¹ Munjo ntambi, bhampe bheya kundo bh'eya k'uri Yesu kamuture imbi bhinwa by'ebhagariraya e bhakianga Pilato wasonya e nchama y'abho na y'ebhinsinso byabho. ² Wasubhie bho, w'ebha: Bhanu muanikirange mbu bhano Bhagalilaya bhabhesanga bhabhi irenga e bhampe Bhagalilaya e bhati bhushwa inji minubho eyabhanga nabho? ³ Anga nabwere, eina mumabha nti m'ubhinduka, mushirira bhanu bhati, bhuri ibho. ⁴ Nti cha, imbi bhea ekumi n'e munane, ebasikirwanga n'enumba ya ku Siloamu n'iya e bhati, bhanu muanikirange mbu bhabhesanga bhabhi irenga mbi bhisa ku Yerusaremu? ⁵ Anga n'ibwerengi mbu nti nge bhumbo eina mum'abha nti mubhinduka, muku 'shirira bhanu bhati bhuri ibho. ⁶ Wak'era tu uno mushumo: Mweya uma w'eka mbuto mw'ishwa rae weya katangura ro mw'isonda byuma, eina utashei anga na kima. ⁷ W'ere ngu emurangi w'ando ishwa: Nt'ukae, iye myaka ishatu nji, n'iya kasonda byuma murino ishwa eina nti narishee anga na kima. kondao inki chasingwa wabhisha er'oto bhusabhusa? ⁸ E murangi wasubya: e Nyerekuritu, siyere tu o uno mwaka n'ishekeri o, n'itarishie or'oto. ⁹ kuti wamubhuta ho byuma, nti cha, nti ukondayo o. ¹⁰ Yesu wabhesanga h'irango nti uhanange er'otu rwer'iruhuka, ¹¹ Habhesanga uma nt'uri n'e shumbu ra bhurema, mu miaka ikumi na munane, wabhesa nt'wamekunya na nt'utamioro wesine. ¹² Yesu warekia wamusunga, wamubikira, wamw'ere: E momina, umoborwa mo burema bwabhe. ¹³ W'ira e makasae, habhasirwa nae, munjo ntambi watunganana watata Ongo. ¹⁴ Eina shemin' erirango wasubhuka bhushwa mbu Yesu wakuramya mweya er'otu rw'enduhuko, w'ere bhea: kuri matu mutubha a murimo Mwiye. ¹⁵ Nyerekuritu w'asubya: Bhanu mbi bhakongobhanya, inye uma mu bhanu ng'utobhoranga e nkambu ari empunda yae er'otu rw'eriruhuka n'ienda nayo komoshayo? ¹⁶ Na uno momina, w'erubhuto rwa Ibrahimu ingu wamakundikwa na mushumbu miaka ikumi na munane nji, chamusingwa utobhorwingi m'umbu bhure bhure. ¹⁷ Warekia w'ebha mbyo e bharenda bhae bhati bhakwa nkene n'enteko yakokoma munji mikorere yakonda yakorangae. ¹⁸ W'ebha: E bhubhake bwa Ongo bwasusana nanki? ¹⁹ Nasusanya bho nanki? Bhususene na mpinga ya bhuhi, yatingirwanga na mweya n'irekerayo mo rishwa rae; y'ashuka, y'abha muti mukiri, e mironge ya mu mwanya yakambe mo santabhi sae. ²⁰ W'eba tu: Nasusanya e bhubhake bwa Ongo nanki? ²¹ Bhususene na ntero yaterekwa nsar'ishatu sa nchano emomina wasony' e bhiti byahwire mongo. ²² Yesu watamba mo sambungu n'etunsari, ntu hanange mor'uendo rwae mw'ienda ku Yerusaremu. ²³ Mweya uma w'amwere: E Nyerekuritu, e bhoshukarange bhakeke bho? W'ere bo: ²⁴ Mukie maa mw'ikime mo rubhi ndo rwekene; bhushwa na bw'ere cho, bheya bhingi bhasondayo, ikime, nabho bhatakochiyo. ²⁵ Mu ntambi min'enumba wasimana n'irindik'erubhi, na bhanu muri hambuka ikongota e rubhi n'iebha: E Nyerekuritu, turunduri; nae w'asubya yo: Nti nisi ekutukange bhanu; ²⁶ Nampo ngy'abuchieyo bhanu ieba: tw'aranga n'iomo mu makako abhe, n'ubhesanga ongo hanange munkati esanse s'itu. ²⁷ Na wasubyayo: Nibw'irengi cho,nti nisi ekutukange bhanu bhati mbi bhakori b'ebhibhi. ²⁸ Inko kw'abayo bhiro n'ikukuta e meno, mukiyayo musunga Ibrahamu na Isake na Yakobo n'ambi e bhatahwa bhati mo bhubhake bwa Ongo, na bhanu bhesine murekerwa hambuka. ²⁹ Na bheya bhasaireyo e kwabhume n'ekurembe , na bhampe kunanda na kumbo; nabho bharikayo nti barange bhiyo mo bhubhake bwa Ongo. ³⁰ Na mw'ikae, imbi bhahende bhabhayo bharoso n'e bharoso bhabhayo bhahende. ³¹ Mundotu Bhafarisayo bhima bhamw'iere: Tuka hano eiri rabhe, bhushwa Herode usondange ikuya. ³² W'ere bho: mweiri r'inu mushishe ngo muterere kaenga, run'otu na mukoma nahens' ebhashumbu n'iramya bhakoni, er'otu rwe ashatu nsebhesa nti namakindanya. ³³ Eina, n'ihunange n'enderane n'eruendo run'otu, mukoma, na mukakoma, bhushwa nti rakonda e mutahwa wakwiri kumushi na ku Yerusaremu. ³⁴ E Yerusaremu, Yerusaremu, ongo ng'uyange e bhatahwa n'ikama bho mu makoi imbi ebatumwange ku kwabhe; ngendo singa nsi namasonda ikumanya e bhana bhabhe, imbu bhukiyanga e nkonko yakumanya e byana byae kumunda n'ebyubhi, eina nti mwana. ³⁵ Kaenga, muererwayo e numba y'inu eina nabwere cho. Mutungansunganga tu iya nampe h'ebhereyo bhanu: watatwe ingu w'iya mo rina ra Nyerekutitu.