¹ Ebwabhesengae nturi ebwendende ne nyansa ya Ku Genesareti, ne kikembe che bhea nti kikanyirengi kurie mw'iyorukira e kinwa cha Ongo. ² Wasunga kwendende ne nyansa bhitange bhibhi, himpo ngihabhesenga hasikengi e bharobhi mw'eshua etukira twabho. ³ Wakambe mu kitange kima echabhesenga cha Simoni, na wamuhema mbwetunde kampompo mokirindo. na warika mo kitange nantuhanange ehkikembe che bhea. ⁴ Mu ntambi yarekengae eriya bho, were Simoni: mbungure munkati ne mecha, na rekera e tukira tw'inu tw'er'irobhe. ⁵ Simoni wamusako: Nyerekuritu twamakora emutu euti nanti twakushee 'nki; ina mu kinwa chabhe twarekere tukira. ⁶ Warekiya wamarekerako, washura bhikwa bhingi, netukira twabo twasondi bhereka. ⁷ Bhashisha bhanachabho ebhabhesenga mukimpe kitange mwiye katusake. bheya, nabharisia e bhitange bhibhi, bhiya mu ntambi yisondi tiya. ⁸ Murisungabyo, Simoni Petero wahita mo mindi ya Yesu , webha: Nyerekuritu, tuka kwihi nani, bhushwe ani mwea wa bhubhi. ⁹ Bhushwe washisharanga nguru, iwe ne bhabhesenga hima nae, bhushwa ne rirobha e rakorangabho. ¹⁰ Nangi bhumbo na Yakobo na Yohana, bhana bha Sebedayo, bharumbya bha Simoni. Himpo Yesu were Simoni: kiro subhaha, itukire runotu ukubunduke murobhi wa bheya. ¹¹ Na, bharikia bhamarisha ebhitange mo kirindo bhasia'ebhiti bha mwemisa. ¹² Yesu wabhesanga nturi mubhungu ruma, nampo, mweya uma urisere bhibhembi, warekiya wamamusunga wahita mu makako nae, wamuhema: nyerekuritu, umasase, umunishuurura. ¹³ Yesu watereka e mwine wamuturanamo, webha: nisondange ushuururukara r'abhe, nampo ebhibhembi byamutuka. ¹⁴ Na wamwire mbu kiro were mweya. ina, wamwire, enda kishea kuri e bhashe bhakungu, na kuto murishukara rabhe ebyatiranyiwanga na Musa kongo ke bhimbyo byasake bhuri kariho. ¹⁵ Enkuru yae yasansabhana tu, na kikembe cha bhea chia kamwerikirire niramiwa n'emakoni abo. ¹⁶ Nae, wetunda mo bweru kahema. ¹⁷ Oturuma Yesu ntuhanange. E bhafarisayo ne bhahani bhe myomba bhabhesenga bharimpo nti bharika hansi, nti bhatukirengi musembungu siti sa kuNgariraya, nasaku Yudea na ku Yerusaremu; ne bhunkangwe bwa Nyerekuritu nti bwisheange mwiramya. ¹⁸ Nampo,bheya bhima nti bhariya mo r'ekingi mweya uma wabhesenga ntwasamba rumbonsa, nti bhasondange imukimisha ni mutereka mbu wamusunge. ¹⁹ Nambu e bwabhesenga bhusondangebo mbu bhamukimishe , bhushwe bwe nteko, bhataya eku mambiyo, bhamuhicha mu kiribhu ne r'ekingi rae, munkati n'e nkumanano hamakako na Yesu. ²⁰ Murisunga e risimira rabho, Yesu webha: ongo mweya, e bhubhi bwabhe bwa masasirwa. ²¹ E bhandiki ne bhafarisayo bhabhuchi ianikira niyebha: inye ngu, ewebhange bhihabhuhabu? inyengu wamusasira bhubhi, kuti nti Ongo wesine. ²² Na Yesu warikiya wamasibha e myanikiri yabho, watinge e kinwa niyerebho: ini myanikiri irikire n'inu mu mutima? ²³ Kini ngi chakonda mw'iyebha: e bhubhi bwabhe bwamasasirwa, Ari iyebha simana na enda? ²⁴ Iyo, kongo msibha mbu emwana we mweya uri mo chuo n'e bhunkangwe bw'erisasira: washisha e mukoni we rumbosa, simana , riya erikingi rabhe, na enda mor'ichumbi r'abhe. ²⁵ Na mukashangi nko, wasimana munkati nabho wariya e rikingi, abhesenga rariarwamuwe, wenda mo numba yae, mwitata Ongo. ²⁶ E bhati bhabhesenga nti bhari mubhishisharo, bhatata Ongo nti bharisere na koha, bhebha: twamasunga runotu bhikai bhishasha. ²⁷ Ituka mpo, Yesu watuka, wasunga e muhemi we horo, wabhikirwa mbu ngi Rawi. warika e hahoreshiengi we wamwire: n'emise. ²⁸ Na wasia e bhiti, wasimana na wa mwemisa. ²⁹ Rawi wa muteke bhiyo bhingi mu mwae, na bhahemi bha horo bhingi na bhampe bheya nti bhari mo bhutanda nabho hima. ³⁰ E bhafarisayo ne bhandiki bhomuma nabhere ebhomisa: bhushwe nanki bhanu murisange na bhanu mwomongi ne bhahemi bhe horo ne bheya bhema? ³¹ Yesu watinge kinwa, werebho, e bhankangwe nti bharaa mu bhamunganga, ina e bhakoni. ³² Ntinariya kabhikira ibhundura e bharengekana, ina ebhabhi. ³³ Bhamwire e bhomisa bha Yohana, bhurimbo bhebhafarisayo, bhahemange retina bhiyo ngendo ningi na bharonjange mahemo, ina e bhabhe bharisange na bhomongi. ³⁴ Wasako bho; mumukochi hangise mahemo etina bhiyo kuri e bhira bhe muherucha mu ntambi e muherucha uri hima nabho. ³⁵ E matu asiyayo ingo muherucha wasekiyayo wamakuturwa mubho, nampo bhasehemayo retina bhiyo e matungo. ³⁶ Werebho umpe mushumo: kusira mweya wa mubhenga nshengi nshasha mo kebhe ni terekacho mu nshangi ya kunguha; ari ibhenga e nshangi nshasha ne kebhe cha kutunjae, kitamusaa mu nshangi nji ya kunguha. ³⁷ Na kusira mweya wa muriya mau mashasha mukibya cha kunguha, ari wariya mau mashasha nty' abhenga ebhibya, nti akubhuka, ne bhibya nti bya rimina. ³⁸ Ina nti muriya e mau mashasha mu bhibya bhishasha. ³⁹ Nakusira mweya wamakindi yomo mau amasia, nt'wasondekanyatu mashasha, bhushe ntwebha; eamasia akonda.