¹ Munkati nambyo, e bhea bhakumanana mpo bhingi , ibhese ntiye bhanantanange, Yesu wabhuch'iebha n'e bhemisa bhae: bhusondori bw'ebhiti, mw'irange n'echasuma ch'e bhafarisayo, ng'e bhukorotima. ² Kusira chabhisama inchi kitamukimwa n'isibwa. ³ Bhushe nancho kinsi chamweba bhanu mo mwerimya, chorukirwa mo chaka, nanchi chamwebhere bhanu mo kote kumunda n'er'echumbi chaturwa hamambiyo. ⁴ Nabwire: kuri bhanu mbi bhira bhani: kiro musubhaha mbi bhamushur'emubhi na kusira kimpe chamuronja bho kuruma nancho; ⁵ N'sebhushea ngu wasubhahe bhanu,. Musubahe ngu , kuruma n'eshura, uri na bhunkangwe bw'irekera e mweya munkaty'ereribha r'e kasha. ⁶ Nti bhachuyanga twa mironge tubhi mu rumea sibhi? nakiro mbo, kusira kima muto kobiwa habhusondori na Ongo. ⁷ Nakirw'ebhuteo bw'emuntwe bwaransw'ebhuti. Kiro musubhaha; bhanu murina bhusi irenga mironge mingi. ⁸ Nabwere cho, kinsi ngu wan'simira habhusondori n'e bhea, e mwan'e mwea wamusimirayo hotu habhusondori n'esangashani sa Ongo. ⁹ Eina kinsi ngu wanitunayo habhusondori n'e bhea waaturwayo habhusondori n'esangashani sa Ongo. ¹⁰ Na kinsi usebayo bhubhi kuri e mwan;e mwea, wasasirwayo; eina kuri ngu wakambi e Mutima mushasha utangasasirwa. ¹¹ Bhasekiyayo bhama bhutanga bhusondori bw'emarameso, e bhakeri bh'esemansa, n'e bhakakare, kiro mw'eshisha e bhususe nki bw'iebhere mo bhanu ari n'ekisebha bhanu. ¹² Bhushe Mutima mushasha wabuhanayo mo kashangi kika kika ch'eriebha. ¹³ Mwey'uma webha na Yesu, munkaty 'enkumanao: E Nyerekuritu, ebha na musik'itu wabhanye n'ani e mwandwu witu. ¹⁴ Yesu wamusako: ongo mwea, inye ngi waniterekanga mw'ibehsa muker'inu wa mansa? ¹⁵ Kuruma nampo w'ere bho: mw'irange shu na kinsi mwetunduriko, bhushe e bhuingo bw'emwea nti bwatukana n'ebhikwengi we, mo bwingi bwabyo. ¹⁶ Na were bho mushumo uno: E mashwa a mwea uma mutumba abhuta nguru. ¹⁷ Wanikira kumunda nae wesine, webha: Nakiya bhuni? bhushe n'sira buari hasesambura 'ni e mbuto yani. ¹⁸ Sunga, e chakia 'ni : nisekakura etutiri tw'ani, n'eimba tumpe twaariha, n'itume mo e mbuto n'ebyani biti; ¹⁹ Na niseshish 'emutima wani: Mutim 'ani, ongo kwengi mu bhingi; ruhuka, risa, omo, n 'imoa. ²⁰ Eina Ongo wamwire: ongo sira bwenge! muno mutu emutima wabhe usehemwa: n'ebyareronja ongo , bhisebhesa byanye? ²¹ Ngi bhuricho m'ungu utumange byae mw 'iwe wesine na nti mutumba wa Ongo. ²² Yesu webha tu n 'e bhemisa bhae: Ngy'asingwa nabwire: Anga mweshishirisha mo bhuingo bwinu munchi charisa bhanu, ari mo mibhi yinu inki kisembara bhanu. ²³ E bhuingo bw 'areng 'e bhiyo, n'e mubhi w'areng 'esangombe. ²⁴ Musung'ebhikona bho; bhitekanga nikao, bhisira kabhiso ari katiri; na Ongo urishange byo. Ngendo singa bhanu mureng'e mironge! ²⁵ Inye mu bhanu, mo kweshishirisha rae, wamuongerere chunda mo matu e bhuingo bwae? ²⁶ Amabhesa mutumakocha kiro kikai kikeke, inki chamusingwa mweshishirisha bhushe n'ebyasia? ²⁷ Musunge bhuni bhushukang 'esantondo: sitangakora kitikiti, na kiro mbo nabw'ire Soromono nae, mo resima rae riti, ntwakondanga irenga rima ra'to. ²⁸ Amabhesa Ongo wambichange mbo e kisu inchi kiri ho rin'otu mo mashwa na mukoma kisetawa mo kasha, ngendo singa watabwambichi, bhea bh' esimira rikeke? ²⁹ Na bhanu, kiro musondekanya e byarisa bhanu n' ebyasomo bhanu n' angi mweshishirisha. ³⁰ Bhushe e bhiti mbi, e bhabhi bhechuo ngi bhasondekanyange byo. Tita winu