¹ Yesu wakime mo numba ya mweya uma mukakare wa Bhafarisayo, mw' isond' ira bhiyo, er' otu rwe r' iruhuka, e Bafarisayo bhamusisirisa. ² Mo makako a Yesu nti hari mweya uma mukoni wabhura. ³ Yesu w'ebha, n' ishisha mbo bhakakare bh' e myomba n' e bhafarisayo: Rakonda ari anga iramya mo r' otu rwe r' iruhuka? ⁴ Bhakobha. Yesu wamuturanamo, wamuramya, n' imureke w' eiri rae. ⁵ Kuruma naha wasubya, w'ere bho: inye mu bhanu, emwanae ari enkambu yae yamakime mu kiribhu wamufund' ikuto yo mo r' otu rw'er'iruhuka? ⁶ N' abho bhatamusubhii anga na kinwa muncho. ⁷ Warekia wasunga e bhararikwa bhamarika e kubhusondori, wakere bho mwani, were bho: ⁸ Umabikirwa na mweya mu bhuheruki, ang' ikanyire irika mo kitumbi ch'e kubhusondori, bwishe kwa mubhesa umpe mweya wa kurenga bhuritohe. ⁹ Na ngu e wakubhubhikira ongo nae, w' eya n' ikwere: siere ngu mweya imbo bhuari na ongo ukubhesa nti umakwa nkene n' isonda kitumbi chakuruma. ¹⁰ Eina umabikirwa, enda karika mo bhuari bwa hende, na 'ngu e wakubhubikira ng'wakweri: E mira ani, sheere kuno ku bhusondori, himpo ukubha na bhuritohe mo makako ambi bheya e bharirengi nabhe mongo. ¹¹ Bhushwa kinsi ngu w'itarishange wesine wahichiwa nangu wehichange ngi watarishiwayo. ¹² W'ere ngu e wakumurarikanga: umateka bhiyo munkatiemwishi ari bhiyo by' orengero ang' ibhikira bhira bh' abhe ari bhanakinu, e bhabhuti bhabhe ari mbi e bhari hima nabhe bhisa e bhehe, nabho bhatakurarikingi mw'isonde ikukuruchie. ¹³ Eina umasond' eninka bhea bhiyo, nti ubhikira e bhasene, n'e bhirema, n'e bhiwete, n'e bhihumi-humi; ¹⁴ Na ongo ukasanirwa, bhushwambu bhasira ohembo; bhushwa mbu uninkwayo uhembo er'otu rwer' ifuka e bheya bher' eira. ¹⁵ Uma m' umbi e bhabhesanga bharange nayembyo bhiyo, warekia wor' ukira 'mbi bhinwa, wamw' ere: Wakasanirwa ngu wa 'risayo mo bhubhake bwa Ongo! ¹⁶ Yesu wamusubhie: Mweya uma waronja nkumanano nkiri, wabhikira bheya bhingi; ¹⁷ Watuma mukori wae munjo ntambi y' e bhiyo kasubhukia mbi e bhakurarikwanga mw' iye, bhushwa e bhiti iye bhiriko. ¹⁸ Ein' e bhati bhabhucha kw' ireme mu murenge uma. Ingu waroso wamw'ere: Namachura ishwa, nsondange ienda katanguraro, nakukonga unsasire; ¹⁹ N' ompe w' ebha: namachura nkambu isanu, mume n'e bhuti, nsondang' ienda k' ereka to, unsasiranga. ²⁰ N'ompe w' ebha: Namaherucha momina, na cha ngi chasingwa nt' eyi. ²¹ E mukori mor' ekuruka, w'ere Nyerekurwabo imbi bhinwa Emin' enumba wasubuka, w' ere e mukori wae: enda tete, munkati ensenkiri n' enkeke sa mu r' obungu, urishanga e bhasene, n'ebirema, n'e bhiwete, n' e bhihumi-humi. ²² Ingo mukori w;ebha: E Nyerekuritu e momba wabhe wamakind' ieta, eina iya na mu ino ntambi kukiri bhuari. ²³ Ingo mukakare w'ere ngo mukori: enda mo mwengere n'e bwendende, mimirisa bhakimi kongo e numba yani yarisa. ²⁴ Bhushwa nabwere cho: kumunda n' ambi bheya e bhakubhikirwanga, kusira anga n' uma e warorayo mo bhiyo byani. ²⁵ Na nkumanano singi bhemisanya na Yesu, wikebhera, w'ere bho; ²⁶ Ram' aba e mweya wamiya e kuri ani nae nti wabhaa ishe na nina, na mukari, n' e bhana bhe, na bhanachabho ehbhabhume n' e bhomina n' e bhuingo bwae wesine, utamubha ntumwa yani. ²⁷ Mweya uti' ingu utamuria er'iyango rae wesine n'ibha ku mbusa n' ani, utamukoch' ibha ntumwa y' ani. ²⁸ Bhushwa, ng' inye munkati n'inu, wamasond' eimba numba, utamurika kasa hansi wanse mw' isibhirira kuti uri n'ambi ebyaheyanya ngo murimo, ²⁹ Ari wamabha nti wamakind' ironja e ntangiro wamaba nti utamukindanya, ebati bhasemusunga, n'ibhucha, ³⁰ Imusimya n'iebha: ingu mweya wabhuchayo iimba, eina nti wakukindanya? ³¹ Ar' inye mubhake wamenda kakwana n' umpe mubhake, waruk' irika kasa hansi mw' esisirisa wasibhe kuti iwe n' e bheya bhae bhihumbi,kumi, bhakocha ikwana na 'ngu murenda ing' uri na bheya bhihumbi makumi abi? ³² Ramabha nti nge bhumbo, watuma bhea kasonda bhuhoro,ingu mubhake wamabha nti ukiri kore. ³³ Nge bhumbo, kinsi uma, mu bhanu, wamafund' isiya byae bhiti; utamubha ntumwa' yani. ³⁴ Emukwa wakonda, eina emukwa wamariminya ensense, kikai nki chamusingwa wakuruke mo bhushamuke wao? ³⁵ Nti wakonda tu mor' oto ari mor' irare, eina urekerwanga hambuka. Ingu uri na mate iy' orukira, worukure.