¹ Yesu, warisa e Mutima-wakonda, moretukae muri Yorodani, nao wamwenja mo bweru; ² Nanko werekwanga na mushumbu matu makumi anye. Abhesenga utangarisa ematu 'atingo, na morekindaweo, worukira rwaka. ³ Mushumbu wamushisha: amabhe nty'ongo musike wa Ongo er'erikoi ndi ribhunduki kambonsa. ⁴ Yesu nomusakongi: chatiranyiwa mbu emwan'emwea utamubha ho mu kambonsa ho. ⁵ Mushumbu wamutarisha hakangama, n'emushea mu kashangi kakeke e mabhake ati ari mo chuo; ⁶ N'emushisha: n'sekuninka ebunkangwe bhuti mbu n'eritatwa rangi mabhake, bhushwa nareninkwao, na nininkanangao mu kinsi wasas'ani. ⁷ Umehicha hamakako ani, eati asebhesa abhe. ⁸ Yesu wamusako; rarekind'etiranyiwa: ukuhita hamakako na Nyerekuritu Ongo wabhe n'emukore wesine ho. ⁹ Mushumbu wamwenja tu ku Yerusaremu, wamutereka habhasirwa n'erirameso ra Ongo, wamushisha: amabhe nty'ongo musike wa Ongo, irekere etuka hano n'ekwansi; bhushwe charetiranyiwa: ¹⁰ Wasebha n'esa ngashani sae bhushwa nabhe; kongo bhakuranga, ¹¹ N'ikwangirira momine, utusitaringi mw'ikoi. ¹² Yesu wamusako: rarebwambu angi ereka rotu nyerekuritu, Ongo wabhe. ¹³ Kuruma n'erimwereka mo bhusus'ebhuti mbo, mushumbu wamureke, mw'erindire kampe kashangi ngi nki karengekana. ¹⁴ Yesu ukiri urisere n'e bhunkangwe n'enkuru yae yenda mobyuo bhiti byekwendende. ¹⁵ Nt'uhanange mo marameso a Ongo na nt'utatwang'e kuti. ¹⁶ Wenda ku Nasareti ekoshukengae, abhesenga e bhukiange howe, wakime mor'irameso ra Ongo erotu rw'eriruhuka. wasimana mw'esisiris'emitiro. ¹⁷ Bhamuninka e mitiro y'e mutahwa Isaya. warekiya wamobhora, washee mpo abheseng'ehatiranyiwambu: ¹⁸ E mutima wa Nyerekuritu uri habhasirwa nani, bhushwa wamantiranga rungo mw'etur'emwasi wakonda mo bhasene, webha mbu nendikaramya ebhari n'e mitima yababara. ¹⁹ Mw'iyeber'etuhungu eriobhorwa rabho, n'ebhihumihumi erikae, iyobhora ebhanenwa, mw'etura emwasi w'ekindi ch'esensasi sa Nyerekuritu. ²⁰ Kuruma nampo warindik'e mitiro, wakuruchieyo e mukori , warika hansi. ebhati mbi bhabhesenga kumunda bhamusumy'emeso. ²¹ Nampo wabhuch'iebha nabho: runotu kino kinwa ch'emitiro chamorukira bhanu chamakindi ibhererera. ²² E bhati bhabhes'ekariho kae, bhabhesenga n'eshishara mo bhinwa by'esensasi abhesenga bhisaangemo bhunu bwae, bhebha: nti uno ngi musike wa Yosefu? ²³ Yesu washishabho: mukunikor'emwani uno: muramyi, iramye ongw'esine; na mukunereyo, kora kuno. mo chuo chabhe ebhiti mbi byorukirayo bhate byakukoranga ongo ku Kapernaumu. ²⁴ Ina n'ibwerengi mo reira kusira angana mutahwa ing'usimirwanga ishu ko kwabho. ²⁵ Nabwerecho mo reira: abhesenga kuri bhashumbakari bhingi ku Isiraeri mo kiranga cha Eria, ekwiyo kwarekiya kwabhese rwaka rukiri mo chuo kiti. ²⁶ Nampo, Eria ntw'erirwanga mbu wendi kuri uma mubho eina wenda kw'emushumbakari wa ku Sarepata mo chuo cha ku Sindoni. ²⁷ Kwabesenga hotu bhabhembi bhingi ku Isiraeri mo matu a Erisha nampo nty'abhesenga uma mubho washuururwanga kuti nti Namani emusuria. ²⁸ E bhati bhasubhuka, e bhabhesenga mor'irameso mor'iyorukira bho e bhinwa mbyo. ²⁹ Warekiya wasimana, bhamukumbya mund'obhungu n'imwisha habhasirwa n'erou abhesenga rw'imbwa mor'obungu rwabho mbu kongo bhamuhimire kumbo. ³⁰ Ina Yesu weta munkati nabho na kw'eire. ³¹ Wahite ku Kapernaume, obhungu rwa ku Gariraya na nt'uhanange mor'otu rw'ereruhuka. ³² Bhatingirwa n'emahano ae bhushe abhesenga ntw'ebhange nabho ra bhuhime. ³³ Wabhesenga nti uri mor'irameso, mwey'uma uri n'eshumbu na nti ukuange murenge wasuma: ³⁴ Ah! inki ngi kiri munkati bhate nabe, Yesu wa ku Nazareti? ukwiya katuriminya. nikusi mbu ongo inye: mushuururwa wa Ongo. ³⁵ Yesu wamukwanya, nomushishange: kobha, natuka mo mweya uno. E kifasi chamusunda munkati n'e bhea, n'etuka kumunda nae nti ntichamubhabhaya. ³⁶ E bhati bhatingirwa na koha, bhashishana; kini kinwa nshi? webhange na bhuhime na bhunkangwe mo bhifasi nti byatuka na kubha! ³⁷ Enkuru yae y'enda ekwendende kuti. ³⁸ Morisaae mor'irameso, wenda mor'echumbi ra Simoni. Inabhe wa Simonni abhesenga nti urimo kabhurura kamusaka nguru, bhamuhema wamusaki. ³⁹ Wamwindame, wakwanya ekabhurura, nako katuka. E ntamb 'iya iya wasimana n'ikorebho. ⁴⁰ Mor'iyoriyoro ndo e bhati mbi abhesenga bhari na bhakoni bhamurishie bho. Waterek'emine yae mu kinsi uma, n'ebhati bharama. ⁴¹ Bhifasi byatuka mu bhea bhingi by'irakengi: Ongo musiky'a Ongo. Ina wakwanya byo nt'utangahuna mbu byebhe bhushe abhesenga bhisi mbu iwe ngi Kirisitu. ⁴² Morich'ebhutu, watuka, wenda hari bweru. nkumanano nkiri ya bhea yabhuch'emusonda, bhenda kiya ehariwe, abhesenga nti bhahunang'erika nae imbu kiro watuka tu. ⁴³ Ina washishabho: rihunange ntatur'emwasi wakonda w'ebhubhake bwa Ongo mo simpe mbungu, bhushe nancho ngi chasingwa bhebha mbu n'iye kuno. ⁴⁴ Wabhuch'ihan'ebheya mo marameso a Ongo a ku Gariraya.