usi mbu muraa mu byo. ³¹ Musondekany' e bhubhake bwa Ongo; n' e bhiti mbi mukuninkwa byo mw' iyongerere. ³² Ang' isubhaha, eimba rikeke; bhushe Tita winu waresunga ishu wabhuninke ebhubhake. ³³ Muchuy' ebhikwengi bhanu, na muninkane byo mw'ohembo. Mw' ironjei inku s'ang' ikunguha, katiri k' ang' isira e kwiyo, inko e mwibi utameya kwihi, nanko erunsenge rusir' ebhisha. ³⁴ Bhushe impo hari ekatiri kabe, himpo ngy' asebesayo n' e mutima wabhe. ³⁵ Musimik' emikoba yinu, n' etusuku twinu tusake. ³⁶ Na bhanu, mususanyiwe na bhea imbi bharindirirengi Nyerekurwabho mo bhuheruki, kongo bhamurundure usekiya weya n'ikaso m' orubhi. ³⁷ Bhakasanirwe imbo bhakori Nyerekuritu, morr' iya rae, wakumana bho bhashere! Nabwere mor' eira, wasimika, Warisa hima nabho, n' iya kwihi nabho mor' ikore bho. ³⁸ Na kiro weya mo karo k' emet' abhi ari k' emet' ashatu, bhakasanirwa imbi bhakori, amabhesa bhasekumanwa bhakohya. ³⁹ Musibhecho shu, amabhesa min' e numba wamusibhange ini ntambi ng' isiy' e mwibhi, wamukohyange n'utamusiang' e numba yae ikakurwe. ⁴⁰ Na bhanu hotu, mw'etingi muranga, bhush' e mwana w'e mwea usiayo mu kashang' inki katanganikira bhanu. ⁴¹ Petero wamushisha: E Nyerekuritu, kuri bhate ngi kuronjange ongo e mwani ngu ari kury' e bhampe. ⁴² Na Nyerekuritu w'ebha: Inye ngo mukori w'eira na wakohya ingu Nyerekurwabo wasemusimika habhasirwa n' e bhea bhae, mw' eninka bho e bhiyo mu kashangi karengekana? ⁴³ Wakasanirwa ingo mukori, Nyerekurwabho wasekiayo mo riya rae , wamukumaneyo nt' ukorange mbo! ⁴⁴ Nabwire mor' eira , wamutereka hambasiro n' e byae bhiti. ⁴⁵ Eina, amabhesa ingo mukori wasebha mw' iwe wesine: Nyerekuritu wasiya mw' iya; wabhucha mw' ikam' e bhakori bhabhume n' e bhomina, mw' erisa , iyomo n'itamira; ⁴⁶ Nyerekurwabho nango mukori wasiya m' otu ndu nti rwarange we na mu kashangi 'nki nti kasibirira we, Wamubhaa-bhaayo, n' imunink' e muhang' wae hima n' e bhasir' ereira. ⁴⁷ E mukori ngu, wasibirira erisasa ra Nyerekurwabo na nt' waronjaro, wahumbwa oero rukiri rwa bhihumbo. ⁴⁸ Eina kinsingu, abhesenga ntusi, waronja byakomenwa bhihumbo, wahumbwa bhihumbo bhikeke. Wahemwayo mo bhingi ing' waninkwanga bhingi, n' imusondamo bhingi m' ung' wareninkwa byarira. ⁴⁹ Nar' iya karekera kasha mo chuo, na niri nanki ch' ianikira, amabese kamakind' isaka? ⁵⁰ Ina e rubhikwa ndi riserubikw' ani, na met' anga randikecha kongo rabhererera! ⁵¹ Bhanu mw' anikirange mbu nariya karisha bhuhoro mo chuo? Kusira nibwere ngi, eina isiana. ⁵² Bhushe etukire mpo bhasanu mu numba nima bhasebhanyiwa, bhashatu mu bhabhi, na bhabhi mu bhashatu. ⁵³ Ishe n' emwana n' e mwana n' ishe, nina na mwisi we na mwisiwe na nina, inabhe na mwasana we n' e mwasana n' inabhe. ⁵⁴ Washisha tu enkumanano: mumasung' erotundo kokwiyo, nti m' webha: e mbura yeya. ⁵⁵ Na mumasung' er'eyuhu ra munkaty' e mwishi, nti m' webha: kusebhesa chuka, na nti ngi byabhesa. ⁵⁶ Bhakorotima: bhanu mus' iteerera e bhususe bw' echuo n' e kwiyo; bhuni bhutangateerera bhanu e kashangi kano? ⁵⁷ Na bhusha nki mutungateerera bhanu bhesin' ereira? ⁵⁸ Amabhesa ong' wendange n' ewakukusongere kw'emukeri w'erobhansa, munkati n' ense sibhirira bwamukindanya ongo nae, mw'esubhaha watakur' ingi kw'emukeri w'erobhansa, nae wamukurisha kw'emukakare, n' angu wamukuriya mo ngori. ⁵⁹ Nakw'ire cho, ututuki mo utunga tuwa e rumea rwa hende.