae, n'emukubhur'erungo. ³⁹ Bhafarisayo imbi bhamubhikiranga murisunga mbo, bhashishana: E mweya ngu wamubhesengi nti mutahwa, wamusibhange ungu ngi nye mu bhomina ungu wa muturana mo. Wamusibhange nti mubhi. ⁴⁰ Yesu watinge kinwa mw'imushisha Simoni, niri na kinwa ch'ekushisha. ⁴¹ Mutumba uma wasombyanga bhea bhabhi; uma faranga mia isanu na umpe makumi asanu. ⁴² Bhusha bharukanga byi mutuwa; wasasira bho e mwinda e bhabhi mbo. Inye mubho wamumushima nguru? ⁴³ Simoni wasubya: nosi nti ungu wasombiwanga bhiingi. Uronganya shu, Yesu wa mushisha. ⁴⁴ Wikebhera kuri e momina, n'iebha kuri Simoni usunga e momina uno? Nakukime mo mwabhe iina nt'ukumpese mecha ishua e bhisando byani, iina e momina ngu, watocha e bhisando byani mubhiririyo byae n inikono ne bhuteo bwae. ⁴⁵ Utungandumbanga, iina iwe itukire nakime muno ntwakureke anga na ntambi nima indumba mubisando byani. ⁴⁶ Nti ukunikubhure rungo mu muntwe, iina iwe wakunkubhure rungo mo bhisando. ⁴⁷ Ngi chasingwa na kushisha; e bhubhi bwae bwingi bwasasirwa: bhusha wakushima nguru. Iina muungu wasasirwa bikeke nt'washima rikeke. ⁴⁸ Washish'e momina; e Bhibhi byabhe byasasirwa. ⁴⁹ E bhabhesenga bharisange nae bhashishana; inye ngu, usasirange e bhibhi? ⁵⁰ Iina Yesu webha ne momina; er'isimira rabhe ngi rakuramya, enda mu bhuhoro.